ପଦ୍ମପୁର,୨୪।୭ (ଡି.ଏନ.ଏ.)-ମହାମାରୀ କରୋନାରେ କବଳିତ ମଣିଷ ନିଜର ଜୀବନ ଜୀବିକା ହରାଇଛି। ନିମ୍ନ ମଧ୍ୟବିତ୍ତ, ଶ୍ରମିକ, ଦିନମଜୁରିଆ ପେଟ ପାଇଁ ସଂଗ୍ରାମ କରୁଛନ୍ତି। କରୋନା କଟକଣା ଛଡ଼ାଇ ନେଇଛି ବଞ୍ଚିବାର ରାହା। ସାଧାରଣ ଲୋକେ ଦୁର୍ଦ୍ଦଶା ଭୋଗୁଛନ୍ତି। ଉଠାଦୋକାନୀ, ଦିନମଜୁରିଆ, କଳାକାର ଏଥିରେ ସର୍ବାଧିକ ପ୍ରଭାବିତ ହୋଇଛନ୍ତି। ଯାହାର ଜ୍ୱଳନ୍ତ ଉଦାହରଣ ହେଉଛନ୍ତି ଯାତ୍ରା କଳାକାର। କିଏ ରାସ୍ତା କଡ଼ରେ ଚା’ ବିକିଲେଣି ତ ଆଉ କେଉଁ କଳାକାର ପରିବାର ପ୍ରତିପୋଷଣ ଲାଗି ରାସ୍ତାପାର୍ଶ୍ୱରେ ଦୋକାନ ଖୋଲିଛନ୍ତି। ହଜାର ହଜାର ଦର୍ଶକ ଟିକେଟ କାଟି ଯାହାଙ୍କ ଅଭିନୟ ଦେଖି ତାଳି ମାରୁଥିଲେ, ସେମାନେ ଆଜି ପେଟ ଚାଖଣ୍ଡକ ପାଇଁ ଅବହେଳିତ। ଏପରି ଜଣେ କଳାକାର ହେଲେ ଭଦ୍ରକ ଜିଲା ବାସୁଦେବପୁର ବ୍ଲକ ଅଧୀନ ବାଲିମେଦ ପଞ୍ଚାୟତ ଦାମୋଦରପୁର ଗ୍ରାମର ଦୀପକ କୁମାର ମହାନ୍ତି(ଦୀପୁ)। କରୋନା କଟକଣା ଯୋଗୁ ଯାତ୍ରା ବନ୍ଦ ପରେ ସେ ପରିବାର ଚଳାଇବା ପାଇଁ ନିଜ ଗାଁରେ ଏକ ତେଜରାତି ଦୋକାନ କରିଛନ୍ତି। ମୁହଁରେ ରଙ୍ଗ ବୋଳି ଅଭିନୟ କରୁଥିବା ଏହି କଳାକାରଙ୍କୁ ହାତରେ ଦଣ୍ଡି ଧରିବାକୁ ପଡ଼ିଛି।
୧୯୯୮ଠାରୁ ସାହାଣୀ ଅପେରା, ସାତଶଙ୍ଖ, ଧଉଳି, ସଚ୍ଚିଦାନନ୍ଦ, ଯାତ୍ରାଗାଁ, ରଙ୍ଗମହଲ ଭଳି ନାମୀ ଅପେରାରେ ସେ ଅଭିନୟ କରିଛନ୍ତି। ୨୩ ବର୍ଷର କଳାକାର ଜୀବନରେ ପାର୍ଶ୍ୱ ଅଭିନେତା, ନାୟକ, ଖଳନାୟକ ଭଳି ଚରିତ୍ରରେ ଅଭିନୟ କରି ପ୍ରଶଂସା ସାଉଣ୍ଟିଛନ୍ତି। ତାଙ୍କ ଅଭିନୀତ ନାଟକ କିଏ କାଚ ପୁଣି କିଏ କାଞ୍ଚନ, ମନ୍ତ୍ରୀଙ୍କ ବୋହୂ ନାଁ ନେଇ ଗଲା ଗାଁ ପିଲା, ମୁଁ ସେଇ ଭଦ୍ରିକିଆ ଟୋକା, ବଡ଼ଦାଣ୍ଡର ଭିକାରୀ ଆଦି ସର୍ବାଦୃତ ହୋଇଛି। ମହାମାରୀ ପାଇଁ ତାଙ୍କ ପେସା ପ୍ରଭାବିତ ହେବାରୁ ଧୀରେ ଧୀରେ ଆର୍ଥିକ ଅବସ୍ଥା ମାନ୍ଦା ହୋଇଯାଇଛି। ପରିବାର ଚଳାଇବା ଲାଗି ପାଖରେ ଆଉ କିଛି ସମ୍ବଳ ନାହିଁ। ସ୍ତ୍ରୀ ଓ ଦୁଇଝିଅଙ୍କୁ ନେଇ ତାଙ୍କ ପରିବାର। ଦୁଇ ଝିଅଙ୍କ ଭବିଷ୍ୟତ ନେଇ ସେ ଏବେ ଚିନ୍ତିତ। ଆଗକୁ କଟକଣା ନ ହଟିଲେ ଦୋକାନ କରି ଘର ଚଳାଇବା କଷ୍ଟକର ହୋଇପଡ଼ିବ ବୋଲି ଦୀପକ କହନ୍ତି। ସରକାର ସମସ୍ତଙ୍କ ପାଇଁ କଟକଣା କୋହଳ କରୁଥିବା ବେଳେ ଯାତ୍ରା କଳାକାରଙ୍କୁ ଉପେକ୍ଷା କରୁଛନ୍ତି। ଆଗାମୀ ଦିନରେ ସରକାର ଏଥିପ୍ରତି ଦୃଷ୍ଟି ଦେବାକୁ ସେ ନିବେଦନ କରିଛନ୍ତି।