ବାରଙ୍ଗ,୨୧।୮(ଲିଙ୍ଗରାଜ ରାଉତ):ବାହାନଗା ଟ୍ରେନ୍ ଦୁର୍ଘଟଣାରେ ଆହତ ବାଲେଶ୍ୱର ଅଞ୍ଚଳର ଗଣେଶ ସାହାଣୀ ଏବେ ନନ୍ଦନକାନନ ଛକରେ ଭିକ ମାଗୁଛନ୍ତି। ନିଜ ଦୁଃଖକୁ ସେ ଅନ୍ୟପାଖରେ ବଖାଣି ନିଜର ଖାଇବା ସହ ଚିକିତ୍ସା ଓ ଘରକୁ ଯିବାକୁ ଅର୍ଥ ଯୋଗାଡ଼ କରୁଛନ୍ତି। ଗଣେଶ ପରିବାର ଚଳାଇବାକୁ ହାଇଦ୍ରାବାଦରେ ଜଣେ ରାଜମିସ୍ତ୍ରି ପାଖରେ କାମ କରୁଥିଲେ। ସେଥିରେ ଯାହା ପାରିଶ୍ରମିକ ମିଳୁଥିଲା ସେଥିରେ ସେ କଷ୍ଟେମଷ୍ଟେ ପରିବାର ଚଳାଉଥିଲେ। କିନ୍ତୁ ହାଇଦ୍ରାବାଦରୁ ଘରକୁ ଫେରୁଥିବାବେଳେ ବାହାନଗା ପାଖରେ ଟ୍ରେନ୍ ଦୁର୍ଘଟଣା ଘଟିଥିଲା। ଚେତା ଆସିବା ବେଳକୁ ସେ କଟକ ବଡ଼ ଡାକ୍ତରଖାନାରେ ନିଜକୁ ପାଇଥିଲେ। ଦୁର୍ଘଟଣାରେ ବାମ ହାତ ଭାଙ୍ଗିଯାଇଥିବାବେଳେ ଗୋଡ଼ରେ ଶକ୍ତ ଆଘାତ ଲାଗିଥିଲା। ଭଙ୍ଗାହାତ ଅପରେଶନ ପରେ ଶୁକ୍ରବାର ସେ ଡାକ୍ତରଖାନାରୁ ଡିସ୍ଚାର୍ଜ ହୋଇଥିଲେ। ଡାକ୍ତରଖାନା ପକ୍ଷରୁ ୧୦୮ ଆମ୍ବୁଲାନ୍ସରେ ତାଙ୍କୁ ଘରକୁ ପଠାଇ ଦିଆଯାଇଥିଲା। ମାତ୍ର ଆମ୍ବୁଲାନ୍ସ ଡ୍ରାଇଭର ଗଣେଷଙ୍କୁ ଘରକୁ ନ ନେଇ ତ୍ରିଶୂଳିଆ ଛକରେ ଛାଡ଼ି ପଳାଇ ଯାଇଥିଲା। ପାଖରେ ପଇସା ନ ଥିବାରୁ ସେ ଘରକୁ ଯିବା ପାଇଁ ଭିକ ମାଗୁଛନ୍ତି। ଏଥିସହ ଆଗକୁ ଚିକିତ୍ସା ପାଇଁ ଆବଶ୍ୟକ ଥିବା ଟଙ୍କା ଯୋଗାଡ଼ ଚିନ୍ତାରେ ଥିବା ସେ କହିଛନ୍ତି। ଘରେ ସ୍ତ୍ରୀ ସହ ୨ ପିଲା ଅଛନ୍ତି। ହାତ ଭାଙ୍ଗିଯାଇଥିବାବେଳେ ଆଘାତପ୍ରାପ୍ତ ଗୋଡ଼ରେ ଠିକ୍ ଭାବେ ସେ ଚାଲିପାରୁନାହାନ୍ତି। ଏପରିସ୍ଥିତିରେ ଚିକିତ୍ସା ପାଇଁ ଅର୍ଥ ବାଧକ ସାଜିଛି। ତେବେ ଏଭଳି ଅମାନବିକତା କାଯର୍ର୍ୟ କରିଥିବା ଆମ୍ବୁଲାନ୍ସ ଡ୍ରାଇଭର ଉପରେ କାଯର୍ର୍ୟାନୁଷ୍ଠାନ ପାଇଁ ଦାବି ହୋଇଛି।