ତେହରାନ,୨୪।୧୧: ଜଣାଶୁଣା ଅଭିନେତ୍ରୀ ହେଙ୍ଗାମହ ଗାଜିଆନିଙ୍କୁ ଇରାନ ପୋଲିସ ଗିରଫ କରିଛି। ୫୨ ବର୍ଷୀୟା ଅଭିନେତ୍ରୀ ହେଙ୍ଗାମହ ହିଜାବ ହଟାଇ ନିଜର ଭିଡିଓ ଇନଷ୍ଟାଗ୍ରାମରେ ପୋଷ୍ଟ କରିଥିବା ଅଭିଯୋଗ ହୋଇଛି। ଏହାସହ ଦେଶରେ ଚାଲିଥିବା ହିଜାବ ବିରୋଧକୁ ସମର୍ଥନ କରି ସେ ଏପରି କରିଥିଲେ। ଭିଡିଓ ଭାଇରାଲ ହେବା ପରେ ଅଭିନେତ୍ରୀଙ୍କୁ ଗିରଫ କରାଯାଇଥିଲା।
ଭିଡିଓ ପୋଷ୍ଟ କରି ହେଙ୍ଗାମହ ଲେଖିଥିଲେ, ଏହି ମୁହୂର୍ତ୍ତରୁ ମୋ ସହିତ ଯାହା ଘଟିବ, ସେଥିପାଇଁ ଇରାନ ସରକାର ଦାୟୀ, ମୁଁ ମୋର ଶେଷ ନିଶ୍ୱାସ ପର୍ଯ୍ୟନ୍ତ ଇରାନ ଲୋକଙ୍କ ସହ ଅଛି। ଭିଡିଓରେ ଏହା ସ୍ପଷ୍ଟ ଦେଖାଯାଉଛି ଯେ ଗାଜିଆନି ବିନା ହିଜାବରେ ସର୍ବସାଧାରଣ ସ୍ଥାନରେ ଠିଆ ହୋଇଛନ୍ତି।
ସୂଚନାଯୋଗ୍ୟ, ଇରାନରେ ମହିଳାମାନେ ହିଜାବ ପିନ୍ଧିବା ବାଧ୍ୟତାମୂଳକ ଏବଂ ସର୍ବସାଧାରଣ ସ୍ଥାନରେ ହିଜାବ ହଟାଇବା ଅପରାଧ ବୋଲି ବିବେଚନା କରାଯାଏ। ଯଦି କୌଣସି ମହିଳା ସର୍ବସାଧାରଣରେ ନିଜର ହିଜାବ କାଢନ୍ତି, ତେବେ ତାଙ୍କୁ କଠୋର ଦଣ୍ଡ ଦିଆଯାଇପାରେ। ମହସା ଅମିନିଙ୍କ ମୃତ୍ୟୁ ପରେ ହଜାର ହଜାର ମହିଳା ହିଜାବକୁ ବିରୋଧ କରି ରାଜରାସ୍ତାକୁ ଓହ୍ଲାଇଛନ୍ତି। ହିଜାବ ବିରୋଧ ପ୍ରଦର୍ଶନ ସମୟରେ ମହସା ଅମିନିଙ୍କୁ ଇରାନ ପୋଲିସ ଗିରଫ କରିଥିଲା। ଗିରଫ ପରେ ସେ ମୃତ୍ୟୁ ବରଣ କରିଥିଲେ। ଏହାକୁ ନେଇ ସମଗ୍ର ଇରାନରେ ପ୍ରଦର୍ଶନ ତୀବ୍ର ହୋଇଥିଲା।
