ବଲିଉଡ୍ ଅଭିନେତା ସୋନୁ ସୁଦ ଆଜି ୪୭ ବର୍ଷରେ ପଦାର୍ପଣ କରିଛନ୍ତି। ଏହି ଅବସରରେ ସେ ଏକ ବଡ ଘୋଷଣା କରିଛନ୍ତି। ସେ ୩ ଲକ୍ଷ ଲୋକଙ୍କୁ ଚାକିରି ଦେବା ନେଇ ଘୋଷଣା କରିଛନ୍ତି। ଏଥିପାଇଁ ସେ http://PravasiRojgar.com ନାମରେ ଏକ ଓ୍ବେବସାଇଟ୍ ଖୋଲିଛନ୍ତି। ଏଥିରେ ଭଲ ବେତନରେ ପ୍ରବାସୀ ଶ୍ରମିକଙ୍କ ରୋଜଗାର ଦିଆଯିବ ସହ ପିଏଫ୍, ଇଏସ୍ଆଇ ଏବଂ ଅନ୍ୟାନ୍ୟ ଲାଭ ପ୍ରଦାନ କରାଯିବ ବୋଲି ସେ ଘୋଷଣା କରିଛନ୍ତି।
ପ୍ରବାସୀ ଶ୍ରମିକଙ୍କୁ ସାହାଯ୍ୟ କରି ଏବେ ଚର୍ଚ୍ଚାରେ ଅଛନ୍ତି ସୋନୁ। ସୂଚନା ପାଇ କେଉଁଠି କୃଷକଙ୍କ ପାଇଁ ଟ୍ରାକ୍ଟର ପଠାଉଛନ୍ତି ତ ଆଉ କାହାକୁ ଚାକିରି ଦେଉଛନ୍ତି। ଏହି କାରଣରୁ ଲୋକେ ତାଙ୍କୁ ଏବେ ଭଗବାନ ଭଳି ପୂଜିବା ଆରମ୍ଭ କଲେଣି। ୧୯୯୯ରେ ତାମିଲ ଚଳଚ୍ଚିତ୍ର ‘କାଲାଜଗର’ରେ ସେ ଫିଲ୍ମରେ ଡେବ୍ୟୁ କରିଥିଲେ। ସୋନୁ ହିନ୍ଦୀ ଫିଲ୍ମ ‘ସହିଦ-ଏ-ଆଜମ ଭଗତ ସିଂ’ରେ ଭଗତ ସିଂ ଭୂମିକା କରି ପରିଚିତ ହୋଇଥିଲେ। ଏହାପରେ ଅନେକ ଫିଲ୍ମରେ କାମ କରିଛନ୍ତି। ଅଧିକାଂଶ ଫିଲ୍ମରେ ତାଙ୍କୁ ଭିଲେନ ଚରିତ୍ରରେ ଦେଖିବାକୁ ମିଳେ।