ଅନୁଗୋଳ ଅଫିସ୍, ୨୯ ।୪
ଅନୁଗୋଳ ଗସ୍ତରେ ଆସିଥିବା କେନ୍ଦ୍ର ଇସ୍ପାତ ମନ୍ତ୍ରୀ ରାମଚନ୍ଦ୍ର ପ୍ରସାଦ ସିଂ ଗୁରୁବାର ଜିନ୍ଦଲ୍ ଷ୍ଟିଲ୍ ଆଣ୍ଡ୍ ପାଓ୍ବାର (ଜେଏସ୍ପି) ପ୍ଲାଣ୍ଟ ପରିସରରେ ବାର୍ଷିକ ୧୪ ଲକ୍ଷ ଟନ୍ କ୍ଷମତା ବିଶିଷ୍ଟ ଟିଏମ୍ଟି ରିବାର୍ ମିଲ୍ ଉଦ୍ଘାଟନ କରିଛନ୍ତି। ଏହି ଅବସରରେ ସେ ବିଶ୍ୱର ଅନ୍ୟତମ ବୃହତ୍ତମ ଷ୍ଟିଲ୍ ନିର୍ମାଣ କମ୍ପାନୀର ଅତ୍ୟାଧୁନିକ ଷ୍ଟିଲ୍ ଛଡ଼ ଉତ୍ପାଦନ କାରଖାନା, ପୃଥିବୀର ପ୍ରଥମ କୋଲ୍ ଗ୍ୟାସିଫିକେଶନ ପ୍ଲାଣ୍ଟ ପରିଦର୍ଶନ କରିଥିଲେ। ଜେଏସ୍ପି ଚେୟାରମ୍ୟାନ୍ ନବୀନ ଜିନ୍ଦଲ, ଏମ୍ଡି ଭି.ଆର୍. ଶର୍ମା, ସିଇଓ (ଷ୍ଟିଲ୍) ଡି.କେ. ସରୋଗୀ, ଷ୍ଟିଲ୍ ମନ୍ତ୍ରଣାଳୟର ଅତିରିକ୍ତ ସଚିବ ରାଶିକା ଚୌବେ ପ୍ରମୁଖ ଉପସ୍ଥିତ ଥିଲେ।
ଏହି ଅବସରରେ ମନ୍ତ୍ରୀ ନିଜ ବକ୍ତବ୍ୟରେ କହିଲେ, ଭାରତ ହେଉଛି ବିଶ୍ୱର ଦ୍ୱିତୀୟ ଇସ୍ପାତ ଉତ୍ପାଦକାରୀ ରାଷ୍ଟ୍ର। ଏହା ଜାତୀୟ ଅର୍ଥନୀତିର ଗୁରୁତ୍ୱପୂର୍ଣ୍ଣ ଅଙ୍ଗ। ଓଡ଼ିଶାରେ ଦେଶର ସିଂହଭାଗ ଷ୍ଟିଲ୍ ଉତ୍ପାଦନ ହେଉଛି। ଏଭଳି ଏକ ମେଗା ଷ୍ଟିଲ୍ ପ୍ଲାଣ୍ଟ୍କୁ ବାସ୍ତବ ରୂପ ଦେଇଥିବାରୁ ସେ ଜେଏସ୍ପି ଚେୟାରମ୍ୟାନଙ୍କୁ ଭୂୟସୀ ପ୍ରଶଂସା କରିଥିଲେ। ଜେଏସ୍ପି ନିଜର ଷ୍ଟିଲ୍ ଉତ୍ପାଦନ କ୍ଷମତାକୁ ୨୫.୨ ଏମ୍ଟିପିଏକୁ ପରିବର୍ଦ୍ଧିତ କରିବାକୁ ଲକ୍ଷ୍ୟ ରଖିଛି। ଏହା ସଫଳ ହେଲେ ୨୦୩୦ ସୁଦ୍ଧା ଦେଶର ୧୦% ଇସ୍ପାତ କେବଳ ଅନୁଗୋଳ ଜେଏସ୍ପିରୁ ଉତ୍ପାଦନ ହେବ ବୋଲି ମନ୍ତ୍ରୀ ଆଶାବ୍ୟକ୍ତ କରିଛନ୍ତି। ସେହିପରି କୋଭିଡ୍ ମହାମାରୀ ସମୟରେ ଦେଶକୁ ତରଳ ଅମ୍ଳଜାନ ଯୋଗାଣରେ କମ୍ପାନୀ ଦେଖାଇଥିବା ପ୍ରତିବଦ୍ଧତାକୁ ସେ ଉଚ୍ଚ ପ୍ରଶଂସା କରିଛନ୍ତି।
ଏହି ଉପଲକ୍ଷେ କେନ୍ଦ୍ରମନ୍ତ୍ରୀଙ୍କ ଟିମ୍, ଇସ୍ପାତ ମନ୍ତ୍ରଣାଳୟର ବରିଷ୍ଠ ଅଧିକାରୀମାନେ କମ୍ପାନୀର କୋଲ୍ ଗ୍ୟାସିଫିକେଶନ ପ୍ଲାଣ୍ଟ (ସିଜିପି) ସମେତ ବିଭିନ୍ନ ୟୁନିଟ୍ ପରିଦର୍ଶନ କରିଥିଲେ। ଜେଏସ୍ପି ଚେୟାରମ୍ୟାନ୍ ଜିନ୍ଦଲ କହିଲେ, ଏହା ହେଉଛି ପୃଥିବୀର ଅନ୍ୟତମ ବୃହତ୍ତମ ଏବଂ ମଡର୍ନ ଷ୍ଟିଲ୍ ରିବାର ମିଲ୍। କେନ୍ଦ୍ର ଏବଂ ରାଜ୍ୟ ସରକାରଙ୍କ ପ୍ରତ୍ୟକ୍ଷ ସମର୍ଥନ ଯୋଗୁ ଏହା ସମ୍ଭବପର ହୋଇପାରିଛି। ଏହା ମାଧ୍ୟମରେ ଉନ୍ନତମାନର ଲୁହାଛଡ଼ ଉତ୍ପାଦନ କରାଯାଇପାରିବ। ଫଳରେ ପରୋକ୍ଷରେ ଲକ୍ଷାଧିକ କର୍ମନିୟୋଜନ ସୃଷ୍ଟି ହୋଇପାରିବ। ଅନ୍ୟମାନଙ୍କ ମଧ୍ୟରେ କେନ୍ଦ୍ର ଇସ୍ପାତ ମନ୍ତ୍ରୀଙ୍କ ବ୍ୟକ୍ତିଗତ ସଚିବ ନୀଲେଶ ଦେଓରେ, ଇସ୍ପାତ ରିସର୍ଚ୍ଚ ଆଣ୍ଡ୍ ଟେକ୍ନୋଲୋଜି ମିଶନ ଇଣ୍ଡିଆର ନିର୍ଦ୍ଦେଶକ ଡ. ମୁକେଶ କୁମାର ପ୍ରମୁଖ ଉପସ୍ଥିତ ଥିଲେ।