ବଇଣ୍ଡା,୧୬।୧୧(ଡି.ଏନ.ଏ.)- କିଶୋରନଗର ବ୍ଲକ ବଇଣ୍ଡା ଜନତା କଲେଜକୁ ଦୂରାଦୂରାନ୍ତରୁ ବହୁ ଛାତ୍ରୀଛାତ୍ର ବସ୍ ଯୋଗେ ଯାତାୟାତ କରୁଛନ୍ତି। କଲେଜ ନିକଟରେ ବସ୍କୁ ଅପେକ୍ଷା କରିବା ପାଇଁ ପୂର୍ବରୁ ଥିବା ଏକ ବିଶ୍ରାମାଗାରକୁ ରାଜପଥ ପ୍ରଶସ୍ତୀକରଣ ପାଇଁ ଭାଙ୍ଗି ଦିଆଯାଇଥିଲା। ସେବେଠାରୁ ଛାତ୍ରୀଛାତ୍ରମାନେ ବହୁ ହଇରାଣ ହେଉଥିଲେ। ଏ ନେଇ ବାରମ୍ବାର ଠିକା ସଂସ୍ଥା ଓ ପ୍ରଶାସନ ନିକଟରେ କଲେଜ ପକ୍ଷରୁ ଅଭିଯୋଗ କରାଯାଉଥିଲା। କିନ୍ତୁ ପ୍ରଶାସନ ପଦକ୍ଷେପ ନ ନେବାରୁ ଶେଷରେ କଲେଜ କର୍ମଚାରୀମାନେ ଏକ ଅସ୍ଥାୟୀ ବିଶ୍ରାମାଗାର ନିର୍ମାଣ କରିଛନ୍ତି।
ପ୍ରକାଶ ଯେ, କଟକ-ସମ୍ବଲପୁର ୫୫ ନମ୍ବର ଜାତୀୟ ରାଜପଥର ସମ୍ପ୍ରସାରଣ କାର୍ଯ୍ୟ ଦୀର୍ଘଦିନ ହେଲା ଜାରି ରହିଛି। ଏଥିପାଇଁ ବଇଣ୍ଡା ଅଞ୍ଚଳରେ ଥିବା ବହୁ ସରକାରୀ କାର୍ଯ୍ୟାଳୟ, ଦୋକାନ ବଜାର ଉଚ୍ଛେଦ କରାଯାଇଛି। ରାଜପଥ ପାର୍ଶ୍ୱରେ ଜନତା କଲେଜ ଥିବାରୁ ଛାତ୍ରୀଛାତ୍ରଙ୍କ ପାଇଁ ଥିବା ବିଶ୍ରାମାଗାର ମଧ୍ୟ ୨ ବର୍ଷ ହେଲା ଭାଙ୍ଗି ଦିଆଯାଇଥିଲା। ଏଥିଯୋଗୁ ବସ୍କୁ ଅପେକ୍ଷା କରୁଥିବା ଛାତ୍ରୀଛାତ୍ରମାନେ ଖରା ଓ ବର୍ଷାରେ ଛିଡାହୋଇ ରହିବାକୁ ବାଧ୍ୟ ହେଉଥିଲେ। ଏକ ନୂତନ ବିଶ୍ରାମାଗାର ନିର୍ମାଣ ନିମନ୍ତେ ବହୁବାର ବ୍ଲକ ପ୍ରଶାସନ, ଜିଲା ପ୍ରଶାସନ ଓ ଠିକାସଂସ୍ଥାକୁ ଅଭିଯୋଗ କରାଯାଇଥିଲା। ଏ ନେଇ ନିରାଶ ହେବା ପରେ କଲେଜ କର୍ମଚାରୀମାନେ ଶନିବାର ଏକ ଅସ୍ଥାୟୀ ବିଶ୍ରାମଗାର ନିର୍ମାଣ କରିଛନ୍ତି। କଲେଜ ଅଧ୍ୟକ୍ଷ ସିଦ୍ଧାର୍ଥ କୁମାର ପଣ୍ଡା କହିଛନ୍ତି, ଠିକାସଂସ୍ଥା ଓ ପ୍ରଶାସନ ଅଭିଯୋଗକୁ ଗୁରୁତ୍ୱ ନ ଦେବାରୁ କର୍ମଚାରୀମାନେ ଏକ ଅସ୍ଥାୟୀ ବିଶ୍ରାମଗାର ନିର୍ମାଣ କରିଛନ୍ତି।