ବୈପାରିଗୁଡ଼ା,୧୬।୧(ଡି.ଏନ୍.ଏ.) କୋରାପୁଟ ଜିଲା ବୈପାରିଗୁଡ଼ା ବ୍ଲକ ଅନ୍ତର୍ଗତ ଦୋରାଗୁଡ଼ା ପଞ୍ଚାୟତର କସମଗୁଡ଼ା ଗ୍ରାମର କେତେଜଣ ହିତାଧିକାରୀଙ୍କ କାଳିଆ, ପିଏମ୍ କିଷାନ ଯୋଜନା ଅର୍ଥ ପ୍ରଦାନରେ ବାଟମାରଣା ସମ୍ପର୍କିତ ଖବର ଧରିତ୍ରୀରେ ପ୍ରକାଶ ପାଇବା ପରେ ବୁଧବାର କୋରାପୁଟ ଡିଭିଜନ ପକ୍ଷରୁ ଏହାର ତଦନ୍ତ କରାଯାଇଛି। ଡିଭିଜନର ୨ ଜଣ ତଦନ୍ତ ଅଧିକାରୀ ଦୋରାଗୁଡ଼ା ବ୍ରାଞ୍ଚ ପୋଷ୍ଟ ଅଫିସକୁ ଯାଇ ଅଭିଯୋଗକାରୀ କସମଗୁଡ଼ା ଗ୍ରାମର ସନା ପରଜା ଏବଂ ଡମାଇ ପରଜାଙ୍କ ବୟାନ ରେକର୍ଡ କରିଛନ୍ତି। ଅନ୍ୟ ଜଣେ ଅଭିଯୋଗକାରୀ ରାମ ପରଜା ଅନୁପସ୍ଥିତ ଥିଲେ ା ତେବେ ଏ ସମ୍ପର୍କରେ ଡାକ ବିଭାଗ ନିରୀକ୍ଷକ ଶ୍ରୀକାନ୍ତ ମହଲାଙ୍କୁ ପଚାରିବାରୁ ସମସ୍ତ ଅଭିଯୋଗକାରୀ ଟଙ୍କା ପାଇଛନ୍ତି ବୋଲି ପ୍ରକାଶ କରିଥିଲେ। ତେବେ ଅଭିଯୋଗକାରୀଙ୍କଠାରୁ ଅଭିଯୋଗ ପାଇବା ପରେ ସମ୍ପୃକ୍ତ ପୋଷ୍ଟମାଷ୍ଟର ତରବରିଆ ଭାବେ ହିତାଧିକାରୀଙ୍କ ଘରକୁ ଯାଇ ଟଙ୍କା ଫେରାଇବା ସମ୍ପର୍କରେ ପଚାରିବାରୁ ଏନେଇ ସେମାନଙ୍କ ପାଖରେ କୌଣସି ମ୍ୟାଟେରିଆଲ ଏଭିଡିଏନ୍ସ ନାହିଁ। ତେଣୁ ସମ୍ପୃକ୍ତ ପୋଷ୍ଟ ମାଷ୍ଟରଙ୍କୁ ଦୋଷ ଦେଇହେବ ନାହିଁ ବୋଲି କହିଥିଲେ। ଫଳରେ ତଦନ୍ତର ନିରପେକ୍ଷତାକୁ ନେଇ ପ୍ରଶ୍ନ ଉଠିଛି ା ଅଭିଯୋଗକାରୀ ସମସ୍ତେ ଅଶିକ୍ଷିତ ହୋଇଥିବାରୁ ପୂର୍ବରୁ ଲେଖା ହୋଇଥିବା ବୟାନ ତଳେ ଦସ୍ତଖତ କରିଥିଲେ। ଏ ସମ୍ପର୍କରେ ସମ୍ପୃକ୍ତ ପୋଷ୍ଟ ମାଷ୍ଟର ପ୍ରଶାନ୍ତ ସାହୁଙ୍କୁ ପଚାରିବାରୁ ସେ ଚତୁରତାର ସହ ସନାଙ୍କ ବଳକା ଅର୍ଥ ତାଙ୍କ ଘରକୁ ଯାଇ ଫେରାଇଥିଲେ। ସେହିପରି ଅନ୍ୟ ଜଣେ ଅଭିଯୋଗକାରୀ ରାମ ପରଜାଙ୍କୁ ମଧ୍ୟ ୭ ହଜାର ଟଙ୍କା ଫେରାଇଥିଲେ। ପ୍ରଶାସନ ପକ୍ଷରୁ ଏହାର ନିରପେକ୍ଷ ତଦନ୍ତ କରାଯିବାକୁ ଦାବି ହେଉଛି।