ପୁରୀ ଅଫିସ,୧୬।୪: ପୁରୀରେ ସଂକ୍ରମଣ ବଢ଼ିବା ପରେ ସହରରେ କୋଭିଡ୍ କଟକଣା ବଢ଼ିଛି। ୧୦ଦିନିଆ ଏନଫୋର୍ସମେଣ୍ଟ ଡ୍ରାଇଭ୍ରେ ପୁରୀ ସହର ଚିତ୍ର ବଦଳିଲାଣି। ପୋଲିସ ପ୍ରତି ଛକରେ ମାସ୍କ ଚେକିଂ କରୁଛି। ଶନିବାରଠାରୁ ପୁରୀରେ ନାଇଟ କର୍ଫ୍ୟୁ ଲାଗିବା ନେଇ ଯୋଜନା ହେଉଥିବା ହେତୁ ଗୁରୁବାର ସନ୍ଧ୍ୟାରେ ପୋଲିସ ପ୍ରଶାସନ ପକ୍ଷରୁ ସହରରେ ସଚେତନତା କରାଯାଇଛି। ସିଟି ଡିଏସପିଙ୍କ ନେତୃତ୍ୱରେ ସବୁ ଥାନା ଆଇଆଇସିମାନେ ସହରବାସୀଙ୍କୁ ସଚେତନ କରାଇଛନ୍ତି। ଅଯଥା ବାହାରକୁ ନ ବାହାରିବା ଓ ଗହଳି ନ କରିବା ପାଇଁ ଅପିଲ କରିଛନ୍ତି। ଅନ୍ୟପକ୍ଷରେ ପୁରୀ ସହରକୁ ପର୍ଯ୍ୟଟକଙ୍କ ଆଗମନ ଏକଦମ୍ ଠପ ହୋଇଛି। ବେଳାଭୂମିରେ ପର୍ଯ୍ୟଟକମାନଙ୍କୁ ଦେଖିବାକୁ ମିଳୁନାହିଁ। ଏପରିକି ଜିଲା ବାହାରୁ ମଧ୍ୟ ଲୋକଙ୍କ ଆଗମନ କମିବାରେ ଲାଗିଛି। ପୁରୀରେ ସଂକ୍ରମଣ ୩ ଦିନ ହେବ ବଢ଼ିବାରେ ଲାଗିଛି। ଗୁରୁବାର ୧୧୨ଜଣ ସଂକ୍ରମିତ ଚିହ୍ନଟ ହୋଇଛନ୍ତି। ସେହିଭଳି ଶ୍ରୀମନ୍ଦିର ଓ ସେବାୟତମାନଙ୍କ ସହ ସଂପୃକ୍ତ ବ୍ୟକ୍ତିମାନଙ୍କ ମଧ୍ୟରେ ସଂକ୍ରମଣର ମାତ୍ରା ଅଧିକ ରହୁଛି। ଛତିଶା ନିଯୋଗ ସହ ଶୁକ୍ରବାର ଶ୍ରୀମନ୍ଦିର ପ୍ରଶାସନ ଭିଡିଓ କନଫରେନ୍ସିଂରେ ବୈଠକ ହେବ। ଶ୍ରୀମନ୍ଦିର ଖୋଲା ରହିବ କିମ୍ବା ବନ୍ଦ ରହିବ ସେନେଇ ଆଲୋଚନା ହେବ। ଶ୍ରୀମନ୍ଦିର ମୁଖ୍ୟ ପ୍ରଶାସକ ଶ୍ରୀମନ୍ଦିର କୋଭିଡ୍ ସ୍ଥିତି ଉପରେ ପରିଚାଳନା କମିଟି ଓ ଛତିଶା ନିଯୋଗ ସହ ଆଲୋଚନା କରି ଚୂଡ଼ାନ୍ତ ନିଷ୍ପତ୍ତି ନେବେ ବୋଲି ଶ୍ରୀମନ୍ଦିର ଉନ୍ନୟନ ପ୍ରଶାସକ ଅଜୟ କୁମାର ଜେନା କହିଛନ୍ତି।
