କଟକ ଅଫିସ,୧୨ା୭:ମାଟ୍ରିକ ପରୀକ୍ଷାଫଳକୁ ନେଇ ଅସନ୍ତୁଷ୍ଟ ଥିବା ପରୀକ୍ଷାର୍ଥୀଙ୍କ ନିମନ୍ତେ ଓଡ଼ିଶା ମାଧ୍ୟମିକ ଶିକ୍ଷା ପରିଷଦ(ବୋର୍ଡ) ପକ୍ଷରୁ ସୋମବାରଠାରୁ ଉତ୍ତର ଖାତା ପୁନଃ ଯାଞ୍ଚ ପାଇଁ ଆବେଦନ ପ୍ରକ୍ରିୟା ଆରମ୍ଭ ହୋଇଛି। ଆସନ୍ତା ୨୫ ତାରିଖ ପର୍ଯ୍ୟନ୍ତ ପରୀକ୍ଷାର୍ଥୀମାନେ ଅନ୍ଲାଇନ ମାଧ୍ୟମରେ ଆବେଦନ କରିପାରିବେ। ଏଥିପାଇଁ ବିଷୟ ପ୍ରତି ୧୦୦ ଟଙ୍କା ଲେଖାଏ ଆବେଦନ ଫି ଧାର୍ଯ୍ୟ କରାଯାଇଛି। ପରୀକ୍ଷାର୍ଥୀଙ୍କୁ ଉଭୟ ସବ୍ଜେକ୍ଟିଭ ଏବଂ ଅବ୍ଜେକ୍ଟିଭ ପେପର ଯାଞ୍ଚ ପାଇଁ ପୃଥକ ଭାବେ ଫି ଦେବାକୁ ପଡିବ। ସେହିଭଳି ଯଦି ଉତ୍ତରଖାତାର ଫଟୋକପି ପରୀକ୍ଷାର୍ଥୀମାନେ ନେବାକୁ ଚାହୁଁଥାନ୍ତି, ତା’ହେଲେ ୨୦୦ ଟଙ୍କା ଦେବାକୁ ହେବ। ଆବେଦନ ପ୍ରକ୍ରିୟାର ସବିଶେଷ ତଥ୍ୟ ବୋର୍ଡ ୱେବସାଇଟରେ ଦିଆଯାଇଥିବା ସମ୍ପାଦକ ଶ୍ରୀକାନ୍ତ ତରାଇ ସୂଚନା ଦେଇଛନ୍ତି।
ମାଟ୍ରିକ ପରୀକ୍ଷା ଉତ୍ତରଖାତା ଯାଞ୍ଚ ପାଇଁ ପରୀକ୍ଷାର୍ଥୀଙ୍କୁ ପ୍ରଥମେ ପଞ୍ଜୀକରଣ କରିବାକୁ ହେବ। ଯଦି ସେମାନେ ପୂର୍ବରୁ ପଞ୍ଜୀକୃତ ହୋଇଥିବେ ତା’ହେଲେ ନିଜର ପରୀକ୍ଷା ରୋଲ ନମ୍ବର ଏବଂ ପାସୱାର୍ଡ ଲଗ ଇନ୍ କରି ଆପ୍ଲିକେଶନ ଫର୍ମ ପୂରଣ କରିପାରିବେ। ଆବେଦନ ଫର୍ମରେ ନିଜର ପରୀକ୍ଷା ରୋଲ ନମ୍ବର, ମାଆଙ୍କ ନାମ, ମୋବାଇଲ ନମ୍ବର ଦାଖଲ କରିବେ। ଏହାପରେ ଉକ୍ତ ମୋବାଇଲ ନମ୍ବରକୁ ଯାଇଥିବା ଏକ ଭେରିଫିକେଶନ କୋଡକୁ ଦେବା ପରେ ସମ୍ପୃକ୍ତ ପରୀକ୍ଷାର୍ଥୀଙ୍କ ସମସ୍ତ ତଥ୍ୟ ବୋର୍ଡ ୱେବସାଇଟରେ ପ୍ରଦର୍ଶିତ ହେବ। ପରୀକ୍ଷାର୍ଥୀମାନେ ଉକ୍ତ ପେଜ୍ରେ ଯେଉଁ ବିଷୟରେ ପୁନଃ ଯାଞ୍ଚ କରିବାକୁ ଚାହୁଁଥିବେ ତାହା ଚୟନ କରିବେ। ସେହି ଅନୁଯାୟୀ ତାଙ୍କ ଅନଲାଇନ ମାଧ୍ୟମରେ ଫି ପୈଠ କରିବାକୁ ପଡିବ। ଫି ଦେବାପରେ ଆବେଦନ ପ୍ରକ୍ରିୟା ସମ୍ପୂର୍ଣ୍ଣ ହେବ ବୋଲି ବୋର୍ଡ ପକ୍ଷରୁ ମାର୍ଗଦର୍ଶିକା ଜାରି କରାଯାଇଛି। ସୂଚନାଥାଉକି, ଚଳିତବର୍ଷର ମାଟ୍ରିକ ପାସ୍ ହାର ୯୦.୫ ପ୍ରତିଶତ ରହିଥିଲା। ୫ଲକ୍ଷ ୨୬ହଜାର ୮୧୮ଜଣ ପରୀକ୍ଷାର୍ଥୀଙ୍କ ଭିତରୁ ୨ଲକ୍ଷ ୫୬ହଜାର ୮୭୭ ଛାତ୍ର ଓ ୨ଲକ୍ଷ ୬୦ହଜାର ୯୭୦ଜଣ ଛାତ୍ରୀଙ୍କୁ ମିଶାଇ ମୋଟ ୫ଲକ୍ଷ ୧୭ହଜାର ୮୪୭ଜଣ କୃତକାର୍ଯ୍ୟ ହୋଇଥିଲେ। ଯଦି ପରୀକ୍ଷାର୍ଥୀମାନେ ବୋର୍ଡ ପକ୍ଷରୁ କରାଯାଇଥିବା ମୂଲ୍ୟାୟନରେ ଅସନ୍ତୁଷ୍ଟ ଥିବେ ତା’ହେଲେ ସେମାନଙ୍କୁ ପୁନଃ ଯାଞ୍ଚ ପାଇଁ ସୁଯୋଗ ଦିଆଯିବ ବୋଲି ପୂର୍ବରୁ ବୋର୍ଡ ପକ୍ଷରୁ ଘୋଷଣା କରାଯାଇଥିଲା।