ନୂଆଦିଲ୍ଲୀ, ୬ା୭ (ପି.ଟି.)- ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ) ଆପେକ୍ସ କାଉନ୍ସିଲର ୪ର୍ଥ ବୈଠକ ଚଳିତମାସ ୧୭ ତାରିଖରେ ବସିବ। ଏଥିରେ ଭାରତର ସଂଶୋଧିତ ଫ୍ୟୁଚର ଟୁର୍ ପ୍ରୋଗ୍ରାମ ଏବଂ ଘରୋଇ କ୍ରିକେଟ ସିଜନର ସଂଶୋଧିତ କାର୍ଯ୍ୟସୂଚୀ ନେଇ ଆଲୋଚନା ହେବ। କୋଭିଡ୍-୧୯ ମହାମାରୀ ଯୋଗୁ ଏହି ବୈଠକ ଅନ୍ଲାଇନ୍ରେ ହେବ। କାଉନ୍ସିଲର ୯ଜଣ ସଦସ୍ୟ ଆହୁରି ମଧ୍ୟ ଇଣ୍ଡିଆନ ପ୍ରିମିୟର ଲିଗ୍ରେ ଚାଇନିଜ ସ୍ପନସରଶିପ୍ ପ୍ରସଙ୍ଗ ଉପରେ ଆଲୋଚନା ହେବ। ତେବେ ଆଇପିଏଲ୍କୁ ନେଇ କେବଳ ଏହାର ପରିଚାଳନା ପରିଷଦ ବିଧିବଦ୍ଧ ନିଷ୍ପତ୍ତି ନେଇପାରିବ। ଗତମାସରେ ଗଲଓ୍ବାନ ଉପତ୍ୟକା ସଂଘର୍ଷ ପରେ ଚାଇନିଜ ସ୍ପନସରଶିପ୍ର ସମୀକ୍ଷା କରାଯିବ। ଏନେଇ ଆଇପିଏଲ୍ ପରିଚାଳନା ପରିଷଦର ଏକ ବୈଠକ ବସିବ। ତେବେ ଏଥିପାଇଁ ଦିନ ଧାର୍ଯ୍ୟ ହୋଇ ପାରିବ ନାହିଁ। ଗତ ମାର୍ଚ୍ଚ ମାସରେ ଶେଷଥର ପାଇଁ ଖେଳିଥିବା ଭାରତୀୟ କ୍ରିକେଟ ଦଳ ଜୁନ୍-ଜୁଲାଇରେ ଏକ ସୀମିତ ଓଭର କ୍ରିକେଟ ସିରିଜ ଖେଳିବା ଲାଗି ଶ୍ରୀଲଙ୍କା ଗସ୍ତ କରିବାର କାର୍ଯ୍ୟକ୍ରମ ଥିଲା। କୋଭିଡ୍-୧୯ ଯୋଗୁ ଏହାକୁ ଅନିର୍ଦ୍ଦିଷ୍ଟ କାଳ ପାଇଁ ସ୍ଥଗିତ ରଖାଯାଇଛି। ଅଗଷ୍ଟରେ ଜିମ୍ବାଓ୍ବେ ଟୁର୍କୁ ମଧ୍ୟ କିଛି ସମୟ ପାଇଁ ସ୍ଥଗିତ ରଖାଯାଇଛି। ଭାରତରେ କରୋନା ସଂକ୍ରମିତ ସଂଖ୍ୟା ଦ୍ରୁତ ବୃଦ୍ଧି ପାଇବାରେ ଲାଗିଛି। ଯଦିଓ କେତେଜଣ ଖେଳାଳି ଇତିମଧ୍ୟରେ ନେଟ୍ସରେ ଅଭ୍ୟାସ ଆରମ୍ କରିଦେଇଛନ୍ତି, ସେମାନେ କେବେ ଟ୍ରେନିଂ କ୍ୟାମ୍ପରେ ଏକତ୍ରିତ ହେବେ ତାହା ସ୍ପଷ୍ଟ ହୋଇ ନାହିଁ। ଜୁଲାଇ ୧୭ ବୈଠକରେ ଘରୋଇ କ୍ରିକେଟ କାର୍ଯ୍ୟସୂଚୀ ଚୂଡ଼ାନ୍ତ ନେଇ ଆଲୋଚନା ହୋଇ ପାରେ। ଦେଶବ୍ୟାପୀ ଲକ୍ଡାଉନ୍ କାର୍ଯ୍ୟକାରୀ ହେବା ପୂର୍ବରୁ ମାର୍ଚ୍ଚରେ ରଣଜୀ ଟ୍ରଫି ଫାଇନାଲ ସହ ଗତ ସିଜନ ଶେଷ ହୋଇଥିଲା। ପରେ ଇରାନୀ କପ୍କୁ ଅନିର୍ଦ୍ଦିଷ୍ଟକାଳ ପର୍ଯ୍ୟନ୍ତ ସ୍ଥଗିତ ରଖାଯାଇଥିଲା।