କେନ୍ଦ୍ରାପଡ଼ା ଅଫିସ/ମାର୍ଶାଘାଇ, ୧୨।୧(ଡି.ଏନ.ଏ.): କେନ୍ଦ୍ରାପଡ଼ା ଜିଲା ମାର୍ଶାଘାଇ ବ୍ଲକ ଅନ୍ତେଇ ପଞ୍ଚାୟତର ଅଶୃଙ୍ଖଳ ନାଳ ଉପରେ ନିର୍ମାଣାଧୀନ ମନ୍ତେଇ ବିଜୁ ସେତୁ ମଙ୍ଗଳବାର ମଧ୍ୟାହ୍ନରେ ଭୁଶୁଡ଼ି ପଡ଼ିଛି। ସେତୁର ଦୁଇ ନମ୍ବର ସ୍ପାନ୍ ସେଣ୍ଟ୍ରିଂ ଦବିଯିବାରୁ ତାହା ଭାଙ୍ଗିପଡି ନାଳରେ ପଡିଥିଲା। ତେବେ କାର୍ଯ୍ୟରତ ଶ୍ରମିକ ଏଥିରୁ ଅଳ୍ପକେ ବଞ୍ଚତ୍ୟାଇଛନ୍ତି। କେନ୍ଦ୍ରାପଡ଼ା ଗ୍ରାମ୍ୟ ଉନ୍ନୟନ ବିଭାଗ ଅଧୀନ ଏହି ସେତୁର ନିର୍ମାଣରେ ଅନିୟମିତତାକୁ ନେଇ ଆଲୋଚନା ଆରମ୍ଭ ହୋଇଛି। ସ୍ଥାନୀୟ ଅଞ୍ଚଳର ରବୀନ୍ଦ୍ର ମହାପାତ୍ର, ଅଶୋକ କୁମାର ରାଉତ, କମଳାକାନ୍ତ ସୂତାର ପ୍ରମୁଖ କହିଛନ୍ତି, ୨୦୧୬ ଡିସେମ୍ବର ୧୨ରେ ଏହି ସେତୁ ପାଇଁ ଶିଳାନ୍ୟାସ ହୋଇଥିଲା। ବିଭାଗୀୟ ଅବହେଳା ଯୋଗୁ ଏହାର ନିର୍ମାଣ ହୋଇପାରି ନ ଥିଲା। ସ୍ଥାନୀୟ ଲୋକଙ୍କ ଦାବି ପରେ ସେତୁ ନିର୍ମାଣ ହେଉଥିଲା। ସେତୁ ନିର୍ମାଣ ହେଲେ ମନ୍ତେଇରୁ ସିଧାସଳଖ ବାଲିଘାଇ ଗ୍ରାମକୁ ଗମନାଗମନ ପଥ ସୁଗମ ସହ ନୂଆପଡ଼ା, ମାଣିକପୁର, ବଟିରା ସମେତ ଆଖପାଖ ଅଞ୍ଚଳର ୩୦ରୁ ଊର୍ଦ୍ଧ୍ୱ ଗ୍ରାମବାସୀ ଉପକୃତ ହୋଇଥାନ୍ତେ। ଏଥିପାଇଁ ପ୍ରାୟ ୩ କୋଟି ଟଙ୍କା ବ୍ୟୟ କରାଯାଉଛି। ଏତେ ପରିମାଣର ଅର୍ଥ ବ୍ୟୟ ସତ୍ତ୍ୱେ ସେତୁ ନିର୍ମାଣ ସମୟରେ ଭୁଶୁଡି ପଡିବା ବିଭାଗୀୟ ଅପାରଗତାକୁ ପଦାରେ ପକାଇଛି। ୪ ସ୍ପାନ୍ ବିଶିଷ୍ଟ ଏହି ସେତୁର ପ୍ରଥମ ସ୍ପାନ୍ର ଛାତ କିଛିଦିନ ତଳେ ପଡ଼ିଥିଲା। ଏଥିରେ ନିମ୍ନମାନର ସିମେଣ୍ଟ, ରଡ୍ ବ୍ୟବହାର ହେଉଥିବା ଓ ବିଭାଗୀୟ ଅଧିକାରୀଙ୍କ ତଦାରଖ ନ ଥିବା ଦର୍ଶାଇ ଅଞ୍ଚଳବାସୀ ବିଭାଗୀୟ ଉଚ୍ଚ ଅଧିକାରୀଙ୍କ ଦୃଷ୍ଟି ଆକର୍ଷଣ କରିଥିଲେ। ତେବେ ନିର୍ମାଣଗତ ତ୍ରୁଟିରେ ସୁଧାର ଅଣାଗଲା ନାହିଁ। ଏହି କାମର ଭିଜିଲାନ୍ସ ତଦନ୍ତ କରାଯାଉ ବୋଲି ସେମାନେ ଦାବି କରିଛନ୍ତି। ଏ ସମ୍ପର୍କରେ କେନ୍ଦ୍ରାପଡ଼ା ଗ୍ରାମ୍ୟ ଉନ୍ନୟନ ବିଭାଗର ନିର୍ବାହୀ ଯନ୍ତ୍ରୀ ଅଜିତ୍ କୁମାର ସାହୁଙ୍କୁ ପଚାରିବାରେ ସମସ୍ତ ପ୍ରକାର ବ୍ୟବସ୍ଥା ଗ୍ରହଣ କରାଯାଇଥିଲା। କାହିଁକି ସେତୁ ଭୁଶୁଡ଼ିଲା ଓ କ’ଣ ତ୍ରୁଟି ରହିଲା, ତା’ର ଅନୁଧ୍ୟାନ କରୁଛୁ। ଖୁବ୍ଶୀଘ୍ର ପୁଣି ସେତୁ ନିର୍ମାଣ କରାଯିବ ବୋଲି ସେ କହିଛନ୍ତି।