ପୁରୀ ଅଫିସ, ୨୪।୫: ମହାପ୍ରଭୁଙ୍କ ବିଶ୍ୱପ୍ରସିଦ୍ଧ ଘୋଷଯାତ୍ରା ପାଇଁ ଶ୍ରୀନଅରସ୍ଥିତ ଅସ୍ଥାୟୀ ରଥଖଳାରେ ତିନି ରଥର ନିର୍ମାଣ କାମ ଜାରି ରହିଛି। ମହାରଣା ସେବକ ଓ ଭୋଇ ସେବକମାନେ ନିଜ ନିଜ କାର୍ଯ୍ୟରେ ବ୍ୟସ୍ତ ଅଛନ୍ତି। ବଡ଼ଦାଣ୍ଡରେ ନିର୍ମାଣାଧୀନ ତିନିରଥ ଦଣ୍ଡାୟମାନ ରହିଛି। ଏଭଳି ସମୟରେ ମଙ୍ଗଳବାର ଏକ ଅଘଟଣ ଦେଖିବାକୁ ମିଳିଛି। ମା’ ସୁଭଦ୍ରାଙ୍କ ଦର୍ପଦଳନ ରଥକୁ ଏକ ବ୍ୟାଟେରିଚାଳିତ ଅଟୋ ଧକ୍କା ଦେଇଛି। ଗାଡ଼ିଟି ନିୟନ୍ତ୍ରଣ ହରାଇ ରଥ ଆଗ ଚକର ଅଖକୁ ଧକ୍କା ଦେଇଥିଲା। ରଥର ଅଖ ଗାଡ଼ିର କାଚରେ ମାଡ଼ ହେବାରୁ କାଚ ଭାଙ୍ଗିଯାଇଥିଲା। ତେବେ ଦୁର୍ଘଟଣାରେ କେହି ଆହତ ହୋଇନାହାନ୍ତି। ଗାଡ଼ି ବୁଲାଇବାବେଳେ ଚାଳକଙ୍କ ଅସାବଧାନତାରୁ ଏଭଳି ଘଟଣା ଘଟିଥିବା ଜଣାପଡ଼ିଛି। ସୂଚନାଯୋଗ୍ୟ, ଶ୍ରୀମନ୍ଦିର ପ୍ରଶାସନ ପକ୍ଷରୁ ଦିବ୍ୟାଙ୍ଗ ଓ ବରିଷ୍ଠ ଭକ୍ତମାନଙ୍କୁ ଶ୍ରୀମନ୍ଦିର ନିକଟରୁ ଶ୍ରୀଜଗନ୍ନାଥ ବଲ୍ଲଭ ପାଂର୍କି ପର୍ଯ୍ୟନ୍ତ ନେବା ଆଣିବା ପାଇଁ ବ୍ୟାଟେରିଚାଳିତ ଅଟୋର ବ୍ୟବସ୍ଥା କରାଯାଇଛି। ତନ୍ମଧ୍ୟରୁ ଗୋଟିଏ ଅଟୋ ଏହି ଦୁର୍ଘଟଣା ଘଟାଇଛି।