ଭୁବନେଶ୍ୱର,୨୧।୧୦(ବ୍ୟୁରୋ): ବରିଷ୍ଠ ସାମ୍ବାଦିକ ନବୀନ ଦାସଙ୍କ ପୁଅ ମନୀଷ ଅନୁରାଗ ଦାସ ହତ୍ୟା ମାମଲାରେ ୩ ଅଭିଯୁକ୍ତଙ୍କୁ ୪ ଦିନିଆ ରିମାଣ୍ଡରେ ଆଣି ପଚରଉଚରା କରୁଛି ଇନ୍ଫୋସିଟି ଥାନା ପୋଲିସ। ଗୁରୁବାର ରିମାଣ୍ଡ ଅବଧି ସରୁଥିବାବେଳେ ପୋଲିସ ହାତରେ ମାତ୍ର ଆଉ ଗୋଟିଏ ଦିନ ରହିଛି। ତେଣୁ ଯେ କୌଣସି ଉପାୟରେ ଅଭିଯୁକ୍ତଙ୍କ ମୁହଁରୁ ପୂରା ଘଟଣାର ଟିକିନିଖି ବାହାର କରିବାକୁ ପୋଲିସ ଚେଷ୍ଟା କରୁଛି। ହେଲେ ଅଭିଯୁକ୍ତଙ୍କ କଥାରେ ତାଳମେଳ ରହୁ ନ ଥିବାରୁ ପୋଲିସ ଦ୍ୱନ୍ଦ୍ୱରେ ପଡିଛି। ଏଯାଏ ମୁଖ୍ୟ ଅଭିଯୁକ୍ତ କିଏ ତାହା ସ୍ପଷ୍ଟ ହୋଇ ନ ଥିବାବେଳେ ଅନେକ ପ୍ରଶ୍ନର ଉତ୍ତର ପୋଲିସ ପାଇଁ ରହସ୍ୟ ହୋଇ ରହିଥିବା ବିଶ୍ୱସ୍ତ ସୂତ୍ରରୁ ଜଣାପଡିଛି।
୩ ଅଭିଯୁକ୍ତ ନୟାପଲ୍ଲୀ ଥାନା ଅଞ୍ଚଳରେ ରହୁଥିବା କେନ୍ଦ୍ରାପଡ଼ା ରାଜନଗରର ଅମ୍ରିତ ପ୍ରୀତମ ବିଶ୍ୱାଳ, କନ୍ଧମାଳ ଜିଲା ଫୁଲବାଣୀ ଟାଉନ ଥାନା ଅମଲାପଡ଼ାର ଦୀନେଶ କୁମାର ମହାପାତ୍ର ଓରଫ ଲିଟୁ ଓ ପିଅନପଡ଼ାର ମୃତ୍ୟୁଞ୍ଜୟ ମିଶ୍ର ଓରଫ ମୁନାଙ୍କୁ ଘନ ଘନ ଜେରା କରାଯାଉଛି। କେତେବେଳେ ଜଣଜଣ କରି ତ ଆଉ କେତେବେଳେ ସାମ୍ନାସାମ୍ନି ଜେରା କରୁଛି। ତେବେ ଦୀନେଶ, ମୃତ୍ୟୁଞ୍ଜୟ ଭୁବନେଶ୍ୱରରେ ନୂଆ ଥିବାରୁ ଉଭୟେ ରାସ୍ତାଘାଟ ବିଶେଷ ଜାଣିନାହାନ୍ତି। ଅମ୍ରିତ ଜାଣିଥିଲେ ସୁଦ୍ଧା ସେଦିନ ରାତିରେ ସମସ୍ତେ ନିଶାସକ୍ତ ଥିଲେ। ତେଣୁ କେଉଁଠି ଠେଲାପେଲା ହେଲା କିପରି ହେଲା ସେମାନେ କେହି କିଛି କହିପାରୁ ନାହାନ୍ତି। ଫଳରେ ହତ୍ୟାକାଣ୍ଡରେ ପ୍ରମାଣ ଯୋଗାଡ କରିବା ପୋଲିସ ପାଇଁ କାଠିକର ପାଠ ହୋଇଛି। ଯଦି କେହି ପ୍ରତ୍ୟକ୍ଷଦର୍ଶୀ ଥାଆନ୍ତେ, ହୁଏତ ପୋଲିସ ପାଇଁ ସହଜ ହୋଇପାରିଥାନ୍ତା। କେବଳ ଅଭିଯୁକ୍ତଙ୍କୁ ଓଦା ଡ୍ରେସରେ ଦେଖିଥିବା ଜଣେ ସ୍ଥାନୀୟ ଅଞ୍ଚଳର ବ୍ୟକ୍ତିଙ୍କ ବୟାନକୁ ପୋଲିସ ରେକର୍ଡ କରିଛି। ଏହା ହତ୍ୟାର ଦୃଢ଼ ପ୍ରମାଣ ହୋଇ ନ ଥିବାରୁ ପୋଲିସ ସିନ୍ ରିକ୍ରିଏଶନ କରିବାକୁ ଯୋଜନା କରିଥିଲା। କିନ୍ତୁ ଅଭିଯୁକ୍ତମାନେ କିଛି ସ୍ପଷ୍ଟ କହିପାରୁ ନ ଥିବାରୁ ସିନ୍ ରିକ୍ରିଏଶନ କରାଯିବ ନାହିଁ ବୋଲି ଜଣେ ବରିଷ୍ଠ ଅଧିକାରୀ କହିଛନ୍ତି। ଅପରପକ୍ଷରେ ବ୍ୟବଚ୍ଛେଦର ଚୂଡ଼ାନ୍ତ ରିପୋର୍ଟ, ଭିସେରା ଓ ଡାଏଟମ୍ ରିପୋର୍ଟ ମଧ୍ୟ ପୋଲିସକୁ ମିଳିପାରି ନାହିଁ। ଏ ସମସ୍ତ ରିପୋର୍ଟ ଚାର୍ଜସିଟ୍ର ବଳିଷ୍ଠ ତଥ୍ୟ ଭାବରେ ଧରାଯାଉଥିବାରୁ ପୋଲିସ ତାହାକୁ ଅପେକ୍ଷା କରିଛି।
ଗତ ୯ ତାରିଖ ଅପରାହ୍ଣ ୫ଟାରେ ମନୀଷଙ୍କୁ ଅଭିଯୁକ୍ତ ଅମ୍ରିତ ଫୋନ କରି ଡାକିବା ସହ ୨ସାଙ୍ଗ ମୃତ୍ୟୁଞ୍ଜୟ ଓ ଦୀନେଶଙ୍କ ସହ ଏକ ବ୍ୟାଚଲର ପାର୍ଟିରେ ଯିବାକୁ କହି କାରରେ ନେଇଥିଲେ। ବିଳମ୍ବିତ ରାତିରେ ପାତ୍ରପଡ଼ାସ୍ଥିତ ସାଉଥ ସିଟି ହୋଟେଲ ଆଣ୍ଡ ବାର୍ରେ ବିଲ୍ ଦେବାକୁ ନେଇ ପାଟିତୁଣ୍ଡ ହୋଇଥିଲା। ପରେ ମନୀଷ ମା’ଙ୍କୁ ଫୋନ୍ କରି ଅନ୍ଲାଇନରେ ୮ହଜାର ଟଙ୍କା ମଗାଇ ବିଲ୍ ଦେଇ ରାତି ୩ଟା ୨୯ରେ ହୋଟେଲରୁ ଏକାକୀ ବାହାରିଯାଇଥିଲେ। ଅଭିଯୁକ୍ତମାନେ ବାଟରେ ତାଙ୍କ ସହ ଧସ୍ତା ଧସ୍ତି କରିଥିଲେ। ମନୀଷଙ୍କର ମୃତ୍ୟୁ ଘଟିବାରୁ ଅଭିଯୁକ୍ତମାନେ ମୃତଦେହକୁ ପୋଖରୀରେ ଫିଙ୍ଗିଦେଇଥିଲେ।