ତେନ୍ତୁଳିଖୁଣ୍ଟି, ୬।୨(ଡି.ଏନ୍.ଏ.):ଗରିବଙ୍କ ହିତରେ ସରକାର ଯୋଜନା ପରେ ଯୋଜନା କରୁଛନ୍ତି। କିନ୍ତୁ ସେ ସବୁର ଲାଭ ମିଳୁନି ଯୋଗ୍ୟ ହିତାଧିକାରୀଙ୍କୁ। ବିଭିନ୍ନ କାରଣରୁ ହିତାଧିକାରୀମାନେ ଏହି ସୁବିଧା ପାଇବାରୁ ବଞ୍ଚତ୍ତ ହେଉଛନ୍ତି। ଏଭଳି ଏକ ଉଦାହରଣ ନବରଙ୍ଗପୁର ଜିଲା ତେନ୍ତୁଳିଖୁଣ୍ଟି ବ୍ଲକ ପରଜାବାରଙ୍ଗ ପଦର ପଞ୍ଚାୟତ ଅଧୀନ ଖାତିଗୁଡ଼ା ଗାଁରେ ଦେଖିବାକୁ ମିଳିଛି ।
ଖାତିଗୁଡ଼ା ଗାଁରେ ବୃଦ୍ଧା ପଦ୍ମା ପ୍ରଧାନୀ (୭୮) ଝିଅ ଚଞ୍ଚଳା (୩୦)ଙ୍କ ସହ ରୁହନ୍ତି। ପଦ୍ମାଙ୍କୁ ମାସିକ ୫ଶହ ଟଙ୍କା ଭତ୍ତା ଓ ୩୫ କେଜି ଚାଉଳ ମିଳୁଛି। ଏତିକିରେ ହିଁ ୨ ପ୍ରାଣୀ ଚଳୁଛନ୍ତି। ଚଳିବାରେ ଅସୁବିଧା ହେବାରୁ ପଦ୍ମା ପର ଦୁଆରେ ଏକ କାମ କରୁଛନ୍ତି। ସେଥିରୁ ଯାହା କିଛି ଟଙ୍କା ମିଳୁଛି ସେଥିରେ ଚଳୁଛନ୍ତି ମା’ ଝିଅ। ଏବେ ଭଙ୍ଗା ଘରେ ରହୁଛୁ। ଚଳିବାକୁ ସମ୍ବଳ ପର୍ଯ୍ୟାପ୍ତ ହେଉନି। ଘର କେମିତି ମରାମତି କରିବୁ ବୋଲି ପଦ୍ମା କହିଛନ୍ତି। ଗତ ବର୍ଷ ପୁଅର ମୃତ୍ୟୁ ଘଟିଛି। ବର୍ଷାବେଳେ ମଧ୍ୟ ଭାଗ୍ୟକୁ ଆଦରି ସେହି ଭଙ୍ଗା ଘରେ ପଡି ରହିଥିଲୁ। ପଞ୍ଚାୟତ ନିର୍ବାହୀ ଅଧିକାରୀ, ବିଡିଓ, ସରପଞ୍ଚ ସଭିଙ୍କ ଦୃଷ୍ଟି ଆକର୍ଷଣ କରାଯାଇଛି। ଆବାସ ଯୋଜନାରେ ଘର ଦେବାକୁ ପ୍ରତିଶ୍ରୁତି ମିଳିଥିଲା। ଏଥିପାଇଁ ଆବଶ୍ୟକ କାଗଜପତ୍ର ମଧ୍ୟ ଦେଇଥିଲୁ। ତଥାପି ଘର ମିଳିନି ବୋଲି ପଦ୍ମା କହିଛନ୍ତି। ତେନ୍ତୁଳିଖୁଣ୍ଟି ବ୍ଲକରେ ୩ହଜାର ୩ଶହ ୪୮ ଜଣଙ୍କୁ ଆବାସ ଘର ମିଳିଛି। କିନ୍ତୁ ଏଥିରେ ପଦ୍ମାଙ୍କ ନାମ ନାହିଁ। ରାଜନୈତିକ ଦଳମାନେ ଦାବିପତ୍ର ଦେଇ, ବିକ୍ଷୋଭ କରି ନିଜ କାମ ସାରିଦେଉଛନ୍ତି। କିନ୍ତୁ ହିତାଧିକାରୀଙ୍କ ଦୁଃଖ ଯେଉଁଠି ଥିଲା ସେଇଠି। ଏ ନେଇ ବିଡିଓ
ଦୁର୍ଯ୍ୟୋଧନ ଭୋଇଙ୍କୁ ପଚାରିବାରୁ ଆମ ସ୍ତରରେ ଉଚିତ ହିତାଧିକାରୀଙ୍କ ନାମ ଯାଇଥିଲା। ଉପରସ୍ତରରେ ତାଲିକା ଛାଡିଲା ବେଳେ ଉପର ତଳ ହୋଇଯାଇଥାଇପାରେ। ପରବର୍ତ୍ତୀ ତାଲିକାରେ ନିଶ୍ଚୟ ପଦ୍ମାଙ୍କ ଭଳି ଯୋଗ୍ୟ ହିତାଧିକାରୀଙ୍କୁ ଆବାସ ଗୃହ ଯୋଗାଇ ଦିଆଯିବ ବୋଲି ସେ କହିଛନ୍ତି।
