ମାଲକାନଗିରି, ୪ା୧୦(ଡି.ଏନ.ଏ.):ଶୁଣିଲାନି ପ୍ରଶାସନ, ଶେଷରେ ବାଧ୍ୟ ହୋଇ ଗ୍ରାମବାସୀ ନିଜେ ରାସ୍ତା ନିର୍ମାଣ କଲେ। ଏଭଳି ଦୃଶ୍ୟ ଦେଖିବାକୁ ମିଳିଛି ମାଲକାନାଗିରି ଜିଲା ଖଇରପୁଟ ବ୍ଲକ କୁଡୁମୁଲୁଗୁମ୍ମା ପଞ୍ଚାୟତର ପଡ଼ା କୋଲାନୀ ଗ୍ରାମରେ। ପଞ୍ଚାୟତ ସଦର ମହକୁମାରଠାରୁ ମାତ୍ର ଏକ କିଲୋମିଟର ଦୂରରେ ଥିବା ଏହି ଗ୍ରାମର ଗ୍ରାମବାସୀ ପୂର୍ବରୁ ଯାତାୟାତ କରୁଥିବା ରାସ୍ତାକୁ ଆଦର୍ଶ ବିଦ୍ୟାଳୟ ହେବା ପରେ ବନ୍ଦ କରାଯାଇଥିଲା। ଫଳରେ ଗ୍ରାମକୁ ଯାତାୟାତ କରିବା କଷ୍ଟକର ହୋଇପଡିଲା। ଜରୁରୀ ସମୟରେ ଆମ୍ବୁଲାନ୍ସ କିମ୍ବା ଅନ୍ୟାନ୍ୟ ଗାଡି ମୋଟର ଯିବା ଆସିବା କରିବା ସମ୍ଭବ ହେଉ ନ ଥିଲା। ଆବଶ୍ୟକ ସମୟରେ ଗର୍ଭବତୀ ମହିଳା, ରୋଗୀ, ଛାତ୍ରୀଛାତ୍ରମାନେ ପ୍ରାୟ ସାଢ ୪ କିଲୋମିଟର ଗୁଣ୍ଡୁରିଗୁଡା ରାସ୍ତା ଦେଇ ସଦର ମହକୁମାରକୁ ଯାତାୟାତ କରୁଥିଲେ। ଯଦି କୌଣସି ଜରୁରୀ କାମ ପଡେ ତେବେ ଲୋକେ ନିକଟରେ ଥିବା ନାଳ ରାସ୍ତା ଦେଇ ଯାତାୟତ କରନ୍ତି। ଏହି ନାଳ ରାସ୍ତାଟି ଖାଲଖମାରେ ପୂର୍ଣ୍ଣ ହୋଇ ପାଣି ଥିବାରୁ ଏହି ରାସ୍ତା ଦେଇ ଯାତାୟାତ କରିବା କଷ୍ଟକର ହେଉଥଲା। ଅନ୍ୟ ଗାଁ ରାସ୍ତା ଦେଇ ଯାତାୟାତ କରିବାକୁ ହେଉଥିଲା। ସେହି ରାସ୍ତାରେ ମାଟି ପକାଯାଇଥିବାରୁ ବର୍ଷା ଦିନରେ କାଦୁଅ ହୋଇପଡିଛି। ଲୋକେ ଏହି ରାସ୍ତାରେ ଯାତାୟାତ ବେଳେ ଅସୁବିଧାର ସମ୍ମୁଖୀନ ହେଉଥିଲେ। ରାସ୍ତା ନିର୍ମାଣ ନେଇ ଦୁଇ ବର୍ଷ ତଳେ ଜନପ୍ରତିନିଧି ଓ ପ୍ରଶାସନ ଅଧିକାରୀଙ୍କୁ ବାରମ୍ବାର ଜଣାଇ ଏଯାଏ କୌଣସି ସୁଫଳ ମିଳିନାହିଁ। ଜନପ୍ରତିନିଧି ଓ ପ୍ରଶାସନ ଅଧିକାରୀମାନେ ପ୍ରତିଶ୍ରୁତି ଦେଇଥିଲେ ମଧ୍ୟ ରାସ୍ତା ନିର୍ମାଣ କରୁ ନ ଥିଲେ। ବାଧ୍ୟ ହୋଇ ଶେଷରେ ସୋମବାର ଗ୍ରାମବାସୀ ନିଜ ଉଦ୍ୟମରେ ଶ୍ରମଦାନ କରି ନିର୍ମାଣ କରିଛନ୍ତି। ଜିଲା ପ୍ରଶାସନ ଏହାକୁ ଗୁରୁତ୍ୱ ଦେଇ ତୁରନ୍ତ ଗାଁକୁ ପକ୍କା ରାସ୍ତା ନିର୍ମାଣ କରିବାକୁ ଗ୍ରାମବାସୀ ଦାବି କରିଛନ୍ତି।