କୋକସରା, ୨୫।୧୨ (ଡି.ଏନ.ଏ)- କଳାହାଣ୍ଡି ଜିଲାର ସୀମାନ୍ତ କୋକସରା ବ୍ଲକ ଆମପାଣି ଘାଟି ତଳେ ପୂଜା ପାଉଛନ୍ତି ଆଦିବାସୀ ଜନମାନସର ଆରାଧ୍ୟ ଦେବତା ପ୍ରଭୁ ବୁଢ଼ାରଜା। ସାହାଜଖୋଲ ଜଙ୍ଗଲ ପାଦଦେଶରେ ପ୍ରଭୁ ବୁଢ଼ାରଜାଙ୍କ ମନ୍ଦିର ରହିଛି। ଆଜିକୁ କିଛିଦିନ ହେବ ସନ୍ଧ୍ୟା ନଇଁଲେ ପାଖ ଜଙ୍ଗଲରୁ ଗୋଟିଏ ଭାଲୁ ମନ୍ଦିର ପରିସରକୁ ଆସୁଥିବା ଦେଖିବାକୁ ମିଳୁଛି । ଭାଲୁଟି ଆସି ମନ୍ଦିର ବେଡାରେ ଭକ୍ତ ଚଢାଇଥିବା ନଡ଼ିଆ ଓ ଅନ୍ୟ ଫଳମୂଳ ଖାଇ ପୁଣି ଥରେ ରାତିରେ ଜଙ୍ଗଲକୁ ଫେରୁଛି। ଏହି ଘଟଣା ପରେ ସନ୍ଧ୍ୟା ହେଲେ ମନ୍ଦିର ଅଞ୍ଚଳରେ ଲୋକଙ୍କ ଯାତାୟତ ବନ୍ଦ ରହୁଥିବା ଦେଖିବାକୁ ମିଳୁଛି। ପୂର୍ବରୁ ମଧ୍ୟ ଏହି ଅଞ୍ଚଳରେ ଭାଲୁ ଦେଖିବାକୁ ମିଳିଥିଲା। ତେବେ ନିୟମିତ ଭାବେ ଏହି ଭାଲୁ ମନ୍ଦିରକୁ ଆସୁଥିବା ସ୍ଥାନୀୟ ଲୋକେ କହିଛନ୍ତି। ତେବେ ଭାଲୁ ହିଂସ୍ର ଜନ୍ତୁ ହୋଇଥିଲେ ସୁଦ୍ଧା କାହାକୁ କିଛି କ୍ଷତି କରୁନାହିଁ। ନିଜେ ଆସି ଖାଦ୍ୟ ଗ୍ରହଣ କରି ନିଜେ ପୁଣି ଜଙ୍ଗଲ ମୁହାଁ ହେଉଛି । ତେବେ ଭାଲୁ ଆସୁଥିବା କାରଣରୁ ସନ୍ଧ୍ୟା ହେଲେ ଲୋକେ ଭୟଭୀତ ରହୁଥିବା ଜଣାପଡିଛି । ସ୍ଥାନୀୟ ଜଙ୍ଗଲ ବିଭାଗ କର୍ମଚାରୀଙ୍କୁ ଏ ନେଇ ଯୋଗାଯୋଗ କରିଥିଲେ ମଧ୍ୟ ସେମାନଙ୍କ ପ୍ରତିକ୍ରିୟା ମିଳିନାହିଁ ।