ନୂଆପଡ଼ା ଅଫିସ,୧୯।୫: କରୋନାର ଦ୍ୱିତୀୟ ଲହରରେ ଦିନକୁ ଦେଶରେ ୪ହଜାରୁ ଊର୍ଦ୍ଧ୍ୱ ଲୋକଙ୍କ ମୃତ୍ୟୁ ହେଉଛି। ଏଭଳି ସଙ୍କଟ ଜନକ ସ୍ଥିତିରେ ନୂଆପଡ଼ା ଜିଲାରୁ ଆସିଛି ଏକ ଖୁସି ଖବର। ମାସକର ଶିଶୁ କରୋନାକୁ ହରାଇ ସୁସ୍ଥ ହୋଇଥିବା ଜଣାପଡ଼ିଛି।
ମିଳିଥିଲା ସୂଚନା ଅନୁଯାୟୀ, ଏପ୍ରିଲ ୧୭ ତାରିଖରେ ନୂଆପଡ଼ା ଜିଲା ମୁଖ୍ୟ ହସ୍ପିଟାଲରେ ଏହି ଶିଶୁଟି ଜନ୍ମ ହୋଇଥିଲା। ସେତେବେଳେ ଶିଶୁର ଓଜନ କମ୍ ଥିତ୍ବାରୁ ସେଠାରେ ରଖାଯାଇ ଚିକିତ୍ସା କରାଯାଇଥିଲା। ଦେହ ସୁସ୍ଥ ହେବା ପରେ ଘରକୁ ପଠାଯାଇଥିଲା। ଗତ ୧୨ ତାରିଖରେ ଶିଶୁକୁ କାଶ ଓ ଛିଙ୍କ ହେବାରୁ ଜିଲା ମୁଖ୍ୟ ଚିକିତ୍ସାଳୟର ଶିଶୁ ଓ୍ବାର୍ଡର ଏସ୍ଏନ୍ସିୟୁରେ ଭର୍ତ୍ତି କରାଯାଇଥିଲା। ସେଠାରେ ଆଣ୍ଟିଜେନ୍ ଟେଷ୍ଟ କରିବାରୁ ଉଭୟ ମା’ ଓ ଶିଶୁଙ୍କ ରିପୋର୍ଟ ପଜିଟିଭ୍ ଆସିଥିଲା ବୋଲି ଜିଲା ମୁଖ୍ୟ ଶିଶୁ ରୋଗ ବିଶେଷଜ୍ଞ ଡା. ଜ୍ୟୋତ୍ସ୍ନାରାଣୀ ପଟ୍ଟନାୟକ କହିଥିଲେ। ଡାକ୍ତରଙ୍କ ଉପଯୁକ୍ତ ଚିକିତ୍ସା ପରେ ଶିଶୁଟି ଏବେ ସୁସ୍ଥ ହୋଇ ୧୮ ତାରିଖରେ ଘରକୁ ଫେରି ଥିବା ଶିଶୁ ରୋଗ ବିଶେଷଜ୍ଞ ଡାକ୍ତର କହିଛନ୍ତି। ଶିଶୁ ସୁସ୍ଥ ଥିବା ନେଇ ନୂଆପଡ଼ା ଜିଲାପାଳ ସ୍ବାଧାଦେବ ସିଂ ମଧ୍ୟ ଟୁଇଟ୍ ଯୋଗେ ସୂଚନା ଦେଇଛନ୍ତି।