ନୂଆଦିଲ୍ଲୀ,୧୩।୮: ଗତ ମାସରେ ଟି୨୦ ସିରିଜ୍ରେ ଶ୍ରୀଲଙ୍କା ଠାରୁ ୧-୨ରେ ପରାସ୍ତ ହୋଇଥିଲା ଭାରତୀୟ ଦଳ। ଏହାର କାରଣ ଅନ୍ତିମ ଦୁଇ ମ୍ୟାଚ୍ ଲାଗି ଟିମ୍ ଇଣ୍ଡିଆ ପାଖରେ ସ୍ପେଶାଲିଷ୍ଟ ବ୍ୟାଟ୍ସମ୍ୟାନଙ୍କ ଘୋର ଅଭାବ ଥିଲା। ଭାରତୀୟ ଦଳର କ୍ୟାମ୍ପରେ କ୍ରୁନାଲ ପାଣ୍ଡ୍ୟା କୋଭିଡ୍-୧୯ ସଂକ୍ରମିତ ଚିହ୍ନଟ ହେବା ପରେ ତାଙ୍କ ସଂଶ୍ପର୍ସରେ ଆସିଥିବା ୮ ଖେଳାଳିଙ୍କୁ ରଖାଯାଇଥିଲା ଆଇସୋଲେଶନରେ। ଫଳରେ ଟିମ୍ ଇଣ୍ଡିଆକୁ ମାତ୍ର ୫ ବ୍ୟାଟ୍ସମ୍ୟାନଙ୍କ ସହ ଖେଳିବାକୁ ପଡ଼ିଥିଲା, ଯାହାକି ସାଜିଥିଲା ପରାଜୟର କାରଣ।
କନ୍ତୁ ସାମ୍ନାକୁ ଆସିଥିବା ନୂଆ ତଥ୍ୟ ଅନୁଯାୟୀ ବିସିସିଆଇ ମେଡିକାଲ ଅଫିସରଙ୍କ ତ୍ରୁଟି କାରଣରୁ ଟିମ୍ ଇଣ୍ଡିଆକୁ ଏଭଳି ଦଷା ଭୋଗିବାକୁ ପଡ଼ିଥିଲା। ଜୁଲାଇ ୨୬ ତାରିଖରେ କ୍ରୁନାଲଙ୍କ ଠାରେ ଦେଖା ଦେଇଥିଲା ତଣ୍ଟି ଦରଜ ଭଳି କରୋନାର ଲକ୍ଷଣ। ଏ ସମ୍ପର୍କରେ ସେ ତୁରନ୍ତ ଜଣାଇଥିଲେ ବିସିସିଆଇର ମେଡିକାଲ ଅଧିକାରୀ ଅଭିଜିତ୍ ସାଲଭୀଙ୍କୁ। ତୁରନ୍ତ କ୍ରୁନାଲଙ୍କ ରାପିଡ୍ ଆଣ୍ଟିଜେନ ଟେଷ୍ଟ (ଆରଏଟି) କରାଯିବା ସହ ଆଇସୋଲେଶନରେ ରଖାଯିବା କଥା। କିନ୍ତୁ ସେଭଳି କିଛି କରି ନ ଥିଲେ ଭାରତୀୟ ଦଳ ସହ ଯାଇଥିବା ଡାକ୍ତର ସାଲଭୀ।
କ୍ରୁନାଲଙ୍କ ଠାରେ କରୋନା ଲକ୍ଷଣ ଦେଖାଯାଉଥିବା ବେଳେ ତାଙ୍କୁ ଦଳର ଅନ୍ୟ ଖେଳାଳିଙ୍କ ସହ ବୈଠକରେ ବସିବାକୁ ଅନୁମତି ଦେଇଥିଲେ। ୨୭ ତାରିଖରେ ଅଲରାଉଣ୍ଡରଙ୍କ ଆର୍ଟି-ପିସିଆର୍ ଟେଷ୍ଟ କରାଯାଇଥିଲା, ଯାହାର ରିପୋର୍ଟ ମିଳିଥିଲା ମଧ୍ୟାହ୍ନରେ। ଏଥି ଯୋଗୁ ବିସିସିଆଇ ଓ ଶ୍ରୀଲଙ୍କା କ୍ରିକେଟ୍ ଟି୨୦ ସିରିଜ୍ର ଦ୍ୱିତୀୟ ମ୍ୟାଚ୍କୁ ଗୋଟିଏ ଦିନ ପାଇଁ ଘୁଞ୍ଚାଇବାକୁ ନିଷ୍ପତ୍ତି ନେଇଥିଲେ। ପ୍ରାରମ୍ଭରୁ କ୍ରୁନାଲଙ୍କ ବ୍ୟତୀତ ଅନ୍ୟ କାହାରି ରିପୋର୍ଟ ପଜିଟିଭ ଆସି ନ ଥିଲା। ମାତ୍ର ଦଳ ଶ୍ରୀଲଙ୍କା ଛାଡ଼ିବା ପୂର୍ବରୁ କ୍ରିଷ୍ଣପ୍ପା ଗୋଥମ ଓ ୟୁଜବେନ୍ଦ୍ର ଚହଲ ପଜିଟିଭ ଚିହ୍ନଟ ହୋଇଥିଲେ।