ଅନୁଗୋଳ ଅଫିସ, ୧୩ା୯: ଅନୁଗୋଳ ଜିଲା ମୁଖ୍ୟ ଚିକିତ୍ସାଳୟରେ କେବଳ ଗଣେଶ ପୂଜା ହେବ। କୌଣସି ଭୋଜି ହୋଇପାରିବ ନାହିଁ ବୋଲି କର୍ତ୍ତୃପକ୍ଷଙ୍କ ନିର୍ଦ୍ଦେଶ ଥିଲା। ହେଲେ ଏହାକୁ ଉଲ୍ଲଂଘନ କରାଯାଇ ୨ ଥର ଭୋଜି ହେଲା। କେତେଜଣ କର୍ମଚାରୀ ଏହି ଭୋଜି କରିଥିବା ବେଳେ ଏକ ଠିକା ସଂସ୍ଥା ପକ୍ଷରୁ ସମସ୍ତ ଖର୍ଚ୍ଚ ବହନ କରାଯାଇଥିଲା। ଏଥିରୁ ଉକ୍ତ ଠିକା ସଂସ୍ଥା ଓ ମେଡିକାଲର ସମ୍ପୃକ୍ତ କର୍ମଚାରୀମାନଙ୍କ ମଧ୍ୟରେ କିଛି ଭିତିରି ସମ୍ପର୍କ ରହିଥିବା ଚର୍ଚ୍ଚା ହେଲା। ଏ ନେଇ ଖବର ପ୍ରକାଶ ପରେ ମେଡିକାଲ କର୍ତ୍ତୃପକ୍ଷ ତଦନ୍ତ ନିର୍ଦ୍ଦେଶ ଦେଇଥିଲେ। ହେଲେ କାର୍ଯ୍ୟାନୁଷ୍ଠାନ ନିଆଯିବା ପରିବର୍ତ୍ତେ ତଦନ୍ତରେ ସମ୍ପୃକ୍ତ କର୍ମଚାରୀମାନଙ୍କୁ କର୍ତ୍ତୃପକ୍ଷ ଘଣ୍ଟ ଘୋଡ଼ାଇଥିବା ଜଣାପଡ଼ିଛି। ଫଳରେ ମେଡିକାଲ କର୍ତ୍ତୃପକ୍ଷଙ୍କ ଅଭିମୁଖ୍ୟକୁ ନେଇ ସାଧାରଣରେ ପ୍ରଶ୍ନବାଚୀ ସୃଷ୍ଟି ହୋଇଛି।
ପ୍ରକାଶ ଯେ, ଗତ ଗଣେଶପୂଜାରେ ମେଡିକାଲରେ କୌଣସି ଭୋଜି ହୋଇପାରିବ ନାହିଁ ବୋଲି ଜିଲା ମୁଖ୍ୟ ଚିକିତ୍ସା ଅଧିକାରୀ ଡା. ତ୍ରିଲୋଚନ ପ୍ରଧାନ ନିର୍ଦ୍ଦେଶ ଦେଇଥିଲେ। ହେଲେ ପୂଜା ପରେ ୭ ତାରିଖ ବୁଧବାର ଓ ୯ ତାରିଖ ଶୁକ୍ରବାର ଆମିଷ ବାର ଦେଖି କେତେଜଣ କର୍ମଚାରୀ ଭୋଜି କରିଥିଲେ। ମେଡିକାଲ ପରିସର ରୋଗୀ କଲ୍ୟାଣ ସମିତିକୁ ଲାଗି କରି ଥିବା ଘର ଭିତରେ ରୋଷେଇ ହୋଇଥିଲା। ବଜାରରୁ ଖଲି ଆଣି ଖାଇବା ବଢ଼ାଯାଇଥିଲା। ପଲିଥିନରେ ବାନ୍ଧି କେତେଜଣ ଅଧିକାରୀଙ୍କ ଘରକୁ ପଠାଯାଇଥିଲା। ଏକ ଠିକା ସଂସ୍ଥା ପକ୍ଷରୁ ଏହାର ସମସ୍ତ ଆୟୋଜନ କରାଯାଇଥିବା ସିସିଟିଭି ଫୁଟେଜ୍ରେ ଦୃଶ୍ୟ କଏଦ ହୋଇ ରହିଥିବା ଚର୍ଚ୍ଚା ହୋଇଥିଲା। ମୁଖ୍ୟ ଚିକିତ୍ସା ଅଧିକାରୀଙ୍କ ନିର୍ଦ୍ଦେଶକୁ ଏପରି ଉଲ୍ଲଂଘନ କରାଯିବା ସମ୍ପର୍କରେ ଖବର ପ୍ରକାଶ ପାଇବା ପରେ ଏଡିଏମ୍ଓ(ମେଡିକାଲ)ଙ୍କୁ ତଦନ୍ତ ନିର୍ଦ୍ଦେଶ ଦିଆଯାଇଥିଲା। ହେଲେ ତଦନ୍ତରେ କର୍ମଚାରୀଙ୍କୁ ସୁରକ୍ଷା ଦିଆଯାଇଛି। ରୋଷେଇ ନୁହେଁ ହୋଟେଲରୁ ଖାଦ୍ୟ ମଗାଇ ଖିଆଯାଇଛି ବୋଲି କୁହାଯାଇଛି। ଏ ସମ୍ପର୍କରେ ଜିଲା ମୁଖ୍ୟ ଚିକିତ୍ସା ଅଧିକାରୀ ଡା. ପ୍ରଧାନଙ୍କୁ ଯୋଗାଯୋଗ କରାଯାଇଥିଲେ ମଧ୍ୟ ସେ ମେଡିକାଲରେ ଭୋଜି ହୋଇପାରିବ ନାହିଁ ବୋଲି ନିର୍ଦ୍ଦେଶ ଦିଆଯାଇଥିବା କହି ପ୍ରସଙ୍ଗକୁ ଏଡ଼ାଇ ଯାଇଥିଲେ।
