ମୁମ୍ବାଇ: ଦବଙ୍ଗ ଖାନ୍ ସଲମାନ ବର୍ତ୍ତମାନ ପର୍ଯ୍ୟନ୍ତ ବଲିଉଡ୍ ଇଣ୍ଡଷ୍ଟ୍ରିରେ ଅନେକ ଅଭିନେତ୍ରୀଙ୍କୁ କାମ କରିବା ପାଇଁ ସୁଯୋଗ ଦେଇଛନ୍ତି। ସେମାନଙ୍କ କ୍ୟାରିୟର ଗଢ଼ିବାରେ ସଲମାନଙ୍କ ଭୂମିକା ବେଶ୍ ଗୁରୁତ୍ୱପୂର୍ଣ୍ଣ। ଏହି ଅଭିନେତ୍ରୀମାନଙ୍କ ମଧ୍ୟରୁ ଜରିନ ଖାନ୍ ଅନ୍ୟତମ। ଆଜି ଅର୍ଥାତ୍ ମେ’ ୧୪ରେ ଜରିନ୍ଙ୍କ ଜନ୍ମଦିନ। ସେ ଆଜି ୩୬ ବର୍ଷରେ ପଦାର୍ପଣ କରିଛନ୍ତି। ସେ ଯେବେ ଫିଲ୍ମ ଜଗତରେ ଡେବ୍ୟୁ କରିଥିଲେ, ତାଙ୍କୁ ସଲମାନ ହିଁ ସୁଯୋଗ ଦେଇଥିଲେ ବୋଲି ଜରିନ୍ କହିଛନ୍ତି।
ଏକ ସାକ୍ଷାତକାରରେ ଜରିନ ସଲମାନଙ୍କୁ ପ୍ରଶଂସା କରିଛନ୍ତି। ସେ କହିଛନ୍ତି, ଫିଲ୍ମ ଜଗତରେ ତାଙ୍କର ଯାତ୍ରା ଏକ ରୋଲର କୋଷ୍ଟର ଭଳି ହୋଇଛି। ସେ ସେହି ଲୋକମାନଙ୍କ ମଧ୍ୟରୁ ଜଣେ, ଯିଏକି ଏହି ଇଣ୍ଡଷ୍ଟ୍ରିରେ ଆସିବାର ସ୍ବପ୍ନ ଦେଖି ନ ଥିଲେ; କିନ୍ତୁ ସଲମାନଙ୍କ ଯୋଗୁ ସେ ବଲିଉଡ୍କୁ ଆସିଥିଲେ। ଏହି ସମସ୍ତ ଶ୍ରେୟ ସେ ସଲମାନଙ୍କୁ ଦେଇଛନ୍ତି। କାରଣ ସେ ତାଙ୍କୁ ଏକ ସୁଯୋଗ ଦେଇଥିଲେ। ଯେତେବେଳେ ସେ ଇଣ୍ଡଷ୍ଟ୍ରିରେ ପ୍ରବେଶ କଲେ, ସେ ଏଠାରୁ ବହୁତ କିଛି ଶିଖିଲେ ଏବଂ ବର୍ତ୍ତମାନ ମଧ୍ୟ ଶିଖୁଛନ୍ତି।
