ପରିକ୍ଷିତ ସାହୁ
ବଇଣ୍ଡା,୨୦।୭ – ନିର୍ବାଚନ ଆସିଲେ ଆସୁଛନ୍ତି ନେତା। ଦେଉଛନ୍ତି ଭଳିକି ଭଳି ପ୍ରତିଶ୍ରୁତି। ଅଭିଯୋଗ ନେଇ ପ୍ରଶାସନ ନିକଟକୁ ଗଲେ କୁହାଯାଉଛି ନିଆଯିବ ପଦକ୍ଷେପ। କେଇବର୍ଷ ହେଲା କେବଳ ଏଭଳି ପ୍ରତିଶ୍ରୁତି ବ୍ୟତୀତ କିଛି ବି ହେଉନି କାର୍ଯ୍ୟ। ଏପରି କି ପକ୍କା କରିବା ତ ଦୂରର କଥା ମାଟି ମୁଠାଏ ମଧ୍ୟ ପକାଯାଇନି ଅନୁଗୋଳ ଜିଲା କିଶୋରନଗର ବ୍ଲକର ୧୦ଟି ମାଟି ରାସ୍ତାରେ। ଫଳରେ ପ୍ରତିବର୍ଷ ବର୍ଷାଦିନେ ଏସବୁ ସଡ଼କରେ ଯାତାୟାତ ଅସମ୍ଭବ ହୋଇପଡ଼ୁଛି। ଏହାକୁ ନେଇ କ୍ଷୋଭବ୍ୟକ୍ତ କରିଛନ୍ତି ସ୍ଥାନୀୟ ଅଞ୍ଚଳବାସୀ।
କିଶୋରନଗର ବ୍ଲକର ଧଡରପାଳ, ହଣ୍ଡପା, ଉରୁକୁଳା, ଆମ୍ବପାଳ, କଣ୍ଟେଇକୋଳିଆ, ନାକିଚି ଆଦି ପଞ୍ଚାୟତରେ ରହିଛି ଏହି ଅବହେଳିତ ୧୦ଟି ମାଟି ରାସ୍ତା। ବ୍ଲକର ଧଡରପାଳ ପଞ୍ଚାୟତର କତଡା ଠାରୁ ଟେନ୍ତୁଳିଖୋଳ ୫ କି.ମି. ରାସ୍ତା ଉପରେ ୨ ଶହ ଲୋକ ନିର୍ଭରଶୀଳ। ହେଲେ ରାସ୍ତା ଅବସ୍ଥା ଅତି କଦର୍ଯ୍ୟ ହୋଇପଡ଼ିଛି। ଏକ ପାହାଡକୁ କାଟି ପକ୍କା ସଡ଼କଟିଏ ନିର୍ମାଣ କରିବାକୁ ଦୀର୍ଘବର୍ଷ ହେବ ହେଉଥିବା ଦାବିକୁ ପ୍ରଶାସନ ଏଯାଏ ପୂରଣ କରିନାହିଁ। ସେହିପରି ହଣ୍ଡପା ପଞ୍ଚାୟତର ବଣିନାଳୀ ଠାରୁ ଅର୍ଜୁନଧରା ୩ କି.ମି. ରାସ୍ତାରେ ସୋଲଣ୍ଡା, ଡଙ୍ଗାଧର, ଅର୍ଜୁନଧରା ଆଦି ଗ୍ରାମର ଦେଢ଼ ହଜାର ଲୋକ ଯାତାୟାତ କରନ୍ତି। ଏହି ମାଟି ରାସ୍ତାକୁ ପକ୍କା କରିବାକୁ ୧୫ ମେ ୨୦୧୭, ୨୧ ଏପ୍ରିଲ ୨୦୧୯, ୨୦ ସେପ୍ଟେମ୍ବର ୨୦୨୦ରେ ଗ୍ରାମବାସୀ ଜିଲାପାଳ ଓ ସ୍ଥାନୀୟ ବିଧାୟକଙ୍କୁ ଦାବିପତ୍ର ଦେଇଥିଲେ। ହେଲେ ଏଯାଏ ପ୍ରଶାସନ ପଦକ୍ଷେପ ନେଇନାହିଁ। ପ୍ରତାପପୁରଠାରୁ ଭାୟା ନୂଆଁ ବାଲିଖମଣ ଦେଇ ବାଲିଖମଣ ୩ କି.ମି. ରାସ୍ତା, ପ୍ରତାପପୁର ଠାରୁ ନୂଆଁ ଖୋଲାରେଗେଡ଼ା ୨ କି.ମି. ରାସ୍ତା, ହିଞ୍ଜିରିଡା ଠାରୁ ଖୋଲା ରେଗେଡ଼ା ୪ କି.ମି. ରାସ୍ତା ଜଙ୍ଗଲ ଅଧ୍ୟୁଷିତ ଅଞ୍ଚଳରେ ରହିଛି। ବାରମ୍ବାର ଦାବି ସତ୍ତ୍ୱେ ପ୍ରଶାସନର ନଜର ଏହା ଉପରେ ପଡ଼ୁନାହିଁ। ଉରୁକୁଳା ପଞ୍ଚାୟତର ଉରୁକୁଳାରୁ ଘନପୁର ୨ କି.ମି. ରାସ୍ତା ମଧ୍ୟ ଅବହେଳାର ଶିକାର ହୋଇଛି। ଆମ୍ବପାଳ ପଞ୍ଚାୟତ ୫୫ ନମ୍ବର ଜାତୀୟ ରାଜପଥରୁ ଭାୟା ଖଇରମୁଣ୍ଡା ଦେଇ ବାଦ୍ରୀନାଳି ଗ୍ରାମକୁ ସଂଯୋଗ କରୁଥିବା ୩ କି.ମି. ରାସ୍ତାକୁ ପ୍ରଧାନମନ୍ତ୍ରୀ ସଡ଼କ ଯୋଜନାରେ ଅନ୍ତର୍ଭୁକ୍ତ କରିବା ପାଇଁ ଖଇରାମୁଣ୍ଡା ଗ୍ରାମବାସୀ ୨୧ ଏପ୍ରିଲ ୨୦୧୭ରୁ ଜିଲାପ୍ରଶାସନ ଦୃଷ୍ଟି ଆକର୍ଷଣ କରିଆସିଛନ୍ତି। କିନ୍ତୁ ଗ୍ରାମବାସୀଙ୍କ କଥାକୁ କର୍ଣ୍ଣପାତ କରାଯାଉ ନାହିଁ। ଏହି ରାସ୍ତାରେ ପଡ଼ୁଥିବା ଏକ ପୁସିଂ ବ୍ରିଜ ନିକଟରେ ୨ ଫୁଟର ବର୍ଷା ପାଣି ଗଛିତ ରହୁଥିବାରୁ ଯାତାୟାତରେ ଅସୁବିଧା ହେଉଛି। କଣ୍ଟେଇକୋଳିଆ ପଞ୍ଚାୟତର କଣ୍ଟେଇକୋଳିଆଠାରୁ ଭାୟା ଦେହୁରୀସାହି, ଦଳିତସାହି ଦେଇ ଚାରିଖମଣ ପର୍ଯ୍ୟନ୍ତ ୫ କି.ମି., ଚାରିଖମଣରୁ ଭାଲିଆତଇଳା ୩ କି.ମି. ରାସ୍ତା ଶୋଚନୀୟ ହୋଇରହିଛି। ସେହିପରି ନାକିଚି ପଞ୍ଚାୟତ କମରେଇଠାରୁ ଭାୟା ଟକବା ଦେଇ ଉଡଲ ୧୩ କି.ମି. ରାସ୍ତା ପକ୍କା କରାଯାଉନାହିଁ। ଏହି ରାସ୍ତାଟି ଜଙ୍ଗଲ ବିଭାଗ ଅଧୀନରେ ଥିବା ବେଳେ ଗ୍ରାମ୍ୟ ଉନ୍ନୟନ କିମ୍ବା ପୂର୍ତ୍ତ ବିଭାଗକୁ ହସ୍ତାନ୍ତର ହେଉନାହିଁ। ଜଙ୍ଗଲ ବିଭାଗରୁ ଅନୁମତି ମିଳୁ ନ ଥିବା ଯୋଗୁ ରାସ୍ତା ପକ୍କା କରାଯାଇ ପାରୁନାହିଁ। ଫଳରେ ଏଠାକାର ପର୍ଯ୍ୟଟନସ୍ଥଳୀକୁ ଆସୁଥିବା ପର୍ଯ୍ୟଟକମାନେ କଦର୍ଯ୍ୟ ରାସ୍ତା ଯୋଗୁ ହଇରାଣ ହରକତ ହେଉଛନ୍ତି। ଏ ନେଇ ଉଡଲ ଗ୍ରାମବାସୀ ୨୩ ମେ ୨୦୧୫ରେ ଏକ ଦାବିପତ୍ର ଜଙ୍ଗଲ ବିଭାଗର ଉଚ୍ଚଅଧିକାରୀଙ୍କୁ ଦେଇଥିବା ବେଳେ କୌଣସି ସୁଫଳ ମିଳୁନାହି। ବ୍ଳକର ଉକ୍ତ ୧୦ଟି ରାସ୍ତା ନିର୍ମାଣ ହେଉ ନ ଥିବା ସମ୍ପର୍କରେ ବିଡିଓ ଡ. ସ୍ବରୂପା ନନ୍ଦ ସାହୁ କହିଛନ୍ତି, ବ୍ଲକ ପ୍ରଶାସନ ପକ୍ଷରୁ ଉକ୍ତ ରାସ୍ତାଗୁଡିକର ବିକାଶ ପାଇଁ ପଦକ୍ଷେପ ନିଆଯିବ।