ସିଡ୍ନୀ, ୨୪ା୮ (ଏପି)-ଅଷ୍ଟ୍ରେଲିଆ କ୍ରିକେଟ ଦଳ ରବିବାର ଇଂଲଣ୍ଡ ଅଭିମୁଖେ ଯାତ୍ରା କରିଛି। ଦଳ ଏହି ଦେଶରେ ତିନୋଟି ଦିନିକିଆ ଏବଂ ସମାନ ସଂଖ୍ୟକ ଅନ୍ତର୍ଜାତୀୟ ଟି୨୦ ଖେଳିବ। ମ୍ୟାଚ ବେଳେ ଷ୍ଟାଡିୟମରେ ଦର୍ଶକ ଉପସ୍ଥିତ ରହିବେ ନାହିଁ। ଜୈବ ସୁରକ୍ଷା ନିୟମକୁ କଡ଼ାକଡି ଭାବେ ପାଳନ କରାଯିବ। କରୋନା ମହାମାରୀ ଦେଖାଦେବା ପରଠାରୁ ଅଷ୍ଟ୍ରେଲିଆର ପ୍ରଥମ ଜାତୀୟ କ୍ରୀଡ଼ା ଦଳ ଭାବେ ବିଦେଶ ଗସ୍ତ କରିଛି। ମାର୍ଚ୍ଚ ୧୩ ନ୍ୟୁଜିଲାଣ୍ଡ ବିପକ୍ଷ ଏକ ଦିନିକିଆ ସିରିଜର ବାତିଲ ପରଠାରୁ ଅଷ୍ଟ୍ରେଲିଆ ଏପର୍ଯ୍ୟନ୍ତ ଗୋଟିଏ ହେଲେ ମ୍ୟାଚ ଖେଳିନାହିଁ। ଅଧିନାୟକ ଷ୍ଟିଭ ସ୍ମିଥ୍ ରବିବାର ସିଡ୍ନୀରୁ ପର୍ଥ ଯାତ୍ରା କରିଥିଲେ। ସେଠାରୁ ଅଷ୍ଟ୍ରେଲିଆ ଦଳ ସହ ସେ ଏକ ସ୍ବତନ୍ତ୍ର ବିମାନରେ ଲଣ୍ଡନ ଗସ୍ତ କରିଛନ୍ତି। ପରିବେଶ ଯାହା ହେଉ ନା କାହିଁକି ସେ ପୁଣି ଥରେ ଦେଶ ତରଫରୁ ଖେଳିବା ଲାଗି ତାଙ୍କର ଖୁବ୍ ଉତ୍କଣ୍ଠା ରହିଛି। ଷ୍ଟାଡିୟମରେ ଦର୍ଶକ ଉପସ୍ଥିତ ରହୁଥିବାରୁ ସ୍ମିଥ୍ ଦୁଃଖ ପ୍ରକାଶ କରିଛନ୍ତି, ବିଶେଷ କରି ଯେଉଁମାନେ ବଲ୍ ଟ୍ୟାମ୍ପରିଂ ମାମଲାରେ ନିଲମ୍ବନ ପରେ ତାଙ୍କୁ ପରିହାସ କରୁଥିଲେ। ତେବେ ଟିଭିରେ ତାଙ୍କ ଖେଳ ଉପରେ ଅନେକଙ୍କ ନଜର ରହିବ। ଦକ୍ଷିଣ ଆଫ୍ରିକାରେ ବଲ୍ ଟ୍ୟାମ୍ପରିଂ ଘଟଣାରେ ୧୨ ମାସ ସସ୍ପେଣ୍ଡ ରହିବା ପରେ ଗତବର୍ଷ ଟେଷ୍ଟକୁ ପ୍ରତ୍ୟାବର୍ତ୍ତନ ସମୟରେ ଇଂଲଣ୍ଡ ସମର୍ଥକମାନେ ସ୍ମିଥ୍ଙ୍କୁ ଲକ୍ଷ୍ୟ କରି ବିଦ୍ରୂପ କରିଥିଲେ। ଏହାର ପ୍ରତିକ୍ରିୟାରେ ସେହି ବର୍ଷ ଆଶେସ ସିରିଜରେ ଅଷ୍ଟ୍ରେଲୀୟ କ୍ରିକେଟର ୧୧୦ ଆଭରେଜରେ ୭୭୪ରନ ସଂଗ୍ରହ କରି ସେମାନଙ୍କୁ ଚୁପ୍ କରିଦେଇଥିଲେ। ଓ୍ବେଷ୍ଟଇଣ୍ଡିଜ ଓ ପାକିସ୍ତାନ ବିପକ୍ଷରେ ଟେଷ୍ଟ ସିରିଜ ଖେଳିଥିବାରୁ ଇଂଲଣ୍ଡ ଫାଇଦାରେ ରହିବ। ଅଷ୍ଟ୍ରେଲିଆ ୩ ମାସ ହେବ ଅନ୍ତର୍ଜାତୀୟ କ୍ରିକେଟରେ ଅନୁପସ୍ଥିତ ରହିଥିଲେ ମଧ୍ୟ ଏଥିଲାଗି ଆମେ ଚିନ୍ତିତ ନୋହୁ ବୋଲି ସ୍ମିଥ୍ କହିଛନ୍ତି। ଅଷ୍ଟ୍ରେଲିଆର ୨୧ ଜଣିଆ ଦଳ ଇଂଲଣ୍ଡ ଗସ୍ତ କରିଛନ୍ତି। ଦଳ ସାଉଥାମ୍ପଟନରେ ଡେରା ପକାଇବ। ଦୁଇ ସପ୍ତାହ କ୍ୱାରାଣ୍ଟାଇନ୍ରେ ରହିବ ବେଳେ ୫ଟି ଇଣ୍ଟର ସ୍କ୍ବାଡ୍ ମ୍ୟାଚ ଖେଳିବେ। ବାୟୋସିକ୍ୟୁରିଟି ବବଲ ପରିବେଶରେ ଏହା ଅନୁଷ୍ଠିତ ହେବ। ଖେଳାଳିମାନେ ଗଲ୍ଫ ଖେଳି ପାରିବେ। ହେଲେ ଡ୍ରିଙ୍କ୍ସ କିମ୍ବା ଭୋଜନ ପାଇଁ ହୋଟେଲ ବାହାରକୁ ଯାଇ ପାରିବେ ନାହିଁ। ହୋଟେଲ କର୍ମଚାରୀଙ୍କ ସହ ବାର୍ତ୍ତାଳାପ ଏଡାଇବା ଲାଗି ସେମାନଙ୍କୁ ନିଜ ଶଯ୍ୟା ପ୍ରସ୍ତୁତ କରିବାକୁ ପଡ଼ିବ। ଜୈବସୁରକ୍ଷା ନିୟମ ଉଲ୍ଲଂଘନ କଲେ ସମ୍ପୃକ୍ତ ଖେଳାଳି ସିରିଜରେ ଖେଳିବାରୁ ବଞ୍ଚତ୍ତ ହେବେ। ପ୍ରଥମ ତିନୋଟି ଟି୨୦ ସାଉଥାମ୍ପଟନର ରୋଜ୍ ବାଓଲଠାରେ ସେପ୍ଟେମ୍ବର ୪ରୁ ଆରମ୍ଭ ହେବ। ମାଞ୍ଚେଷ୍ଟରର ଓଲ୍ଡ ଟ୍ରାଫୋର୍ଡଠାରେ ଦିନିକିଆ ସିରିଜ ସେପ୍ଟେମ୍ବର ୧୦ରୁ ଆରମ୍ଭ ହେବ।
