ଭୁବନେଶ୍ୱର, ୬।୧୧(ବ୍ୟୁରୋ): ରାଜ୍ୟ ଚଳଚ୍ଚିତ୍ର ପୁରସ୍କାର ଘୋଷଣା ସମୟରେ ଜୁରି ଅଧ୍ୟକ୍ଷ ଥିବା ସୁରେନ୍ଦ୍ର ସାହୁ ସରକାରଙ୍କ ନିକଟରେ ୫ଟି ପ୍ରସ୍ତାବ ରଖିଛନ୍ତି। ସେ କହିଛନ୍ତି, ଚଳଚ୍ଚିତ୍ର ଜଗତରେ ଜୀବନବ୍ୟାପୀ ସାଧନା ପାଇଁ ‘ଶ୍ରୀ ଜୟଦେବ ସମ୍ମାନ’ ପ୍ରଦାନ କରାଯାଉଛି। ତେବେ ଜୟଦେବଙ୍କର ସିନେମା ସହ କୌଣସି ସମ୍ପର୍କ ନାହିଁ। ତେଣୁ ଭାରତୀୟ ସିନେମାର ଜନକ ଦାଦା ସାହେବ ଫାଲ୍କେଙ୍କ ପରି ଓଡ଼ିଆ ଚଳଚ୍ଚିତ୍ର ଜନକ ‘ମୋହନ ସୁନ୍ଦର ଦେବ ଗୋସ୍ବାମୀ’ଙ୍କ ନାମରେ ଜୟଦେବ ପୁରସ୍କାର ନାମିତ କରାଯାଉ। ସେହିପରି ଶ୍ରେଷ୍ଠ ଚଳଚ୍ଚିତ୍ରକୁ ‘ମୋହନ ସୁନ୍ଦର ଦେବ ଗୋସ୍ବାମୀ ପୁରସ୍କାର’ ବଦଳରେ ‘କବିଚନ୍ଦ୍ର କାଳିଚରଣ ପଟ୍ଟନାୟକ ପୁରସ୍କାର’ କରାଯାଉ। ଏହାବ୍ୟତୀତ ପୁରସ୍କାର ଚୟନ ପାଇଁ ଏକ ସ୍ବତନ୍ତ୍ର ମନୋନୟନ କମିଟି ଗଠନ କରି ସେଥିରେ ଏହି ପୁରସ୍କାରପ୍ରାପ୍ତ ଜଣେ ଚଳଚ୍ଚିତ୍ର ବ୍ୟକ୍ତିତ୍ୱଙ୍କୁ ଅଧ୍ୟକ୍ଷ ଏବଂ ଓଡ଼ିଆ ଚଳଚ୍ଚିତ୍ରରେ ସମ୍ପୃକ୍ତ ଆଉ ୨ଜଣ ବରିଷ୍ଠ ବ୍ୟକ୍ତିଙ୍କୁ ସଦସ୍ୟ ରଖାଯାଉ। ପଦ୍ମଶ୍ରୀ ପରି ଏହି ପୁରସ୍କାର ପାଇଁ ମଧ୍ୟ ବିଜ୍ଞାପନ ମାଧ୍ୟମରେ ଆବେଦନ ବ୍ୟବସ୍ଥା ରହୁ। ଏଥିସହ ରାଜ୍ୟ ଚଳଚ୍ଚିତ୍ର ପୁରସ୍କାର ପାଇଁ ଆସୁଥିବା ଚଳଚ୍ଚିତ୍ରଗୁଡିକୁ ଓଡ଼ିଆ ଚଳଚ୍ଚିତ୍ର ଅଭିଲେଖାଗାରରେ ରଖିବା ପାଇଁ ପ୍ରଯୋଜକଙ୍କ ପାଖରୁ ଆବେଦନବେଳେ ଏକ ଘୋଷଣାନାମା ରଖାଯାଉ, ଯାହାକୁ ଆଗାମୀ ଦିନରେ ଗବେଷଣା ପାଇଁ ସାହାଯ୍ୟ କରିବ।