କୋରେଇ,୨୫।୯(ସ୍ବ.ପ୍ର.): ଦୃଷ୍ଟିବାଧିତ ପ୍ରଫୁଲ୍ଲଙ୍କ ଗୀତ ମାଧ୍ୟମରେ ଗୁହାରି ଶେଷରେ ପ୍ରଶାସନ ଶୁଣିଲା। ଗୃହ ନିର୍ମାଣ ନିମନ୍ତେ ପ୍ରଶାସନ ପକ୍ଷରୁ ତାଙ୍କୁ ବ୍ୟାସନଗର ତହସିଲ ଅନ୍ତର୍ଗତ କୋରେଇ ବ୍ଲକ ରଗଡ଼ି ମୌଜାରେ ବସୁନ୍ଧରା ଯୋଜନାରେ ୪ ଡେସିମିଲ ଜମି ଯୋଗାଇ ଦିଆଯାଇଛି। ଶନିବାର ବ୍ୟାସନଗର ତହସିଲଦାର ଅଶୋକ କୁମାର ମାଝି ପ୍ରଫୁଲ୍ଲଙ୍କୁ ଡାକି ଜମି ପଟ୍ଟା ପ୍ରଦାନ କରିଛନ୍ତି। ପ୍ରଫୁଲ୍ଲ ଜଣେ ଦୃଷ୍ଟିହୀନ କଳାକାର ଭାବେ ପରିଚିତ। ରଗଡି ଅଞ୍ଚଳରେ ଦୀର୍ଘ ଦିନ ଧରି ରହି ଆସୁଛନ୍ତି। ସେ ଅନ୍ୟ ଜଣେ ଦୃଷ୍ଟିହୀନ ବାଦ୍ୟଶିଳ୍ପୀଙ୍କ ସହ ମିଶି ଗଁା ଗଁା ବୁଲି ସଙ୍ଗୀତ ପରିବେଷଣ କରୁଛନ୍ତି। ସେ ଭୂମିହୀନ ସାଙ୍ଗକୁ ଆର୍ଥିକ ଅବସ୍ଥା ଦୁର୍ବଳ ଯୋଗୁ ନିଜସ୍ବ ଖର୍ଚ୍ଚରେ ଘର ଖଣ୍ଡେ କରିବା ସମ୍ଭବ ନ ଥିଲା। ଫଳରେ ବିଭିନ୍ନ ସ୍ଥାନରେ ଆଶ୍ରୟ ନେଉଛନ୍ତି। ଜାଗା ଖଣ୍ଡେ ଯୋଗାଇ ଦେବା ପାଇଁ ବହୁବାର ପ୍ରଶାସନର ଦ୍ୱାରସ୍ଥ ହୋଇଥିଲେ ମଧ୍ୟ ଏହାର ସୁଫଳ କିଛି ପାଇ ନ ଥିଲେ। ଦୁଇଦିନ ତଳେ ସେ ଜିଲାପାଳଙ୍କୁ ସଙ୍ଗୀତ ପରିବେଷଣ ମାଧ୍ୟମରେ ଜାଗା ଖଣ୍ଡେ ଦେବା ପାଇଁ ନିବେଦନ କରିଥିଲେ। ଏହା ସୋସିଆଲ ମିଡିଆରେ ଖୁବ୍ ଭାଇରାଲ ହେବା ସହ ଚର୍ଚ୍ଚାକୁ ଆସିଥିଲା। ଅତିରିକ୍ତ ଜିଲାପାଳ ଅକ୍ଷୟ କୁମାର ମଲ୍ଲିକ ପ୍ରଫୁଲ୍ଲଙ୍କ ସମ୍ପର୍କରେ ତଥ୍ୟ ସଂଗ୍ରହ କରି ଆବଶ୍ୟକ ପଦକ୍ଷେପ ନେବାକୁ ବ୍ୟାସନଗର ତହସିଲଦାର ଓ କୋରେଇ ବିଡିଓଙ୍କୁ ନିଦ୍ଦେର୍ଶ ଦେଇଥିଲେ।