ପାଟଣା,୨୦ା୧(ସ୍ବ.ପ୍ର.): ଲୋକେ ଡାକ୍ତରଙ୍କୁ ରୋଗୀଙ୍କ ଦ୍ୱିତୀୟ ଭଗବାନ ବୋଲି ମାନି ଥାଆନ୍ତି। ହେଲେ ବେଳେବେଳେ ଏଭଳି କିଛି ଅଭାବନୀୟ ଘଟଣା ଘଟେ, ଯାହା ଫଳରେ ଡାକ୍ତରଙ୍କ ଉପରୁ ଭରସା ତୁଟିଯାଏ। ଏଭଳି ଏକ ଅଭାବନୀୟ ଘଟଣା ଘଟିଛି କେନ୍ଦୁଝର ଜିଲା ସାହାରପଡ଼ା ବ୍ଲକ ଉପାନ୍ତ ଅଞ୍ଚଳ ଖଡିକାପଦା ଗାଁରେ।
ଖଡିକାପଦାର ସନିଆ ମୁଣ୍ଡାଙ୍କ ସ୍ତ୍ରୀ ରାଇମଣିଙ୍କର ବୁଧବାର କରଞ୍ଜିଆ ଉପଖଣ୍ଡ ଚିକିତ୍ସାଳୟରେ ଏକ ପୁତ୍ର ସନ୍ତାନ ଜନ୍ମ ହେବା ପରେ ଡାକ୍ତର ନବଜାତକ ଶିଶୁପୁତ୍ରକୁ ମୃତ ଘୋଷଣା କରିଥିଲେ। ସନିଆ ମନ ଦୁଃଖରେ ଶିଶୁକୁ ଏକ ବ୍ୟାଗ୍ରେ ଧରି ଘରକୁ ନେଇ ସଂସ୍କାର କରିବା ପାଇଁ ବାହାରିବା ବେଳେ ଶିଶୁପୁତ୍ର କୁଆଁ କୁଆଁ କାନ୍ଦିବାରୁ ପୁଣି ଶିଶୁକୁ ଆଣି କରଞ୍ଜିଆ ଉପଖଣ୍ଡ ଚିକିତ୍ସାଳୟକୁ ଆଇସିୟୁରେ ଭର୍ତ୍ତି କରିଥିଲେ। ଗୁରୁବାର ସକାଳୁ ଶିଶୁପୁତ୍ରଟି ଚିକିତ୍ସାଧୀନ ଅବସ୍ଥାରେ କରଞ୍ଜିଆ ଡାକ୍ତରଖାନାରେ ଆଖିବୁଜିଛି। ଏଭଳି ଦୁଃଖଦ ଘଟଣା ପାଇଁ ପରିବାର ଲୋକେ ଡାକ୍ତରଙ୍କ ଚିକିତ୍ସାରେ ଅବହେଳାକୁ ଦାୟୀ କରିଛନ୍ତି। ଏଭଳି ବେପରୁଆ ଭାବେ ପ୍ରଥମେ ଶିଶୁକୁ ମୃତ ଘୋଷଣା ଓ ପରେ ଆୟୁସିୟୁରେ ଭର୍ତ୍ତି ପରେ ଶିଶୁର ଦୁଃଖଦ ମୃତ୍ୟୁ ପାଇଁ ଦାୟୀ ଥିବା ଡାକ୍ତରଙ୍କ ବିରୋଧରେ କଡ଼ା କାର୍ଯ୍ୟାନୁଷ୍ଠାନ ପାଇଁ ଦାବି ହୋଇଛି।