ମୁମ୍ବାଇ: ବଲିଉଡ୍ ତଥା ହଲିଉଡ୍ ଅଭିନେତ୍ରୀ ପ୍ରିୟଙ୍କା ଚୋପ୍ରାଙ୍କର ଏକ ଭିଡିଓ ଏବେ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି। ଭିଡିଓରେ ପ୍ରିୟଙ୍କା ତାଙ୍କର ପ୍ରଥମ ଦିନର ଫିଲ୍ମ କ୍ୟାରିୟର ବିଷୟରେ କହୁଛନ୍ତି। ୨୦୦୩ ମସିହାରେ ଫିଲ୍ମ ‘ଅନ୍ଦାଜ’ରେ ୪୦ଟି ଟେକ୍ ଦେବା ପରେ ମଧ୍ୟ ଶଟ୍ ଓକେ ହୋଇ ନ ଥିଲା। ଯେଉଁଥିପାଇଁ କୋରିଓଗ୍ରାଫର ତାଙ୍କୁ ସମସ୍ତଙ୍କ ସାମ୍ନାରେ ଗାଳି ଦେଇଥିଲେ।
ପ୍ରିୟଙ୍କା କହିଛନ୍ତି, ‘ମୋତେ ଏହି ଫିଲ୍ମର ଏକ ଗୀତରେ ଡ୍ୟାନ୍ସ କରିବାକୁ ପଡ଼ିଥିଲା। ତେବେ ୪୦ଟି ଟେକ୍ ପରେ ପରେ ମଧ୍ୟ ମୁଁ ଫାଇନାଲ ଶଟ୍ ଦେଇ ପାରି ନ ଥିଲି। ଫଳରେ କୋରିଓଗ୍ରାଫର ରାଜୁ ଖାନ ପ୍ରବଳ ଗାଳି ଦେଇଥିଲେ। ସେ କହିଥିଲେ, ତୁମେ ମିସ୍ ୱାଲର୍ଡ? କେବଳ ତୁମେ ଭାବୁଛ କି ତୁମେ ଜଣେ ଅଭିନେତ୍ରୀ ହୋଇପାରିବ? ଯାଅ ପ୍ରଥମେ ଡ୍ୟାନ୍ସ ଶିଖ ଏବଂ ପରେ ଅଭିନୟ କର।
ପ୍ରିୟଙ୍କା ଆହୁରି କହିଛନ୍ତି, ଏହି ଫିଲ୍ମରେ ମୁଁ ଏବଂ ଅକ୍ଷୟ ଶୁଟିଂ କରୁଥିଲୁ ସେତେବେଳେ ଟ୍ବିଙ୍କିଲ୍ ଖାନ୍ନାଙ୍କ ପ୍ରସବ ଯନ୍ତ୍ରଣା ହୋଇଥିଲା। ଏହି କାରଣରୁ କିଛି ଦିନ ପାଇଁ ଶୁଟିଂ ବାତିଲ ହୋଇଯାଇଥିଲା। ସେହି ସମୟରେ ମୁଁ ଟ୍ବିଙ୍କିଲ୍ଙ୍କ ସହ କଥାବାର୍ତ୍ତା କରିଥିଲି। ସେ ମୋତେ କଥକ ଶିଖିବାକୁ କହିଥିଲେ। ଆଉ କହିଥିଲେ, ଯଦି ତୁମର କିଛି ପାଇବାକୁ ଇଚ୍ଛା ଅଛି, ତେବେ ତୁମେ ନିଜକୁ ପ୍ରସ୍ତୁତ କର, ତୁମେ ଅନ୍ୟମାନଙ୍କ ତୁଳନାରେ ନିଜକୁ ଭଲ କରି ପାରିବ। ଏହା ପରେ ପ୍ରିୟଙ୍କା କଥକ ଗୁରୁ ଭେରୁକୃଷ୍ଣଙ୍କଠାରୁ ଶିକ୍ଷା ଗ୍ରହଣ କରିଥିଲେ।
ପ୍ରିୟଙ୍କା ବର୍ତ୍ତମାନ ସ୍ବାମୀ ନିକ୍ ଜୋନାସଙ୍କ ସହ ଆମେରିକାରେ ରହୁଛନ୍ତି। ତେବେ ଏହାପୂର୍ବରୁ ସେ ଫିଲ୍ମ ‘ମାଟ୍ରିକ୍ସ-୪’ ଶୁଟିଂ ପାଇଁ ଜର୍ମାନୀରେ ଥିଲେ। ତେବେ ତାଙ୍କୁ ଖୁବ୍ଶୀଘ୍ର ବଲିଉଡ୍ ଫିଲ୍ମ ‘ହ୍ବାଇଟ୍ ଟାଇଗର’ରେ ଦେଖିବାକୁ ମିଳିବ। ଯାହାର ନିର୍ଦ୍ଦେଶନା ଦେବେ ରମିନ ବହରାନୀ।