ଢେଙ୍କାନାଳ ଅଫିସ, ୨୮।୬ : ଢେଙ୍କାନାଳ ଜିଲା କଙ୍କଡ଼ାହାଡ଼ ବ୍ଲକ ବୀରାଶାଳ ଏୟାରଷ୍ଟ୍ରିପ୍ ବିମାନ ଦୁର୍ଘଟଣାର ୩ ସପ୍ତାହ ପରେ ବନ୍ଦ ରହିଥିବା ତାଲିମ କାର୍ଯ୍ୟକ୍ରମକୁ ପୁଣିଥରେ ଆରମ୍ଭ କରିବାକୁ ପ୍ରସ୍ତୁତି ଚାଲିଛି। ଏ ସମ୍ପର୍କରେ ଗଭର୍ନମେଣ୍ଟ ଆଭିଏଶନ ଟ୍ରେନିଂ ଇନ୍ଷ୍ଟିଚ୍ୟୁଟ୍ (ଗତି) ପକ୍ଷରୁ ଜିଲା ପ୍ରଶାସନକୁ ପତ୍ର ମାଧ୍ୟମରେ ଅବଗତ କରାଯାଇଛି।
ଜୁନ୍ ୮ରେ ଦୁର୍ଘଟଣା ଘଟିବା ପରେ ଡାଇରେକ୍ଟର ଜେନେରାଲ ସିଭିଲ ଆଭିଏଶନ (ଡିଜିସିଏ) ପକ୍ଷରୁ ୮ ଏବଂ ୯ ତାରିଖରେ ଘଟଣସ୍ଥଳରେ ତଦନ୍ତ କରାଯାଇଥିଲା। ଏହାପରେ ୯ ରୁ ୧୦ ତାରିଖରେ ଏୟାରକ୍ରାଫ୍ଟ ଆକ୍ସିଡେଣ୍ଟ ଇନଭେଷ୍ଟିଗେଶନ ବ୍ୟୁରୋ (ଏଏଆଇବି) ପକ୍ଷରୁ ତଦନ୍ତ ହୋଇଥିଲା। ୧୧ ତାରିଖରେ ସେମାନେ ଭୁବନେଶ୍ୱର ଯାଇ ସେଠାରେ ଡକ୍ୟୁମେଣ୍ଟ ଯାଞ୍ଚ କରିଥିଲେ। ଏଥିସହ କର୍ମଚାରୀ ଓ ପ୍ରଶିକ୍ଷାର୍ଥୀ ଛାତ୍ରୀଛାତ୍ରଙ୍କ ବୟାନ ରେକର୍ଡ କରିଥିଲେ। ୧୧ ତାରିଖରେ ଇନ୍ସ୍ୟୁରାନ୍ସ କମ୍ପାନୀର ଅଧିକାରୀମାନେ ଘଟଣାସ୍ଥଳରୁ ତଥ୍ୟ ସଂଗ୍ରହ କରିଥିଲେ। ଏ ସମସ୍ତ ତଦନ୍ତ ବିଷୟରେ ଜୁନ୍ ୧୪ରେ ‘ଗତି’ ପକ୍ଷରୁ ଜିଲା ପ୍ରଶାସନ, ପୂର୍ତ୍ତ ବିଭାଗ ଓ ଏସ୍ପିଙ୍କୁ ଅବଗତ କରାଯାଇଥିଲା। ତେବେ ଦୁର୍ଘଟଣାର କାରଣ ସମ୍ପର୍କରେ ସ୍ପଷ୍ଟ କରାଯାଇ ନ ଥିବାରୁ ଏହା ଅଦ୍ୟାବଧି ରହସ୍ୟାବୃତ ହୋଇରହିଛି। ଅନ୍ୟପଟେ ଏୟାରଷ୍ଟ୍ରିପ୍ରେ ଦୁର୍ଘଟଣାଗ୍ରସ୍ତ ବିମାନ (ଭିଟି ଇଏନ୍ଏଫ୍-୧୨୫)କୁ ରଖିବା ଲାଗି କୌଣସି ବ୍ୟବସ୍ଥା ନ ଥିବାରୁ ଏହାକୁ ଭୁବନେଶ୍ୱର ନିଆଯିବ ବୋଲି ନିଷ୍ପତ୍ତି ହୋଇଛି। ଏ ସଂକ୍ରାନ୍ତରେ ଜିଲାପାଳ ଭୂମେଶ ଚନ୍ଦ୍ର ବେହେରା କୁହନ୍ତି, ଦୁର୍ଘଟଣା ପରେ ଏୟାରଷ୍ଟ୍ରିପ୍ରେ ତାଲିମ କାର୍ଯ୍ୟକ୍ରମ ବନ୍ଦ ଥିଲା। ପୁଣି ଥରେ ପ୍ରଶିକ୍ଷଣ ଆରମ୍ଭ କରିବାକୁ ‘ଗତି’ ପକ୍ଷରୁ ପ୍ରଶାସନକୁ ପତ୍ର ମାଧ୍ୟମରେ ଅବଗତ କରାଯାଇଛି।
ସୂଚନାଯୋଗ୍ୟ, ବୀରାଶାଳ ଏୟାରଷ୍ଟ୍ରିପ୍ରେ ୩୮ ପ୍ରଶିକ୍ଷାର୍ଥୀଙ୍କୁ ପର୍ଯ୍ୟାୟକ୍ରମେ ବିମାନ ଉଡ଼ାଣ ପାଇଁ ତାଲିମ ଦିଆଯାଉଥିଲା। ଗତ ଜୁନ୍ ୮ ସକାଳେ ପ୍ରଶିକ୍ଷଣ ଚାଲିଥିବାବେଳେ ଏକ ବିମାନ ୧୦୦ ଫୁଟ ଉଚ୍ଚତାରୁ ଖସିପଡ଼ି ରନଓ୍ବେରେ ଦୁର୍ଘଟଣାଗ୍ରସ୍ତ ହୋଇଥିଲା। ଏଥିରେ ମୁଖ୍ୟ ପ୍ରଶିକ୍ଷକ କ୍ୟାପ୍ଟେନ ସଞ୍ଜୀବ କୁମାର ଝା ଏବଂ ତାଲିମ ନେଉଥିବା ଛାତ୍ରୀ ଅନିଶ ଫାତିମାଙ୍କ ମୃତ୍ୟୁ ଘଟିଥିଲା। ଏହି ଦୁର୍ଘଟଣା ପରେ ସାମୟିକ ଭାବେ ତାଲିମ କାର୍ଯ୍ୟକ୍ରମକୁ ବନ୍ଦ ରଖାଯାଇଥିଲା।