ନୂଆଦିଲ୍ଲୀ: କୋଭିଡ୍-୧୯ ଯୋଗୁ ବ୍ୟାଙ୍କଗୁଡିକ ବର୍ତ୍ତମାନ ବିଭିନ୍ନ ଚ୍ୟାଲେଞ୍ଜ ସ୍ଥିତି ଦେଇ ଗତି କରୁଛନ୍ତି। ଏହି ସମସ୍ୟାକୁ ଧ୍ୟାନରେ ରଖି ସରକାର ବ୍ୟାଙ୍କଗୁଡିକରେ ପୁଞ୍ଜି ପ୍ରଦାନ କରିବାକୁ ଯୋଜନା ରଖିଛନ୍ତି। ଏହ ଅଧୀନରେ ପ୍ରାୟ ୨୦ ହଜାର କୋଟି ଟଙ୍କାର ପୁଞ୍ଜି ବ୍ୟାଙ୍କଗୁଡିକୁ ସରକାର ଯୋଗାଇ ଦେବାର କାର୍ଯ୍ୟକ୍ରମ ଧାର୍ଯ୍ୟ ହୋଇଛି। ରାଷ୍ଟ୍ରାୟତ୍ତ ବ୍ୟାଙ୍କଗୁଡିକରେ ପୁଞ୍ଜୀକରଣ କାର୍ଯ୍ୟକ୍ରମକୁ ପାର୍ଲାମେଣ୍ଟ ନିକଟରେ ମଞ୍ଜୁରୀ ପ୍ରଦାନ କରିଛି। ୨୦୨୦-୨୧ରେ ଅତିରିକ୍ତ ଖର୍ଚ୍ଚ ଦାବି ଅଧୀନରେ ଉକ୍ତ ପ୍ରସ୍ତାବକୁ ଅନୁମୋଦନ ମିଳିଥିବା ଜଣାପଡିଛି। ସୂଚନାଯୋଗ୍ୟ, ସରକାର ୨୦୧୯-୨୦ରେ ରାଷ୍ଟ୍ରାୟତ୍ତ ବ୍ୟାଙ୍କଗୁଡିକୁ ୭୦ ହଜାର କୋଟି ଟଙ୍କା ପୁଞ୍ଜି ଯୋଗାଇ ଦେଇଥିଲେ। ଅର୍ଥ ବ୍ୟବସ୍ଥାକୁ ଗତି ପ୍ରଦାନ କରିବା ଏବଂ ଋଣ ଯୋଗାଣକୁ ତ୍ୱରାନ୍ବିତ ଲକ୍ଷ୍ୟରେ ଏଭଳି ପଦକ୍ଷେପ ନିଆଯାଇଥିଲା।
ଚଳିତ ଆର୍ଥତ୍କବର୍ଷ ତୃତୀୟ ତ୍ରୈମାସରେ ଏହି ପୁଞ୍ଜି ବ୍ୟାଙ୍କଗୁଡିକୁ ମିଳିବା ନେଇ ଆକଳନ କରାଯାଉଛି। ଏହାବାଦ ଚଳିତ ଆର୍ଥତ୍କବର୍ଷରେ ଇକ୍ୱିଟି ଏବଂ ବଣ୍ଡ ଜାରିରୁ ବଜାରରୁ ପୁଞ୍ଜି ଉଠାଇବା ଲାଗି ବ୍ୟାଙ୍କଗୁଡିକ ଅଂଶୀଦାରଙ୍କଠାରୁ ମଞ୍ଜୁରୀ ମିଳିଛି। ବ୍ୟାଙ୍କ ସେମାନଙ୍କ ଆବଶ୍ୟକତା ମୁତାବକ ବଜାରରୁ ପୁଞ୍ଜି ଉଠାଇବାକୁ ସକ୍ଷମ ହେବେ ବୋଲି ସରକାର ଆଶା ରଖିଥିଲେ। ୨୦୨୦-୨୧ ସାଧାରଣ ବଜେଟରେ ସରକାର ବ୍ୟାଙ୍କଗୁଡିକ ଲାଗି କୌଣସି ପୁଞ୍ଜି ବ୍ୟବସ୍ଥା କରି ନ ଥିବା ଜଣାପଡିଛି। ଗତ ଆର୍ଥତ୍କ ବର୍ଷରେ ପଞ୍ଜାବ ନ୍ୟାଶନାଲ ବ୍ୟାଙ୍କ ୧୬,୦୯୧ କୋଟି ଟଙ୍କା ଲାଭ କରିଥିବା ବେଳେ ୟୁନିୟନ ବ୍ୟାଙ୍କ ୧୧,୭୬୮ କୋଟି, କାନାରା ବ୍ୟାଙ୍କ ଏବଂ ଇଣ୍ଡିଆନ ବ୍ୟାଙ୍କ ୬୫୭୧ କୋଟି ଓ ୨୫୩୪ କୋଟି, ଆଲ୍ଲାହାବାଦ ବ୍ୟାଙ୍କ ୨,୧୫୩ କୋଟି, ୟୁନାଇଟେଡ ବ୍ୟାଙ୍କ ୧,୬୬୬ କୋଟି, ଆନ୍ଧ୍ର ବ୍ୟାଙ୍କ ୨୦୦ କୋଟି ଟଙ୍କାର ପୁଞ୍ଜି ଲାଭ କରିଥିଲା। ଏହାବାଦ ବ୍ୟାଙ୍କ ଅଫ୍ ବରୋଦା ୭ ହଜାର କୋଟି ଟଙ୍କାର ପୁଞ୍ଜି ଲାଭ କରିଥିବା ବେଳେ ଇଣ୍ଡିଆନ ଓଭରସିଜ ବ୍ୟାଙ୍କ ୪,୩୬୦ କୋଟି, ୟୁକୋ ବ୍ୟାଙ୍କ ୨,୧୪୨ କୋଟି, ପଞ୍ଜାବ ଆଣ୍ଡ ସିନ୍ଧ ବ୍ୟାଙ୍କ ୭୮୭ କୋଟି, ସେଣ୍ଟ୍ରାଲ ବ୍ୟାଙ୍କ ୩,୩୫୩ କୋଟି ଏବଂ ଆଇଡିବିଆଇ ବ୍ୟାଙ୍କ ୪୫୫୭ କୋଟି ଟଙ୍କା ପାଇଥିବା ଜଣାପଡିଛି।