ସଜନାଗଡ଼,୩୧।୩(ଡି.ଏନ୍.ଏ.): ବାଲେଶ୍ୱର ଜିଲା ନୀଳଗିରି ଥାନା ଜଡ଼ିଦା ପଞ୍ଚାୟତ ଜାମୁଡ଼ିହି ଗାଁରେ ଶୁକ୍ରବାର ଏକ ଅଭାବନୀୟ ଘଟଣା ଘଟିଛି। ୫ ଜଣ ପୋଲିସକୁ ଗୋଡ଼ାଇ ଗୋଡ଼ାଇ ହାଣିଛନ୍ତି ଅଭିଯୁକ୍ତ। ଏଥିରେ ଏସ୍ଆଇ ବିରଞ୍ଚି ସାହୁ ୨ ଜଣ ଏଏସ୍ଆଇ ପ୍ରବୋଧ ମଲିକ, ଅନନ୍ତ ମୁର୍ମୁ ଓ ୨ ଅର୍ଜୁ ମାଡ଼ିଙ୍ଗା ଓ ଦୀପକ ପ୍ରଧାନ କନଷ୍ଟେବଲ ଆହତ ହୋଇଛନ୍ତି। ସମସ୍ତଙ୍କୁ ନୀଳଗିରି ହସ୍ପିଟାଲରେ ଭର୍ତ୍ତି କରାଯାଇଛି।
ସୂଚନାଯୋଗ୍ୟ, ୨୦୨୧ରେ ଏକ ହତ୍ୟା ଉଦ୍ୟମ ଅଭିଯୋଗରେ ଅଭିଯୁକ୍ତ ଜାମୁଡ଼ିହି ଗାଁର ପଦ୍ମଲୋଚନ ପାତ୍ରଙ୍କୁ ଗ୍ରାମରଖି ମାଧ୍ୟମରେ କୋର୍ଟରୁ ଆସିଥିବା ସମନ ଥାନା ପକ୍ଷରୁ ପଠାଯାଇଥିଲା। ପଦ୍ମଲୋଚନ ଗ୍ରାମରଖିଙ୍କୁ ଦେଖିବା ପରେ ଯୁକ୍ତତର୍କ କରିଥିଲେ। ଗ୍ରାମରଖି ଥାନାକୁ ଏ ବିଷୟରେ ଜଣାଇଥିଲେ। ଖବରପାଇ ଘଟଣାସ୍ଥଳରେ ନୀଳଗିରି ପୋଲିସ ସଦଳବଳେ ପହଞ୍ଚିଥିଲେ। ପୋଲିସକୁ ଦେଖି ପଦ୍ମଲୋଚନ ସେମାନଙ୍କୁ କଟୁରୀରେ ଗୋଡ଼ାଇ ଗୋଡ଼ାଇ ହାଣିଥିଲେ। ଶେଷରେ ପଦ୍ମଲୋଚନଙ୍କୁ ପୋଲିସ କାବୁ କରିଛି।