ଅମରପାଲି, ୩।୧୧(ଡି.ଏନ.ଏ.)
ଶୁଣିଲାନି ପ୍ରଶାସନ। ଶେଷରେ ବାଧ୍ୟ ହୋଇ ନିଜ ଅଞ୍ଚଳର ରାସ୍ତାକୁ ମରାମତି କରି ଉଦାହରଣ ସୃଷ୍ଟି କଲେ ସାମାଜିକ ସଂଗଠନ। ଏଭଳି ଦୃଶ୍ୟ ଦେଖିବାକୁ ମିଳିଛି ସୁବର୍ଣ୍ଣପୁର ଜିଲା ବୀରମହାରାଜପୁର ବ୍ଲକ ଅନ୍ତର୍ଗତ ଖଣ୍ଡହତା ଅଞ୍ଚଳରେ। ଖଣ୍ଡହତାସ୍ଥିତ ସାମାଜିକ ସଂଗଠନ ସିୟା ଖାଲଖମା ରାସ୍ତାକୁ ନିଜ ଖର୍ଚ୍ଚରେ ମରାମତି କରଛି। ମୁର୍ଷୁଣ୍ଢୀ-ସୁବଳୟାକୁ ସଂଯୋଗ କରୁଥିବା ପୂର୍ତ୍ତ ବିଭାଗ ରାସ୍ତା ଦୀର୍ଘଦିନ ହେଲା ଖରାପ ହୋଇପଡିଛି। ରାସ୍ତାର ଅନେକ ସ୍ଥାନରେ ଖାଲଖମା ହେବା ସହିତ ପିଚୁ ଉଠିଯାଇଛି। ଖଣ୍ଡହତା ନିକଟ ଚଣ୍ଡୀପୁରଠାରେ ରାସ୍ତାରୁ ପିଚୁ ସମ୍ପୂର୍ଣ୍ଣ ଉଠି ଯିବା ସହ ଆଣ୍ଠୁଏ ଲେଖାଏ ଖାଲ ହୋଇଥିଲା। ଏଠାରେ ପ୍ରାୟତଃ ଦୁର୍ଘଟଣା ଘଟୁଥିଲା। ରାସ୍ତା ଦୁରବସ୍ଥା ନେଇ ବାରମ୍ବାର ଅଞ୍ଚଳବାସୀଙ୍କ ପକ୍ଷରୁ ଅଭିଯୋଗ ହେଉଥିଲା। ତଥାପି ରାସ୍ତା ମରାମତି ନ ହେବାରୁ କିଛିଦିନ ପୂର୍ବରୁ ସିୟା ସଂଗଠନ ପକ୍ଷରୁ ସୋସିଆଲ ମିଡିଆରେ ଏ ସମ୍ପର୍କିତ ଏକ ଅଭିଯୋଗ ପ୍ରଶାସନକୁ ଅବଗତ କରାଯାଇଥିଲା। ମାତ୍ର ଅଭିଯୋଗର ୧୦ ଦିନ ପରେ ମଧ୍ୟ ଏହାର ମରାମତି ନ ହେବାରୁ ଶେଷରେ ଚାମ୍ଭୀପାଲି ଗ୍ରାମବାସୀ ଓ ସିୟା ସଂଗଠନର ସଭାପତି ଦିଲୀପ ପଧାନ, ପ୍ରତିଷ୍ଠାତା ଆନନ୍ଦ ବିଶ୍ୱାଳ, ଉପସଭାପତି ସୁଶାନ୍ତ ଭୋଇ, ଲଳିତ କର୍ଣ୍ଣ, ସାନନ୍ଦ ବିଶ୍ୱାଳ ଓ ରାମ୍ଭୀପାଲି ଗ୍ରାମର ଶ୍ରୀକାନ୍ତ ପଧାନ ପ୍ରମୁଖ ଶ୍ରମ ଓ ଆର୍ଥିକ ସହାୟତା ପ୍ରଦାନ କରି ଉକ୍ତ ରାସ୍ତା ମରାମତି କରିଛନ୍ତି। ସେମାନଙ୍କ ଏହି କାର୍ଯ୍ୟକୁ ଅଞ୍ଚଳରେ ପ୍ରଶଂସା କରାଯାଉଛି। ଏ ନେଇ ବିଭାଗୀୟ ଏଏସଇ ଅମିତ ଟୁଡୁଙ୍କୁ ପଚାରିବାରୁ ସଂଗଠନର କାମକୁ ପ୍ରଶଂସା କରିଥିଲେ ।
