ପୁରୀ ଅଫିସ, ୧୨।୫:କାଳବୈଶାଖୀ ବର୍ଷାର ପ୍ରଭାବ ମଙ୍ଗଳବାର ପୁରୀରେ ଦେଖିବାକୁ ମଳିଛି। କାଳବୈଶାଖୀ ତାଣ୍ଡବ ଯୋଗୁ ଶ୍ରୀମନ୍ଦିର ନୀଳଚକ୍ରରେ ଲାଗିଥିବା ପତିତପାବନ ବାନାର ବାଉଁଶ ଭାଙ୍ଗିଯାଇଥିଲା, ଯାହାଫଳରେ ପତିତପାବନ ବାନା ଅଧା ନଇଁ ଯାଇଥିଲା। ମଙ୍ଗଳବାର ମଧ୍ୟାହ୍ନରେ ହଠାତ୍ ପୁରୀ ସହର କଳା ବାଦଲରେ ଛାଇ ହୋଇଯାଇଥିଲା। କିଛି ସମୟ ପରେ ପ୍ରବଳ ବେଗରେ ପବନ ସହ ବର୍ଷା ହୋଇଥିଲା। ପବନର ବେଗ ତୀବ୍ର ଥିବାରୁ ନୀଳଚକ୍ରରେ ଲାଗିଥିବା ପତିତପାବନ ବାନାର ବାଉଁଶ ଭାଙ୍ଗିଯାଇଥିଲା। ମାତ୍ର ଅଧାଭଙ୍ଗା ଅବସ୍ଥାରେ ନୀଳଚକ୍ରରେ ଲାଗିରହିଥିଲା। ଦୀର୍ଘ ଏକ ଘଣ୍ଟା ଧରି ବର୍ଷା ହେବା ଫଳରେ ପୁରୀ ବଡ଼ଦାଣ୍ଡ ସମେତ ସାହିଗଳି କନ୍ଦି ଜଳମୟ ହୋଇଥିଲା। ତେବେ ପତିତପାବନ ବାନା ଉଡ଼ି ନ ଥିବାରୁ ଏବଂ ନୀଳଚକ୍ର ସହ ଲାଗିରହିଥିବାରୁ ମହାପ୍ରଭୁଙ୍କ ନୀତିକାନ୍ତିରେ କୌଣସି ଅସୁବିଧା ହୋଇ ନ ଥିଲା। ବର୍ଷା କମିବା ପରେ ଚୂନରା ସେବାୟତଙ୍କ ପକ୍ଷରୁ ନଇଁଯାଇଥିବା ବାଉଁଶକୁ ପୁଣି ନୀଳଚକ୍ରରେ ବନ୍ଧାଯାଇଥିଲା। ତେବେ ମହାମାରୀ କରୋନା ସମୟରେ ଏପରି ଅଘଟଣ ଘଟିଥିବାରୁ ଆଗକୁ କିଛି ବିପତ୍ତି ଆସୁଛି ବୋଲି ଜନସାଧାରଣ ଆଶଙ୍କାରେ କହିଛିନ୍ତି ।