ରାଉରକେଲା ଅଫିସ,୧୨।୭-ଜଣେ କରୋନା ସଂକ୍ରମିତଙ୍କୁ ମେଡିକାଲ ନେବା ଦାବିରେ ରବିବାର କୋଏଲନଗର ଅଞ୍ଚଳର କିଛି ଲୋକ ପ୍ରଶାସନକୁ ନେହୁରା ହୋଇଛନ୍ତି। ହେଲେ ସେମାନଙ୍କୁ ନିରାଶ ହେବାକୁ ପଡ଼ିଛି। ଏହାର ପ୍ରତିବାଦରେ ସେମାନେ ଝିରପାଣି ଥାନାରେ ଧାରଣା ଦେଇଛନ୍ତି।
ସେମାନେ ଅଭିଯୋଗ କରିଛନ୍ତି, ଗତ ୭ ତାରିଖରୁ ସମ୍ପୃକ୍ତ ବ୍ୟକ୍ତି କରୋନା ପଜିଟିଭ ଚିହ୍ନଟ ହୋଇଛନ୍ତି। ହେଲେ ସେ ସଙ୍ଗରୋଧରେ ନାହାନ୍ତି। ବାହାରେ ବେପରୁଆ ଭାବେ ଚଲାବୁଲା କରୁଛନ୍ତି। ଏ ନେଇ କିନ୍ତୁ ପ୍ରଶାସନ ପକ୍ଷରୁ ସ୍ଥାନୀୟ ବାସିନ୍ଦାଙ୍କୁ ସୂଚନା ଦିଆଯାଇନି। ତାଙ୍କ ଘରେ ନୋଟିସ ବି ଲଗାଯାଇ ନାହିଁ କି ତାଙ୍କୁ ମେଡିକାଲ ନିଆଯାଉ ନାହିଁ। ପାଟିତୁଣ୍ଡ କଲା ପରେ ରବିବାର ଆଣି ନୋଟିସ ଲଗାଯାଇଛି। ସଂଖ୍ୟାବହୁଳ ବରିଷ୍ଠ ନାଗରିକ ବସବାସ କରୁଥିବା ଏହି ଅଞ୍ଚଳରେ ଯଦି ସଂକ୍ରମଣ ବ୍ୟାପେ ତେବେ ପରିସ୍ଥିତି ଅଣାୟତ ହେବ। ଏଣୁ ତୁରନ୍ତ ସଂକ୍ରମିତ ବ୍ୟକ୍ତିଙ୍କୁ ଡାକ୍ତରଖାନା ନେବାକୁ ଏମାନେ ଦାବି କରିଛନ୍ତି। ଶେଷରେ ପାନପୋଷ ଉପଜିଲାପାଳ ବିଶ୍ୱଜିତ ମହାପାତ୍ର ଘଟଣାରେ ହସ୍ତକ୍ଷେପ କରିଛନ୍ତି।