ପାଟକୁରା,୧୫ା୯(ରବୀନ୍ଦ୍ର ନାଥ ବାରିକ ): କେନ୍ଦ୍ରାପଡ଼ା ଜିଲା ଗରଦପୁର ବ୍ଲକ ଅଧୀନ ବେରି ପଞ୍ଚାୟତ ବେଡାରୀ-କୁଳତୁଠି ଗ୍ରାମ ରାସ୍ତା ୮ କୋଟି ୪୦ ଲକ୍ଷ ଟଙ୍କା ବ୍ୟୟରେ ନିର୍ମାଣ କରାଯାଇଥିଲା। ହେଲେ ସେହି କାମ ସରିବାର ୩ ମାସ ଯାଇନି ବେରିମଳିକ ସାହି ନିକଟରେ ଥିବା ପୋଖରୀ ପାର୍ଶ୍ୱ ରାସ୍ତା ଭୁଶୁଡ଼ି ପଡିଛି। ଏହି ପୋଖରୀ ତିନିକଡ଼ରେ ଗ୍ରାମଉନ୍ନୟନ ରାସ୍ତା ନିର୍ମାଣ ହୋଇଛି। କିନ୍ତୁ ପୋଖରୀ ପାର୍ଶ୍ୱ ପୋତାଯାଇ ନ ଥିବାରୁ ଏପରି ପରିସ୍ଥିତି ସୃଷ୍ଟି ହୋଇଥିବା ଅଭିଯୋଗ ହୋଇଛି। ପାଟକୁରାର ପୂର୍ବତନ ବିଧାୟକ ବେଦପ୍ରକାଶ ଅଗ୍ରୱାଲଙ୍କ ଉଦ୍ୟମରେ ଏହି ରାସ୍ତା ପାଇଁ ଆବଶ୍ୟକ ଅର୍ଥ ବରାଦ କରାଯାଇଥିଲା। କିନ୍ତୁ ରାସ୍ତା କାର୍ଯ୍ୟ ନିମ୍ନମାନର ହେଉଥିବାରୁ ରାସ୍ତାର ସ୍ଥାୟିତ୍ୱ ଉପରେ ପ୍ରଶ୍ନବାଚୀ ସୃଷ୍ଟି ହୋଇଛି। ତୁରନ୍ତ ରାସ୍ତାପାର୍ଶ୍ୱ ପୋଖରୀ ପୋତିବାକୁ ସାଧାରଣରେ ଦାବି ହେଉଛି। ରାସ୍ତା ଭୁଶୁଡ଼ି ପଡ଼ିଥିବା ଯୋଗୁ ଯାତାୟତରେ ସମସ୍ୟା ସୃଷ୍ଟି ହୋଇଛି। ଏଥିପାଇଁ ଛୋଟ ବଡ଼ ଦୁର୍ଘଟଣା ଘଟୁଛି। ଏଥିପ୍ରତି ତୁରନ୍ତ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ବେଡାରୀ ଗ୍ରାମର ନଗେନ ସ୍ବାଇଁ, ଅରକ୍ଷିତ ବେହେରା, ଉପେନ୍ଦ୍ର ଦାସ, ଅଶୋକ ସାହୁ, ଗୋକୁଳାନନ୍ଦ ବେହେରା, ପୂର୍ଣ୍ଣ ଚନ୍ଦ୍ର ଜେନା ଓ ଶିବ ପ୍ରସାଦ ପଟ୍ଟନାୟକ ପ୍ରମୁଖ ଦାବି କରିଛନ୍ତି।