ଭୁବନେଶ୍ୱର, ୨୨ା୧୨(ବ୍ୟୁରୋ): ଏକ ଘରୋଇ ବ୍ୟାଙ୍କର ଆସିଷ୍ଟାଣ୍ଟ ମ୍ୟାନେଜର ବିଭିନ୍ନ ଗ୍ରାହକଙ୍କ ଆକାଉଣ୍ଟରୁ ୧ କୋଟି ୧୬ ଲକ୍ଷ ଟଙ୍କାର ଲୋନ୍ ଉଠାଇନେଇଛନ୍ତି। ଜଣେ ଅବସରପ୍ରାପ୍ତ ସରକାରୀ କର୍ମଚାରୀଙ୍କ ଫିକ୍ସ ଡିପୋଜିଟ୍ରୁ ୭ଲକ୍ଷ ଟଙ୍କା ଲୋନ୍ ନେଇଥିବା ଜଣାପଡ଼ିବା ପରେ ଘଟଣା ପଦାକୁ ଆସିଛି। ଠକାମିର ଶିକାର ହୋଇଥିବା ଭୁବନେଶ୍ୱର ଘାଟିକିଆର ଅବସରପ୍ରାପ୍ତ ସରକାରୀ କର୍ମଚାରୀ ହୃଷିକେଶ ଭୁଜବଳଙ୍କ ଅଭିଯୋଗକ୍ରମେ ଭରତପୁର ଥାନା ପୋଲିସ ବ୍ୟାଙ୍କର ପୂର୍ବତନ ଆସିଷ୍ଟାଣ୍ଟ ମ୍ୟାନେଜରଙ୍କୁ ଗିରଫ କରି ମଙ୍ଗଳବାର କୋର୍ଟ ଚାଲାଣ କରିଛି। ସେ ହେଲେ ଭରତପୁର ଥାନା ଅଧୀନ ମହାଲକ୍ଷ୍ମୀ ବିହାରରେ ରହୁଥିବା ମୟୂରଭଞ୍ଜ ଜିଲା ବାରିପଦା ଥାନା ଅଞ୍ଚଳର ନୀନା ନାଏକ (୪୦)। ତାଙ୍କଠାରୁ ଠକେଇ ସମ୍ପର୍କିତ ବହୁ ଗୁରୁତ୍ୱପୂର୍ଣ୍ଣ କାଗଜପତ୍ର ଜବତ ହୋଇଛି। ପୋଲିସ ଏନେଇ ଅଧିକ ତଦନ୍ତ ଜାରି ରଖିଛି। ଠକାମିର ଶିକାର ହୋଇଥିବା ଅନେକ ଗ୍ରାହକ ଆଗକୁ ଅଭିଯୋଗ କରିବେ ବୋଲି ତଦନ୍ତକାରୀ ଅଫିସର ବିଜୟ ଦାଶ କହିଛନ୍ତି।
ସୂଚନା ଅନୁଯାୟୀ, ହୃଷିକେଶ ନିଜର ଅବସରକାଳୀନ ପ୍ରାପ୍ୟ(ପେନ୍ସନ୍) ରାଶି ୧୦ଲକ୍ଷ ଟଙ୍କାକୁ ଅକ୍ଟୋବର ୧୬ରେ ଘାଟିକିଆସ୍ଥିତ ଏକ ଘରୋଇ ବ୍ୟାଙ୍କ ଶାଖାରେ ଫିକ୍ସ ଡିିପୋଜିଟ୍ କରିଥିଲେ। ଏହି ବ୍ୟାଙ୍କର ଆସିଷ୍ଟାଣ୍ଟ ମ୍ୟାନେଜର ମୀନା ଉକ୍ତ ଟଙ୍କାରୁ ୭ଲକ୍ଷ ଟଙ୍କା ଲୋନ୍ ଉଠାଇ ନିଜ ସମ୍ପର୍କୀୟଙ୍କ ଆକାଉଣ୍ଟକୁ ଟ୍ରାନ୍ସଫର କରିଦେଇଥିଲେ। ହୃଷିକେଶ ବ୍ୟାଙ୍କ ଆସି ବୁଝିବାରୁ ଉକ୍ତ ଟଙ୍କାରୁ ଲୋନ୍ ହୋଇଥିବା ଜାଣିବାକୁ ପାଇଥିଲେ। ତେବେ ସେ କୌଣସି ଲୋନ୍ ନେଇ ନ ଥିବା ଉପରିସ୍ଥ ଅଧିକାରୀଙ୍କୁ ଜଣାଇଥିଲେ। ପରେ ଯାଞ୍ଚ କରାଯିବାରୁ ଆସିଷ୍ଟାଣ୍ଟ୍ ମ୍ୟାନେଜର ମୀନା ବ୍ୟାଙ୍କ ଚେକ୍ରେ ଦସ୍ତଖତ ନେଇ ଟଙ୍କା ହଡପ କରିଥିବା ଜଣାପଡ଼ିଥିଲା। ଏହାପରେ ତାଙ୍କୁ ତୁରନ୍ତ କାର୍ଯ୍ୟରୁ ନିଲମ୍ବିତ କରାଯାଇଥିଲା। ତେବେ ବ୍ୟାଙ୍କ ପକ୍ଷରୁ ଅଡିଟ୍ କରାଯିବା ପରେ ମୀନା ଏହିପରି ଅନେକ ଗ୍ରାହକଙ୍କ (ଫିକ୍ସ ଡ଼ିପୋଜିଟ୍, ପେନସନ୍ ଆକାଉଣ୍ଟ, ଗୋଲ୍ଡ ଲୋନ୍) ଆକାଉଣ୍ଟରୁ ୧ କୋଟି ୧୬ଲକ୍ଷ ୮୭ହଜାର ଟଙ୍କା ଉଠାଇନେଇଥିବା ବ୍ୟାଙ୍କ କର୍ତ୍ତୃପକ୍ଷ ଜାଣିବାକୁ ପାଇଥିଲେ। ତେବେ ବ୍ୟାଙ୍କ ପକ୍ଷରୁ ଟଙ୍କା ଫେରାଇ ଦିଆଯିବ ବୋଲି ହୃଷିକେଶଙ୍କୁ କୁହାଯାଇଥିଲା। ମାତ୍ର ଟଙ୍କା ନ ମିଳିବାରୁ ସେ ସୋମବାର ଥାନାରେ ଅଭିଯୋଗ କରିଥିଲେ। ଏହାପରେ ପୋଲିସ ଏକ ମାମଲା (ନଂ.୪୩୯/୨୧) ରୁଜୁ କରି ତଦନ୍ତ ଆରମ୍ଭ କରିଥିଲା।