ପୁରୀ ଅଫିସ,୨୩।୮: ବଗଲା ଧର୍ମଶାଳା ଜମିକୁ ନେଇ ବିବାଦ ତୀବ୍ର ହେବାରେ ଲାଗିଛି। ଭାଜପା ପକ୍ଷରୁ ବଗଲା ସମ୍ମୁଖରେ ଧାରଣା ଦିଆଯାଇଥିବାବେଳେ ଧୀରେ ଧୀରେ ଏହାକୁ ନେଇ ରାଜନୈତିକ ଆରୋପ ପ୍ରତ୍ୟାରୋପ ଆରମ୍ଭ ହୋଇଯାଇଛି। ତେବେ ଏହି ପ୍ରସଙ୍ଗରେ ଜିଲା ପ୍ରଶାସନ ଶନିବାର ଏକ ପ୍ରେସ୍ ବିଜ୍ଞପ୍ତି ଜରିଆରେ ତା’ର ସ୍ପଷ୍ଟ ମତ ରଖିଛି। ବଗଲା ଜମି ଘରୋଇ ଲଜ୍ ମାଲିକଙ୍କୁ ବିକ୍ରି କରାଯାଇଥିବା କହିବା ଠିକ୍ ନୁହେଁ। ଶ୍ରୀମନ୍ଦିର ଐତିହ୍ୟ କରିଡର ନିମନ୍ତେ ମହାପ୍ରଭୁଙ୍କ ପାଇଁ ଜମି ଦେଇଥିବା କେତେଜଣ ସେବାୟତ ଏବଂ ବ୍ୟକ୍ତିଙ୍କୁ ଏଠାରେ ଥଇଥାନ କରାଯାଇଛି ବୋଲି ପ୍ରଶାସନ ସ୍ପଷ୍ଟ କରିଛି।
ପ୍ରଶାସନ ପକ୍ଷରୁ କୁହାଯାଇଛି ଯେ, ବଗଲା ଧର୍ମଶାଳାର ମୋଟ ୨ଏକର ୭୩୮ ଡେସିମିଲ ଜମିରୁ ୧୨ପ୍ରତିଶତ ଜାଗାରେ କେତେଜଣ ଜମିହରା ସେବାୟତ ଏବଂ ବ୍ୟକ୍ତିଙ୍କୁ ଥଇଥାନ କରାଯାଇଛି। ଭିତର ସେବାୟତ ନିଯୋଗକୁ ଜମି ଦିଆଯାଇଛି। ଏହି ନିଯୋଗରେ ଅନେକ ସେବାୟତ ସମ୍ପୃକ୍ତ ଅଛନ୍ତି। ଯେଉଁମାନେ କି ଶହ ଶହ ବର୍ଷ ଧରି ମହାପ୍ରଭୁଙ୍କ ସେବା କରିଆସୁଛନ୍ତି। ସରକାରଙ୍କ ଆହ୍ବାନରେ ସେମାନେ ଶ୍ରୀମନ୍ଦିର ଐତିହ୍ୟ କରିଡର ପ୍ରକଳ୍ପ ପାଇଁ ତାଙ୍କ ଜମି ଉତ୍ସର୍ଗ କରିଛନ୍ତି। ବଗଲା ଜମି ପୂର୍ବରୁ ଲଜିଂ ହାଉସ୍ ଫଣ୍ଡ କମିଟି ନଁାରେ ଥିବାବେଳେ ଏହାକୁ ରାଜସ୍ବ ବିଭାଗ ନଁାକୁ ଅଣାଯାଇଛି। ଏ କ୍ଷେତ୍ରରେ ରାଜ୍ୟ ସରକାରଙ୍କ ପକ୍ଷରୁ ଥଇଥାନ ନୀତି ଅନୁସରଣ କରାଯାଇଛି, ଯାହାକୁ ରାଜ୍ୟ କ୍ୟାବିନେଟରେ ଅନୁମୋଦନ ମିଳିଛି। ବଗଲା ଧର୍ମଶାଳାରେ ୨୦୦ ଯାତ୍ରୀଙ୍କ ରହଣି କ୍ଷମତା ଥିଲା। କିନ୍ତୁ ରାଜ୍ୟ ସରକାର ଏକକାଳୀନ ୨,୦୦୦ ଗରିବ ଭକ୍ତଙ୍କ ରହଣି ଲାଗି ପିଲିଗ୍ରୀମ ସେଣ୍ଟର କରୁଛନ୍ତି। ଆଗାମୀ ଦିନରେ ପୁରୀରେ ଆହୁରି ୮,୦୦୦ ଅର୍ଥାତ୍ ମୋଟ ୧୦,୦୦୦ ଗରିବ ଭକ୍ତ କିପରି ସୁବିଧାରେ ପୁରୀରେ ରହିପାରିବେ ସେ ନେଇ ପ୍ରକ୍ରିୟା ଜାରି ରଖିଥିବା ପ୍ରଶାସନ ପକ୍ଷରୁ ସୂଚନା ଦିଆଯାଇଛି। ପ୍ରଶାସନ ପକ୍ଷରୁ ବଗଲା ଜମି କାହାକୁ
ବିକ୍ରି କରାଯାଇ ନ ଥିବା କୁହାଯାଉଥିବାବେଳେ ୬ ଜଣଙ୍କ ନଁାରେ ୩୪୦ ଡିସିମିଲ୍ ବଗଲା ଜମି ବିକ୍ରି କବଲା ହୋଇଥିବା ଜଣାପଡିଛି। ଯାହାକୁ ନେଇ ଲୋକମାନଙ୍କ ମନରୁ ସଂଶୟ ଦୂର ହୋଇପାରୁ ନାହିଁ।
