ବ୍ରହ୍ମପୁର,୧୦ା୧୧(ସୁବାସ ଚନ୍ଦ୍ର ପାଢ଼ୀ): ଦିଗପହଣ୍ଡି ଥାନା ଅନଙ୍ଗପୁରର ଗାଡି ଡ୍ରାଇଭର ତଥା ମାଲିକ ଆର. ସୁନୀଲ ରେଡ୍ଡୀ ହତ୍ୟା ମାମଲାର ରାୟ ଶୁକ୍ରବାର ପ୍ରକାଶ ପାଇଛି। ବ୍ରହ୍ମପୁର ଅତିରିକ୍ତ ଜିଲା ଦୌରାଜଜ୍-୧ ଡ. ଇନ୍ଦୁ ଶର୍ମା ଉପଯୁକ୍ତ ପ୍ରମାଣ ମିଳିଥିବାରୁ ଜଣେ ଅଭିଯୁକ୍ତଙ୍କୁ ଦୋଷୀ ସାବ୍ୟସ୍ତ କରିବା ସହ ତାଙ୍କୁ ଆଜୀବନ କାରାଦଣ୍ଡରେ ଦଣ୍ଡିତ କରିଛନ୍ତି। ଏଥିସହିତ ୧୬ ହଜାର ଟଙ୍କା ଜରିମାନା ଦେବାକୁ ନିର୍ଦ୍ଦେଶ ହୋଇଛି। ଜରିମାନା ଅନାଦାୟ ଅଧିକ ୧୪ ମାସ ସଶ୍ରମ କାରାଦଣ୍ଡରେ ଦଣ୍ଡିତ ପାଇଁ ରାୟରେ ଉଲ୍ଲେଖ କରିଛନ୍ତି। ଦୋଷୀ ଜଣଙ୍କ ଅନୁଗୋଳ ଜିଲା ଅନୁଗୋଳ ଟାଉନ ଥାନା କୁରୁଣ୍ଠି ଗ୍ରାମର ଲୋକନାଥ ପ୍ରଧାନ (୫୨)।
୨୦୧୬ ଫେବୃୟାରୀ ୬ ତାରିଖରେ ଆର. ସୁନୀଲ ରେଡ୍ଡୀଙ୍କୁ ୨ ଜଣ ଅପରିଚିତ ବ୍ୟକ୍ତି ସାକ୍ଷାତ କରି ତାଙ୍କ ଗାଡିରେ ଗଞ୍ଜାମରୁ ଦିଗପହଣ୍ଡିକୁ ଆସବାବପତ୍ର ନେବେ ବୋଲି କହିଥିଲେ। ଭଡ଼ା ବାବଦକୁ ସୁନୀଲଙ୍କୁ ୨୪୦୦ ଟଙ୍କା ଦେବାକୁ ସ୍ଥିର ହୋଇଥିଲା। ପରେ ସୁନୀଲ ନିଜ ଗାଡ଼ି (ଓଆର ୦୭ ଜେ ୯୪୬୮)ରେ ସମ୍ପୃକ୍ତ ୨ ବ୍ୟକ୍ତିଙ୍କୁ ଧରି ଗାଁରୁ ବାହାରିଥିଲେ। ରାତି ସୁଦ୍ଧା ସୁନୀଲ ଘରକୁ ଫେରି ନ ଥିବା ବେଳେ ତାଙ୍କ ମୋବାଇଲ ଫୋନ ମଧ୍ୟ ବନ୍ଦ ରହିଥିଲା। ୭ ତାରିଖରେ ଗଞ୍ଜାମ ପୋଲିସ ନୂଆଗାଁ ଶଙ୍ଖ ପାଖରୁ ଏକ ମୃତଦେହ ଜବତ କରିଥିଲା।