ମୁମ୍ବାଇ: କରୋନା କବଳରେ ଏବେ ବଲିଉଡ୍। ବଲିଉଡ୍ ଇଣ୍ଡଷ୍ଟ୍ରି ଓ ଟେଲି ଜଗତର କେତେକ କଳାକାର କରୋନାରେ ପୀଡ଼ିତ ହୋଇ ସୁସ୍ଥ ହୋଇଥିବା ବେଳେ ଆଉ କେତେକ ଚିକିତ୍ସିତ ହେଉଛନ୍ତି। ଏହି କ୍ରମରେ ବଲିଉଡ୍ ମହାନାୟକ ଅମିତାଭ ବଚ୍ଚନ, ଅଭିଷେକ ବଚ୍ଚନ, ଐଶ୍ୱର୍ଯ୍ୟା ରାୟ ବଚ୍ଚନ ଓ ଆରାଧ୍ୟା ମଧ୍ୟ କରୋନାରେ ପୀଡ଼ିତ ହୋଇଛନ୍ତି। ଚିକିତ୍ସା ପାଇଁ ସେମାନଙ୍କୁ ମୁମ୍ବାଇର ନାନାବତି ହସ୍ପିଟାଲରେ ଭର୍ତ୍ତି କରାଯାଇଛି। ଅନ୍ୟପଟେ ଅମିତାଭଙ୍କ ଓ ତାଙ୍କ ପରିବାରଙ୍କ ପାଇଁ ଆଶୁ ଆରୋଗ୍ୟ କାମନା କରିଛନ୍ତି ପ୍ରଶଂସକ। ଇତିମଧ୍ୟରେ ଜୁଲାଇ ୧୦ରେ ରିଲିଜ୍ ହୋଇଥିବା ଆମାଜନ ପ୍ରାଇମ୍ ଓ୍ବେବ ସିରିଜ୍ ବ୍ରିଦ୍-୨ରେ ଅଭିଷେକ ବଚ୍ଚନଙ୍କ ସହ ଅଭିନୟ କରିଥିବା ଅମିତ ସାଦ ତାଙ୍କୁ ମନେ ପକାଇଛନ୍ତି।
ଅଭିଷେକଙ୍କୁ ମନେପକାଇ ଅମିତ ତାଙ୍କ ପାଇଁ ଏକ ସ୍ପେଶାଲ ପୋଷ୍ଟ ଲେଖିଛନ୍ତି। ଯେଉଁଥିରେ ସେ ତାଙ୍କ ପରିବାରବର୍ଗଙ୍କ ଶୀଘ୍ର ଆରୋଗ୍ୟ ପାଇଁ ପ୍ରାର୍ଥନା କରିଛନ୍ତି। ଏଥିସହ ସେ ଲେଖିଛନ୍ତି, ଏହି ପୋଷ୍ଟଟି ମୋର ଜଣେ ବରିଷ୍ଠ, ଭାଇ ଓ ଅଭିଷେକ ବଚ୍ଚନଙ୍କ ପାଇଁ। ଯାହାଙ୍କୁ ମୁଁ ଫିଲ୍ମ ଗୁରୁ, ଯୁବା, ବଣ୍ଟି ଔର ବବଲିରୁ ଅତି ନିକଟରୁ ଦେଖିଆସୁଛି। ଅଭିଷେକ କେବେ ବି ଅନୁଭବ କରିବାକୁ ଦେଇନାହାନ୍ତି ଯେ, ସେ ଅଧିକ ଓ ମୁଁ କମ୍। ତେଣୁ ଶ୍ରେଷ୍ଠ ବରିଷ୍ଠ ହୋଇଥିବାରୁ ଅମିତ ତାଙ୍କୁ ଧନ୍ୟବାଦ ଜଣାଇଛନ୍ତି। ଆହୁରି ମଧ୍ୟ କହିଛନ୍ତି ଅଭିଷେକଙ୍କ ବିନା ବ୍ରିଦ୍-୨ରେ କବୀର ସାୱନ୍ତ ଭାବେ ତାଙ୍କ ଚରିତ୍ର ପୁରା ଅସମ୍ପୂର୍ଣ୍ଣ। ଏହି ସିରିଜ୍ ପାଇଁ ସମସ୍ତ ଖୁସି ଓ ସେଲିବ୍ରେସନ ଅଭିଷେକଙ୍କ ବିନା ଅଧୁରା। ତୁମେ ଓ ତୁମ ପରିବାର ଶୀଘ୍ର ସୁସ୍ଥ ହୋଇଯାଅ। ଫଳରେ ମୁଁ ତୁମକୁ ସାକ୍ଷାତ କରିପାରିବି ଏବଂ ଆଲିଙ୍ଗନ କରିପାରିବି ବୋଲି ସେ କହିଛନ୍ତି।
ଏଥିପାଇଁ, ଯଦି ମୋତେ ଦୁଇ ସପ୍ତାହ ହୋମ୍ କ୍ୱାରାଣ୍ଟାଇନ୍ରେ ରହିବାକୁ ପଡ଼େ ତେବେ ପ୍ରସ୍ତୁତ। ମୁଁ ତୁମକୁ ଭେଟିବାକୁ ବହୁ ବ୍ୟାଗ୍ର ବୋଲି ଅମିତ କହିଛନ୍ତି। ଅପରପକ୍ଷେ ଅମିତଙ୍କ ଏହି ପୋଷ୍ଟର ଜବାବ ଦେଇଛନ୍ତି ଅଭିଷେକ। ସେ ଲେଖିଛନ୍ତି, ତୁମର ପ୍ରାର୍ଥନା ପାଇଁ ଧନ୍ୟବାଦ, ତୁମର ସଫଳତାକୁ ସେଲିବ୍ରେଟ କରିବାକୁ ସେଠାରେ ମୁଁ ଉପସ୍ଥିତ ନ ଥିବାରୁ ଦୁଃଖିତ। କିନ୍ତୁ ଖୁବ ଶୀଘ୍ର ଆମେ ମିଶି ଏହାକୁ ପାଳନ କରିବା। ତୁମେ ଜଣେ ବହୁ ଭଲ ବନ୍ଧୁ ଏବଂ ତୁମର ଆଲିଙ୍ଗନ ପାଇଁ ଆଉ ଅପେକ୍ଷା କରିପାରିବି ନାହିଁ ବୋଲି ଅଭିଷେକ କହିଛନ୍ତି।
