ଦଶମନ୍ତପୁର,୧୨ା୫( ଡି.ଏନ.ଏ.): କୋରାପୁଟ ଜିଲା ଦଶମନ୍ତପୁର ବ୍ଲକ ଅନ୍ତର୍ଗତ ମୁର୍କାର ପଞ୍ଚାୟତ ଅଧୀନ ଖଣି ପ୍ରଭାବିତ ଅଞ୍ଚଳର କଡିଙ୍ଗାମାଳି ପାହାଡ଼ ପାଦଦେଶରେ ଥିବା ମାଳିଚେମା ଗ୍ରାମର ବିକାଶ ନେଇ ବହୁ ଦାବି କରିବା ପରେ ଏବେ ପ୍ରଶାସନ ଗ୍ରାମର ବିକାଶ ଲାଗି ପଦକ୍ଷେପ ନେଇଛଇ। ଗ୍ରାମରେ ବିଭିନ୍ନ ପ୍ରକଳ୍ପ କାର୍ଯ୍ୟ ଆରମ୍ଭ ହୋଇଛି। ଗ୍ରାମବାସୀ ଶ୍ରମିକ ରୂପେ କାର୍ଯ୍ୟ ପାଉଥିବା କେତେ ଜଣ ଗ୍ରାମବାସୀ କହିଛନ୍ତି। ଏହି ଗ୍ରାମରେ ବିଭିନ୍ନ ସମ୍ପ୍ରଦାୟର ୧୮୦ ପରିବାର ବସବାସ କରନ୍ତି । ଜନସଂଖ୍ୟା ୭ଶହ ରହିଛି। ୨୦୧୮ରେ କଡିଙ୍ଗାମାଳି ପାହାଡ଼ରୁ ବକ୍ସାଇଟ ଖଣି ଉତ୍ତୋଳନ ଆରମ୍ଭ କରିଥିବା ଓଏମ୍ସି ଅଞ୍ଚଳର ବିକାଶ ପାଇଁ ପ୍ରତିଶ୍ରୁତି ଦେଇ ନୀରବ ରହିଥିଲା। ପ୍ରଭାବିତ ଅଞ୍ଚଳବାସୀ ବ୍ଲକଠାରୁ ଆରମ୍ଭ କରି ଖଣି କାର୍ଯ୍ୟାଳୟ ଏବଂ ଜିଲାପାଳଙ୍କ ଦ୍ବାରସ୍ଥ ହୋଇ ଗ୍ରାମର ବିକାଶ ପାଇଁ ବାରମ୍ବାର ଦାବି କରିଥିଲେ। ଏବେ ଜିଲା ପ୍ରଶାସନ ଅଞ୍ଚଳବାସୀଙ୍କ ଦାବି ଶୁଣି ଗ୍ରାମରେ ବିଭିନ୍ନ ପ୍ରକାର ଉନ୍ନୟନମୂଳକ କାର୍ଯ୍ୟ ପାଇଁ ଜିଲା ଖଣିଜ ପାଣ୍ଠି ପକ୍ଷରୁ ଅର୍ଥ ବିନିଯୋଗ କରିଛି। ଏଥିରେ ବିଭିନ୍ନ ପ୍ରକଳ୍ପ କାର୍ଯ୍ୟ ହେଉଛି। ସେହି ପ୍ରକଳ୍ପ ମଧ୍ୟରେ ଚାଷ ପାଇଁ ଚେକ ଡ୍ୟାମ, ପକା ରାସ୍ତା , ପାନୀୟ ଜଳ ଯୋଗାଣ ଲାଗି ୬ଟି ସୋଲାର ପମ୍ପ ବୋରୱେଲ ଖନନ କରାଯାଇଛି। ସ୍କୁଲ କୋଠା, ସୁରକ୍ଷା ପାଚେରି ନିର୍ମାଣ ଭଳି ଅନ୍ୟ କେତେକ ପ୍ରକଳ୍ପ ଚାଲିଥିବା ଗ୍ରାମର ସମ୍ବାରୁ ମୁଦୁଲି , ଖଗପତି ଜାନି, ନବଘନ ଗୌଡ, ବିନୋଦ ଖୋସଲା, ଜୟରାମ ପରଜା, ଘାସି ପରଜା ପ୍ରମୁଖ କହିଛନ୍ତି।