ଭୁବନେଶ୍ୱର, ୨୩ା୪(ବ୍ୟୁରୋ): ପରକୀୟା ପ୍ରୀତିକୁ ବିରୋଧ କରିବାରୁ ଇଞ୍ଜିନିୟର ସ୍ବାମୀଙ୍କୁ ହତ୍ୟା ପାଇଁ ସୁପାରି ଦେବା ଘଟଣା ରାଜଧାନୀରେ ଚର୍ଚ୍ଚାର ବିଷୟ ପାଲଟିଛି। ଏନେଇ ଦୁଇ ଥାନାରେ ଦୁଇ ମାମଲା ରୁଜୁ ହୋଇଥିବାବେଳେ ଗୁରୁବାର ମଞ୍ଚେଶ୍ୱର ଥାନା ପୋଲିସ ଇଞ୍ଜିନିୟରଙ୍କ ପୂର୍ବତନ ଡ୍ରାଇଭର ତଥା ତାଙ୍କ ସ୍ତ୍ରୀଙ୍କ ପ୍ରେମିକ ଅଶୋକ କୁମାର ସାହୁଙ୍କୁ ଗିରଫ କରିଛି। ଏଥିସହ ସ୍ତ୍ରୀ ସିଲ୍ସିଲା ବେହେରାଙ୍କ ସମେତ ଅନ୍ୟ କେତେଜଣଙ୍କ ନାମରେ ମାମଲା ରୁଜୁ କରି ତଦନ୍ତ ଚଳାଇଛି। ଏପରିସ୍ଥିତିରେ ଅଭିଯୁକ୍ତ ସ୍ତ୍ରୀ ସିଲ୍ସିଲା ଗଣମାଧ୍ୟମ ଆଗରେ ଶୁକ୍ରବାର ମୁହଁ ଖୋଲିବା ସହ ସ୍ବାମୀଙ୍କ ବିରୋଧରେ ପାଲଟା ଅଭିଯୋଗ ଆଣିଛନ୍ତି। ସେ କହିଛନ୍ତି, ଅଶୋକଙ୍କୁ ତାଙ୍କ ସ୍ବାମୀ ଡ୍ରାଇଭର ଭାବେ ଆଣିଥିଲେ। ପୁରୀକୁ ବଦଳି ହେବା ପରେ ଅଶୋକଙ୍କୁ ଚାକିରି ଛାଡ଼ି ଘରୁ ଚାଲିଯିବାକୁ କହିଥିଲେ। ମୋ ସ୍ବାମୀ ଅନ୍ୟଜଣେ ବିଧବାଙ୍କୁ ବିବାହ କରିଛନ୍ତି। ତାଙ୍କର ୫ ବର୍ଷର ଝିଅଟିଏ ଅଛି। ଅନ୍ୟ ଝିଅଙ୍କ ସହ ତାଙ୍କର ଖରାପ ସମ୍ପର୍କ ରହିଛି। ଝିଅଙ୍କ ସହ ଅଶ୍ଳୀଳ ଚାଟ୍ କରନ୍ତି ବୋଲି ସେ କହିଛନ୍ତି। ସେପଟେ ତାଙ୍କ ୧୭ ବର୍ଷୀୟ ପୁଅ କହିଛନ୍ତି, ଅଶୋକ ହେଉଛନ୍ତି ତାଙ୍କ ସମ୍ପର୍କୀୟ ମାମୁଁ। ଘଟଣା ପାଇଁ ନିଜ ବାପାଙ୍କୁ ସେ ଏଥିପାଇଁ ଦୋଷ ଦେଇଛନ୍ତି। ଗଣମାଧ୍ୟମରେ ଏହି ଖବର ପ୍ରକାଶ ହେବା ପରେ ତାଙ୍କ ପଢ଼ାରେ ବାଧା ସୃଷ୍ଟି ହେଉଥିବା ସେ କହିଛନ୍ତି। ତେବେ ପୋଲିସ ଅଭିଯୁକ୍ତ ସ୍ତ୍ରୀ, ହତ୍ୟା ପାଇଁ ଟଙ୍କା ନେଇଥିବା ଜିତେନ୍ଦ୍ର ପ୍ରଧାନ ଓ ସହଯୋଗୀଙ୍କୁ ଧରିବାକୁ ଉଦ୍ୟମ ଚଳାଇଥିବାବେଳେ ସିଲ୍ସିଲାଙ୍କ ପାଲଟା ଅଭିଯୋଗ ମାମଲାକୁ ଭିନ୍ନ ମୋଡ଼ ଦେଇଛି। ଏନେଇ ସାଧାରଣରେ ନାନା ଚର୍ଚ୍ଚା ଲାଗିରହିଛି। ସିଲ୍ସିଲା ନିଜକୁ ବଞ୍ଚାଇବା ପାଇଁ ମିଛ କହୁଥିବା ପୋଲିସ ସନ୍ଦେହ କରୁଛି। ଏନେଇ ଡିସିପି ଉମାଶଙ୍କର ଦାଶ କହିଛନ୍ତି, ଏହି ମାମଲାରେ ସମ୍ପୃକ୍ତ ଥିବା ଅନ୍ୟ ସମସ୍ତ ଅଭିଯୁକ୍ତଙ୍କୁ ଆମେ ଗିରଫ କରିବୁ। ସମସ୍ତଙ୍କ ବୟାନକୁ ରେକର୍ଡ କରାଯିବ।