ଭଦ୍ରକ, ୭।୮ (ସନାତନ ରାଉତ): ପ୍ରଧାନମନ୍ତ୍ରୀ ଆବାସ ତାଲିକାରୁ ନାମ ବାଦ୍ ପଡ଼ିଥିବାରୁ ଭଦ୍ରକ ବ୍ଲକ ଅଧୀନ ଗୁଜିଦରଡ଼ା ପଞ୍ଚାୟତ ମୀରାମହଲା ଗ୍ରାମର ସେକ୍ ସାହିର ମହମ୍ମଦ ସୋମବାର ପରିବାର ସହ ଜିଲାପାଳଙ୍କ ଅଫିସ ଆଗରେ ଧାରଣାରେ ବସିଥିଲେ। ସେ ଅଭିଯୋଗ କରିଛନ୍ତି ଯେ, ସେ ଜଣେ ଖଟିଖିଆ ଗରିବ ଶ୍ରେଣୀର ହୋଇଥିବା ବେଳେ ଅର୍ଥାଭାବରୁ ଘର କରି ନ ପାରି ଭଙ୍ଗାଘରେ ପରିବାର ସହ ରହୁଛନ୍ତି। ୨୦୧୬-୧୭ ଆର୍ଥିକ ବର୍ଷରେ ପ୍ରକାଶିତ ତାଲିକାରେ କ୍ରମିକ ନଂ.୧୨୧୩ରେ ନାମ ପ୍ରକାଶ ପାଇଥିବା ବେଳେ ତାଙ୍କୁ କାର୍ଯ୍ୟାଦେଶ ଦିଆଗଲା ନାହିଁ। କାର୍ଯ୍ୟାଦେଶ ପାଇଁ ପଞ୍ଚାୟତଠାରୁ ବ୍ଲକ ଅଫିସ୍ ପର୍ଯ୍ୟନ୍ତ ବାରମ୍ବାର ଦୌଡ଼ିବା ପରେ ମଧ୍ୟ ତାଙ୍କୁ କାର୍ଯ୍ୟାଦେଶ ମିଳି ନ ଥିଲା। ୧୨ ହଜାର ଟଙ୍କା ଲାଞ୍ଚ ଦେଲେ କାର୍ଯ୍ୟାଦେଶ ଦିଆଯିବ ବୋଲି ତାଙ୍କୁ କୁହାଯାଇଥିଲା। ଲାଞ୍ଚ ନ ଦେବାରୁ ତାଙ୍କୁ ଏହି ଯୋଜନାରେ ଘର ମିଳିଲାନି। ତାଙ୍କ ଆଇଡି ନମ୍ବରରେ ତାଙ୍କ ସାନଭାଇଙ୍କୁ ଆବାସ ପାଇଁ କାର୍ଯ୍ୟାଦେଶ ଦିଆଯାଇଥିବା ସେ ଜିଲାପାଳଙ୍କଠାରେ ଅଭିଯୋଗରେ ଦର୍ଶାଇଛନ୍ତି। ଏହାର ତଦନ୍ତ କରି କାର୍ଯ୍ୟାନୁଷ୍ଠାନ ଗ୍ରହଣ କରିବା ସହ ତାଙ୍କୁ ଆବାସ ପ୍ରଦାନ ପାଇଁ ଦାବି କରିଥିଲେ।