ପ୍ରୀତିପୁର,୨୩ା୨(ଡି.ଏନ୍.ଏ.): ଯାଜପୁରର ପ୍ରାଚୀନ ସାହିତ୍ୟ, ନୃତତ୍ତ୍ବ, ପ୍ରନତ୍ତତ୍ତ୍ବ, ଭାସ୍କର୍ଯ୍ୟ, ଐତିହ୍ୟ, ସଂସ୍କୃତି ଓ ପରମ୍ପରାର ସମୃଦ୍ଧ ଇତିହାସ ଏକ ସ୍ବତନ୍ତ୍ର ମର୍ଯ୍ୟାଦା ପ୍ରଦାନ କରିଥାଏ। ଏହା ଶକ୍ତିକ୍ଷେତ୍ର ଭାବେ ସାରା ଭାରତ ବର୍ଷରେ ପ୍ରସିଦ୍ଧି ଲାଭ କରିଛି। କିନ୍ତୁ ଏବେ ବି ଅନେକ ଶୈବ ସଂସ୍କୃତି କ୍ଷେତ୍ର ଏଠାରେ ଅବହେଳିତ ହୋଇ ପଡ଼ିଛି। ସେଥିମଧ୍ୟରୁ ବିଞ୍ଝାରପୁର ଥାନା ଆଙ୍ଗାଲୋ ପଞ୍ଚାୟତରେ ଥିବା ପ୍ରାଚୀନ ଶ୍ୟାମେଶ୍ୱର ଶୈବପୀଠ ଅନ୍ୟତମ । ଏହି ପୀଠଟି ଏକ କୋଳାହଳଶୂନ୍ୟ ନିକାଞ୍ଚନ ସ୍ଥାନରେ ରହିଛି। ଉକ୍ତ ପୀଠଟି ପ୍ରଶାସନର ଦୃଷ୍ଟି ଆଢୁଆଳରେ ରହିଛି। ପୀଠରେ ଜଳ, ପରିମଳ, ଆଲୋକୀକରଣ, ରାସ୍ତା, ସୁରକ୍ଷା ପ୍ରାଚୀର, ଯାତ୍ରୀ ବିଶ୍ରାମାଗାର ବ୍ୟବସ୍ଥା ନାହିଁ। ଗ୍ରାମବାସୀଙ୍କ ଦ୍ୱାରା ଅର୍ଥ ସଂଗ୍ରହ କରାଯାଇ ପୀଠର ଉନ୍ନତି ସହ ବାବାଙ୍କ ନୀତିକାନ୍ତି ପାଳିତ ହୋଇଥାଏ। ଜାଗର ସମେତ ମୁଖ୍ୟ ପର୍ବପର୍ବାଣିରେ ହଜାର ହଜାର ଭକ୍ତଙ୍କ ସମାଗମ ହୋଇଥାଏ। ଏଠାରେ ଶ୍ରଦ୍ଧାଳୁ ଯାହା ମାନସିକ କରନ୍ତି ତାହା ଫଳପ୍ରଦ ହୁଏ ବୋଲି ବିଶ୍ୱାସ ରହିଛି। ମହାଶିବରାତ୍ରି ଦିନ ପ୍ରତ୍ୟୁଷରୁ ଶ୍ୟାମେଶ୍ୱରଙ୍କ ବଡ଼ସିଂହାର ବେଶ ଦର୍ଶନ କଲେ ପୁଣ୍ୟପ୍ରାପ୍ତି ହୋଇଥାଏ ବୋଲି କୁହାଯାଏ। ଉକ୍ତ ପୀଠରେ ପ୍ରତି ସୋମବାର ଓ ସଂକ୍ରାନ୍ତିରେ ଭକ୍ତମାନଙ୍କ ଭିଡ଼ ଲାଗିଥାଏ। ସରକାର ଉକ୍ତ ପୀଠ ପ୍ରତି ଦୃଷ୍ଟିଦେଲେ ତାହା ଦର୍ଶନୀୟ ସ୍ଥାନ ଭାବେ ପରିଚିତ ହୋଇପାରନ୍ତା ବୋଲି ସାଧାରଣରେ ମତପ୍ରକାଶ ପାଇଛି। ସ୍ଥାନୀୟ ଅଞ୍ଚଳବାସୀଙ୍କ ଦ୍ୱାରା ଏକ ଉନ୍ନୟନ ପରିଷଦ କମିଟି ଗଠନ କରାଯାଇ ଶ୍ରଦ୍ଧାଳୁଙ୍କ ଲାଗି ପାନୀୟ ଜଳ, ଆନନ୍ଦବଜାରରେ ପ୍ରସାଦ ସେବନ ବ୍ୟବସ୍ଥା କରାଯାଇଥାଏ। ତେଣୁ ଏହି ପୀଠକୁ ପର୍ଯ୍ୟଟନସ୍ଥଳୀର ମାନ୍ୟତା ସହିତ ସରକାରୀ ସହାୟତା ପ୍ରଦାନ କରିବାକୁ ଅଞ୍ଚଳବାସୀଙ୍କ ପକ୍ଷରୁ ଗୋପୀନାଥ ଦାସ, ଅଟଳ ବିହାରୀ ନାୟକ, କୈଳାସ ସାମଲ, ଅମ୍ବିକା ପ୍ରସାଦ ସାମଲ, ଆନନ୍ଦ ଚନ୍ଦ୍ର ସାମଲ, ଶରତ ଚନ୍ଦ୍ର ଜେନା, ନାଲୁ ଜେନା, ଗଜେନ୍ଦ୍ର ରାଉତ, ଦୁର୍ଯ୍ୟୋଧନ ଜେନା, ନୃସିଂହ ରାଉତ, ଅମିୟ ଧଳ, ଗୌରାଙ୍ଗ ପରିଡ଼ା, ସନାତନ ସାମଲ, ଦିଗାମ୍ବର ପରିଡ଼ା, ଅକ୍ଷୟ ସାମଲ, ଅଜିତ ସାମଲ ପ୍ରମୁଖ ଦାବି କରିଛନ୍ତି।