ବ୍ରହ୍ମପୁର ଅଫିସ,୧୯।୨: ବ୍ରହ୍ମପୁର ଜିଲା ପୋଲିସର ଏକ ସ୍ବତନ୍ତ୍ର ଟିମ୍ ବଭିନ୍ନ ସ୍ଥାନରେ ଚଢ଼ାଉ କରି ଏକ ବାଇକ୍ ଚୋରକୁ ଧରିବାରେ ସଫଳ ହୋଇଛି। ଗିରଫ ଅଭିଯୁକ୍ତ ଜଣକ ଦିଗପହଣ୍ଡି ଥାନା ଅଧୀନ ଗୋକର୍ଣ୍ଣପୁର ଗ୍ରାମର ଏଲ୍.ଶିବା ରେଡ଼ୀ(୨୨)। ପୋଲିସ ଟିମ୍ ଚୋରି ବାଇକର ଟ୍ରାକିଂ କରି ଅଭିଯୁକ୍ତ ଶିବାଙ୍କୁ କାବୁ କରିବାରେ ସଫଳ ହୋଇଥିଲା। ଶିବାଙ୍କ ବୟାନକୁ ଆଧାର କରି ପୋଲିସ ଗୋକର୍ଣ୍ଣପୁର ଗାଁରୁ ୪ଟି ଚୋରା ବାଇକ୍ ଜବତ କରିବା ସହ ବ୍ରହ୍ମପୁର ସହରର ବିଭିନ୍ନ ସ୍ଥାନରୁ ଲୁଚାଇ ରଖିଥିବା ଅନ୍ୟ ୫ଟି ବାଇକ୍କୁ ଜବତ କରିଛି। ପୋଲିସ ମୋଟ ୯ଟି ଚୋରି ବାଇକ୍ ଜବତ କରିଥିବା ଏଏସ୍ପି ପ୍ରଭାତ ରାଉତରାୟ ସୂଚନା ଦେଇଛନ୍ତି। ବୈଦ୍ୟନାଥପୁର ଥାନା ମାମଲା ନମ୍ବର ୩୧/୨୧ ଅନୁସାରେ ଶିବାଙ୍କୁ ଶୁକ୍ରବାର କୋର୍ଟ ଚାଲାଣ କରାଯାଇଛି।
ସୂଚନାଯୋଗ୍ୟ, ଜାନୁୟାରୀ ୩୧ ତାରିଖରେ ମେଡିକାଲ କ୍ୟାମ୍ପସ ପରିସରରୁ ଏକ ବାଇକ୍(ନଂ.ଓଆର୍-୦୭ଜେଡ୍-୨୭୭୮) ଚୋରି ହୋଇଯାଇଥିଲା। ଏନେଇ ବାଇକ୍ ଚାଳକ ଥାନାରେ ଅଭିଯୋଗ କରିଥିଲେ। ପୋଲିସ ଅଭିଯୋଗକୁ ଭିତ୍ତି କରି ଅନୁସନ୍ଧାନ ଆରମ୍ଭ କରିଥିଲା। ଏହିପରି ସହରର ଟାଉନ ଥାନା ଓ ଗୋଷାଣିନୂଆଗାଁ ଥାନା ଅଞ୍ଚଳରୁ ମଧ୍ୟ ବାଇକ୍ ଚୋରି ହୋଇଥିବା ଅଭିଯୋଗ ହୋଇଥିଲା। ଏହା ପୋଲିସ ପାଇଁ ଚାଲେଞ୍ଜ ହୋଇପଡିଥିଲା। ବ୍ରହ୍ମପୁର ଏସ୍ପି ପିନାକ ମିଶ୍ରଙ୍କ ନିର୍ଦ୍ଦେଶ କ୍ରମେ ଥାନା ଅଧିକାରୀଙ୍କୁ ଏକ ସ୍ବତନ୍ତ୍ର ଟିମ୍ ଗଠିତ ହୋଇଥିଲା। ଉକ୍ତ ଟିମ୍ ବିଭିନ୍ନ ସ୍ଥାନରେ ଚଢାଉ କରି ଗୁରୁବାର ବିଳମ୍ବିତ ରାତିରେ ଶିବାଙ୍କୁ ଗିରଫ କରିଥିଲା।