ଅନୁଗୋଳ ଅଫିସ, ୧୪ା୬
(ଅମିତ କୁମାର ସାମଲ)
ଅନୁଗୋଳ ପ୍ରଶାସନ ପକ୍ଷରୁ ସହରରୁ ଜବରଦଖଲ ଉଚ୍ଛେଦ କରାଯାଇ ସରକାରୀ ଜାଗାକୁ ନିଜ ଅକ୍ତିଆରକୁ ଅଣାଯାଇଛି। ମଙ୍ଗଳବାର କଳାକାର ଭବନ ସହ ସେଠାରେ ଥିବା ୨ଟି ଘରକୁ ବୁଲଡୋଜର ଲଗାଇ ମାଟିରେ ମିଶାଯାଇଛି। ଏଥିସହ ୱାରିୟର୍ସ କ୍ଲବକୁ ପ୍ରଶାସନ ନିଜ ହେପାଜତକୁ ନେଇଛି।
ଅନୁଗୋଳ ଉପଜିଲାପାଳଙ୍କ ନିର୍ଦ୍ଦେଶକ୍ରମେ ଅନୁଗୋଳ ପୌର ନିର୍ବାହୀ ଅଧିକାରୀ ଗିରିଜା ଶଙ୍କର ମଲ୍ଲିକ, ଅନୁଗୋଳ ତହସିଲଦାର ଶାଶ୍ୱତ ରଞ୍ଜନ, ଆଡିଶନାଲ ତହସିଲଦାର ପ୍ରଶାନ୍ତ କୁମାର ସିଂହ, ସଦର ଆର୍ଆଇ ମିଚ୍ଛିନ୍ଦ୍ର ମଇତ୍ରୀ, ରଞ୍ଜନ ସାହୁ, ତହସିଲ କାର୍ଯ୍ୟାଳୟର ଆରଆଇ ସୁବ୍ରତ ପ୍ରଧାନ, ତାମଡା ଏନ୍ଫୋର୍ସମେଣ୍ଟ ଟିମ୍, ପୌରପାଳିକା କର୍ମଚାରୀ, ଅନୁଗୋଳ ଥାନା କର୍ମଚାରୀ ପ୍ରମୁଖ ଉଚ୍ଛେଦ କାର୍ଯ୍ୟ କରିଥିଲେ। ଦୀର୍ଘ ୩୫ ବର୍ଷ ହେବ ଅନୁଗୋଳରେ କଳାକାର ଭବନ ଗଢ଼ା ହୋଇଥିଲା। ଏହି ଅନୁଷ୍ଠାନ ପକ୍ଷରୁ ବିଭିନ୍ନ ସାମାଜିକ କାର୍ଯ୍ୟ କରି ପ୍ରଶଂସା ମଧ୍ୟ ସାଉଁଟିଥିଲା। କିନ୍ତୁ ସରକାରୀ ଜାଗାରେ ଉକ୍ତ ଗୃହ ନିର୍ମାଣ ହୋଇଥିବାବେଳେ କୌଣସି କାଗଜପତ୍ର ନ ଥିଲା। ତେଣୁ ଉକ୍ତ ଘରକୁ ପ୍ରଶାସନ ପକ୍ଷରୁ ଉଚ୍ଛେଦ କରାଯାଇଛି। ଏଥିସହ କଳାକାର ଭବନ ଆଗରେ ଜବରଦଖଲରେ ଥିବା ୨ଟି ଘରକୁ ମଧ୍ୟ ଭାଙ୍ଗି ଦିଆଯାଇଛି। ୱାରିୟର୍ସ କ୍ଲବକୁ ନେଇ ବିଭିନ୍ନ ସମୟରେ ପ୍ରଶାସନ ନିକଟରେ ଅଭିଯୋଗ ହୋଇଥିଲା। ତେଣୁ ଏହାକୁ ପ୍ରଶାସନ ନିଜ ଅକ୍ତିଆରକୁ ନେଇଛି। ସେଠାରେ ୱାର୍ଡ ଅଫିସ୍ କରାଯିବ ବୋଲି ପୌର ପ୍ରଶାସନ ପକ୍ଷରୁ ସୂଚନା ପ୍ରଦାନ କରାଯାଇଛି। ତେବେ କଳାକାର ଭବନ ଉଚ୍ଛେଦ ନେଇ ଅନୁଷ୍ଠାନ ସଭାପତି ଭୂପେଶ ଚନ୍ଦ୍ର ପ୍ରଧାନ କହିଛନ୍ତି, ସରକାରୀ ଜାଗାକୁ ଲିଜ୍ ଆକାରରେ ନେଇ ଚଳାଇବାକୁ ସଙ୍ଗଠନ ନିକଟରେ ସମ୍ବଳ ନ ଥିଲା। ତତ୍କାଳନୀ ଜିଲାପାଳ ସେ ସମୟରେ ଜାଗା ଖଣ୍ଡେ ଦେଇଥିଲେ। ଏଥିରେ ବିଭିନ୍ନ କାର୍ଯ୍ୟକ୍ରମ କଳାକାରଙ୍କ ପକ୍ଷରୁ କରାଯାଉଥିଲା। ପୌର ନିର୍ବାହୀ ଅଧିକାରୀ ଗିରିଜା ଶଙ୍କର ମଲ୍ଲିକ କହିଛନ୍ତି, ସରକାରୀ ଜାଗାରେ ନିର୍ମାଣ ହୋଇଥିବା ଜବରଦଖଲ ଉଚ୍ଛେଦ କରାଯିବ। ଯେଉଁମାନଙ୍କ ନିକଟରେ ଉପଯୁକ୍ତ କାଗଜପତ୍ର ନାହିଁ, ତାଙ୍କଠାରୁ ଜାଗା ସରକାରୀ ଖାତାକୁ ଫେରାଇ ଅଣାଯିବ।