ନୂଆଦିଲ୍ଲୀ, ୯ା୧୦ (ପି.ଟି.)-ଟାର୍ଗେଟ ଅଲିମ୍ପିକ ପୋଡିୟମ ସ୍କିମ୍ (ଟପ୍ସ) ଅନ୍ତର୍ଭୁକ୍ତ ଆଥଲେଟ୍ଙ୍କ ଲାଗି ଉଦ୍ଦିଷ୍ଟ ଦେଶର ବିଭିନ୍ନ ସ୍ଥାନରେ ରହିଥିବା ନ୍ୟାଶନାଲ ସେଣ୍ଟର ଅଫ୍ ଏକ୍ସଲେନ୍ସ (ଏନ୍ସିଓଇ)ରେ ଶ୍ରେଷ୍ଠ ଟ୍ରେନିଂ ବ୍ୟବସ୍ଥା କରାଯିବ। ୨୦୨୪ ଏବଂ ୨୦୨୮ ଅଲିମ୍ପିକ୍ସକୁ ଦୃଷ୍ଟିରେ ରଖି ସ୍ପୋଟର୍ସ ଅଥରିଟି ଅଫ୍ ଇଣ୍ଡିଆ (ସାଇ) ପକ୍ଷରୁ ଏ ନେଇ ଆବଶ୍ୟକ ପଦକ୍ଷେପ ନିଆଯିବ। ଗୁରୁବାର କେନ୍ଦ୍ର କ୍ରୀଡ଼ାମନ୍ତ୍ରୀ କିରେନ ରିଜିଜୁଙ୍କ ଅଧ୍ୟକ୍ଷତାରେ ଅନୁଷ୍ଠିତ ସାଇର ୫୩ତମ ସାଧାରଣ ପରିଷଦ ବୈଠକରେ ଏ ସମ୍ପର୍କରେ ବିଧିବଦ୍ଧ ନିଷ୍ପତ୍ତି ନିଆଯାଇଛି। ଜାତୀୟ କ୍ରୀଡ଼ା ମହାସଂଘ (ଏନଏସ୍ଡବ୍ଲ୍ୟୁ) ସହଯୋଗରେ ଏହି ସେଣ୍ଟରଗୁଡ଼ିକ କାର୍ଯ୍ୟ କରିବ। ଆଥଲେଟମାନଙ୍କ ଲାଗି ସରକାର ବିଶ୍ୱ ଶ୍ରେଣୀୟ ସ୍ପୋଟର୍ସ ଇକୋ ସିଷ୍ଟମ ଯୋଗାଇ ଦେବେ। ଟପ୍ସର ଏହି ଟ୍ରେନିଂ ସେଣ୍ଟରଗୁଡ଼ିକର ଭିତ୍ତିଭୂମି ବିକାଶ କରାଯିବ। ଆଧୁନିକ କ୍ରୀଡ଼ା ବିଜ୍ଞାନ ସହ ଦକ୍ଷ କୋଚ୍ ଓ ସପୋର୍ଟ ଷ୍ଟାଫ୍ ଯୋଗାଇ ଦିଆଯିବ ବୋଲି ରିଜିଜୁ ପ୍ରକାଶ କରିଛନ୍ତି। ବୈଠକରେ ସଦସ୍ୟମାନଙ୍କ ବ୍ୟତୀତ ଅଂଶୀଦାରମାନେ ଭାଗ ନେଇଥିଲେ। ଅଲିମ୍ପିକ ଆସୋସିଏଶନ ସାଧାରଣ ସମ୍ପାଦକ ରାଜୀବ ମେହେଟା ଏବଂ ପୂର୍ବତନ ଟେବୁଲ ଟେନିସ ଖେଳାଳି କମଳେଶ ମେହେଟା, ବ୍ୟାଡ୍ମିଣ୍ଟନ ଖେଳାଳି ତଥା ଧ୍ୟାନଚାନ୍ଦ ପୁରସ୍କାର ବିଜୟିନୀ ତୃପ୍ତି ମୁର୍ଗୁଣ୍ଡେ, ପୂର୍ବତନ ହକି ଖେଳାଳି ଦୀପକ ଠାକୁର, ଉଷୁ ବିଶ୍ୱ ଚାମ୍ପିୟନଶିପ୍ ରୌପ୍ୟ ପଦକ ବିଜୟିନୀ ଯୁୁମ୍ନାମ୍ ସାନାଥୋଇ ଦେବୀ ଏବଂ ବକ୍ସର ଅଖିଲ କୁମାର ମଧ୍ୟ ଏହି ବୈଠକରେ ଉପସ୍ଥିତ ଥିଲେ। ବୈଠକରେ ମନ୍ତ୍ରୀ ରିଜିଜୁ ସୂଚନା ଦେଇ କହିଥିଲେ ଯେ, କୋଭିଡ୍ ପରିସ୍ଥିତିରେ ଉନ୍ନତି ଘଟିବାମାତ୍ରେ ପୂର୍ବତନ ଟପ୍ ଆଥଲେଟ, କୋଚ୍ ଏବଂ ବିଶେଷଜ୍ଞଙ୍କୁ ନେଇ ଟ୍ୟାଲେଣ୍ଟ ସ୍କାଉଟିଂ କମିଟିମାନ ଗଠନ ହେବ। ଏହି କମିଟିଗୁଡ଼ିକ ୪ରୁ ୫ମାସ ମଧ୍ୟରେ ସମଗ୍ର ଦେଶରେ ବିଭିନ୍ନ କ୍ରୀଡ଼ାର ପ୍ରତିଭାମାନଙ୍କୁ ଚିହ୍ନଟ କରିବେ।
