ନୂଆଦିଲ୍ଲୀ,୨୨।୫(ପି.ଟି.): ଇଣ୍ଡିଆନ ପ୍ରିମିୟର ଲିଗ୍ (ଆଇପିଏଲ୍) କୋଭିଡ୍-୧୯ କାରଣରୁ ସସ୍ପେଣ୍ଡ ହୋଇଛି। ଏହି ଲିଗ୍କୁ ସମ୍ପୂର୍ଣ୍ଣ କରିବା ପାଇଁ ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ) ଏ ପର୍ଯ୍ୟନ୍ତ କିଛି ପଦକ୍ଷେପ ଗ୍ରହଣ କରିନାହିଁ। ଇଂଲଣ୍ଡରେ ଭାରତ ଏକ ୫ ମ୍ୟାଚ୍ ବିଶିଷ୍ଟ ଟେଷ୍ଟ ସିରିଜ ଖେଳିବ। ତେବେ ଆଇପିଏଲକୁ ସମ୍ପୂର୍ଣ୍ଣ କରିବାକୁ ବିସିସିଆଇ ଏହି ଟେଷ୍ଟ ସିରିଜ କାର୍ଯ୍ୟସୂଚୀରେ କୌଣସି ପରିବର୍ତ୍ତନ କରିବାକୁ ଆନୁଷ୍ଠାନିକ ଭାବେ କହିନାହିଁ ବୋଲି ଶୁକ୍ରବାର ଇଂଲଣ୍ଡ ଓ ଓ୍ବେଲ୍ସ କ୍ରିକେଟ ବୋର୍ଡ (ଇସିବି) ସ୍ପଷ୍ଟ କରିଛି।
ଆଇପିଏଲ୍ର ବାକିଥିବା ୩୧ଟି ମ୍ୟାଚ୍ ଆୟୋଜନ କରିବାକୁ ବିସିସିଆଇ ଅଗଷ୍ଟ ୪ ତାରିଖରୁ ଆରମ୍ଭ ହେବାକୁ ଥିବା ପ୍ରଥମ ଟେଷ୍ଟକୁ ଗୋଟିଏ ସପ୍ତାହ ଘୁଞ୍ଚାଇବାକୁ ଇସିବିକୁ କହିବ ବୋଲି ବ୍ରିଟିଶ ଗଣମାଧ୍ୟମଗୁଡିକ ରିପୋର୍ଟ ପ୍ରକାଶ କରିଛନ୍ତି। କିନ୍ତୁ ଏହି ରିପୋର୍ଟକୁ ଇସିବି ଅସ୍ବୀକାର କରିଛି। ବିସିସିଆଇ ଟେଷ୍ଟ ସିରିଜ କାର୍ଯ୍ୟସୂଚୀରେ ପରିବର୍ତ୍ତନ ପାଇଁ ଆନୁଷ୍ଠାନିକ ଭାବେ ଅନୁରୋଧ କରିନାହିଁ ବୋଲି ଇସିବି ମୁଖପାତ୍ର କହିଛନ୍ତି। ଯଦି ଆଇପିଏଲ୍ ସମ୍ପୂର୍ଣ୍ଣ ନ ହୁଏ ତେବେ ବିସିସିଆଇ ୨୫୦୦ କୋଟି ଟଙ୍କା ରାଜସ୍ବ ହରାଇବ। ଆଇପିଏଲ୍ ବାୟୋ ବବଲରେ କେତେଜଣ ଖେଳାଳି ଓ ସପୋର୍ଟ ଷ୍ଟାଫ୍ କୋଭିଡ୍-୧୯ ପଜିଟିଭ ଜଣାପଡିବା ପରେ ଲିଗ୍କୁ ଅନିର୍ଦ୍ଦିଷ୍ଟ କାଳ ପାଇଁ ସସ୍ପେଣ୍ଡ କରାଯାଇଛି।
ଆଇପିଏଲ୍କୁ ସମ୍ପୂର୍ଣ୍ଣ କରିବା ପାଇଁ ବିସିସିଆଇ ବିଭିନ୍ନ ବିକଳ୍ପ ନେଇ ଯୋଜନା ପ୍ରସ୍ତୁତ କରୁଛି ବୋଲି ବୋର୍ଡର ଜଣେ ବରିଷ୍ଠ ଅଧିକାରୀ କହିଛନ୍ତି। ପଞ୍ଚମ ଟେଷ୍ଟ ସେପ୍ଟେମ୍ବର ୧୦ ତାରିଖରୁ ଆରମ୍ଭ ହେବାର କାର୍ଯ୍ୟକ୍ରମ ରହିଛି। କାର୍ଯ୍ୟସୂଚୀ ପରିବର୍ତ୍ତନ ପାଇଁ ବିସିସିଆଇ ଅନୁରୋଧ କଲେ ଇସିବି ଏ ନେଇ ପଦକ୍ଷେପ ନେଇପାରେ। ‘ଦି ହଣ୍ଡ୍ରେଡ’ ଟୁର୍ନାମେଣ୍ଟ ଓ ପାକିସ୍ତାନ ବିପକ୍ଷ ସୀମିତ ଓଭର ସିରିଜ ଆୟୋଜନ ହେବାର କାର୍ଯ୍ୟକ୍ରମ ଥିବାରୁ ଓ୍ବିଣ୍ଡୋ ପାଇଁ ନିଶ୍ଚିତ ଭାବେ ସମସ୍ୟା ରହିଛି। ଜୁଲାଇ ୮ରୁ ୨୦ ତାରିଖ ମଧ୍ୟରେ ପାକିସ୍ତାନ ୩ଟି ଲେଖାଏ ଟି୨୦ ଓ ଦିନିକଆ ମ୍ୟାଚ୍ ଇଂଲଣ୍ଡରେ ଖେଳିବ। ବର୍ତ୍ତମାନ ଇଂଲଣ୍ଡରେ ଆଇପିଏଲର ବାକି ମ୍ୟାଚ୍ ଆୟୋଜନ ହେବ କିମ୍ବା ‘ଦି ହଣ୍ଡ୍ରେଡ୍’ରେ ଭାରତୀୟ କ୍ରିକେଟର ସାମିଲ ହେବେ ତାହା ଦେଖିବାକୁ ବାକି ରହିଲା।
