ମହାକାଳପଡ଼ା, ୬ା୫(ଡି.ଏନ.ଏ.): କେନ୍ଦ୍ରାପଡ଼ା ଜିଲା ମହାକାଳପଡ଼ା ବ୍ଲକ ଉପକୂଳ ଅଞ୍ଚଳରେ କେତେ ସପ୍ତାହ ହେଲା ବୈଶାଖ ମାସର ଖରା ଓ ଭୀଷଣ ଗୁଳିଗୁଳି ସହ ଗରମ ଅନୁଭୂତ ହେଉଛି। ସ୍ଥାନୀୟ ଅଞ୍ଚଳରେ ନଦୀଗୁଡିକର ପାଣି ଲୁଣିଆ ହୋଇଥିବାରୁ ଖାଲ, ପାଟିଆ, ଯୋର, ଗଡିଆ, ପୋଖରୀ, ଗଭୀର କୂପ ଆଦିର ଜଳସ୍ତର ନିମ୍ନଗାମୀ ଯୋଗୁ ଶୁଖିଲା ପଡ଼ିଛି। ଜଙ୍ଗଲୀ ଜନ୍ତୁ, ପଶୁ ପକ୍ଷୀ ଆଦି ପିଇବା ପାଣି ମୁନ୍ଦେ ପାଇଁ ଡହଳ ବିକଳ ହେଉଛନ୍ତି। ଯେଉଁ ଅଞ୍ଚଳରେ ଗଡିଆ, ପୋଖରୀ, ଚୁଆ ଆଦିରେ ମଧୁର ପାଣି ମୁନ୍ଦେ ଅଛି ସେଠାରେ ପକ୍ଷୀମାନେ ଚାତକ ପରି ଚାହିଁ ବସିଛନ୍ତି। ନିଜ ନିଜ ମଧ୍ୟରେ ପାଣି ପିଇବାକୁ ପ୍ରତିଯୋଗିତା ଚାଲିଥିବା ଦେଖିବାକୁ ମିଳୁଛି। ପକ୍ଷୀମାନଙ୍କ ମଧ୍ୟରେ ଗେଣ୍ଡାଳିଆ, ବଗ, ପାଣିକୁଆ, କାମ ଚଢ଼େଇ, ମାଛରଙ୍କା, ଦା ବେଣ୍ଟିଆ, ଟେଇଁ ଟେଇଁ ଟେଇଁଆ, ଅନ୍ଧାରୁଆ ବଗ, ପାଣି ହଂସ ଆଦି ପକ୍ଷୀଗୁଡ଼ିକ ଏବେ ଚୁଆପାଣିକୁ ଭରସା କରିଛନ୍ତି। ବନ ବିଭାଗ ପକ୍ଷରୁ ଜଙ୍ଗଲୀ ଜନ୍ତୁ ଓ ପଶୁ ପକ୍ଷୀମାନଙ୍କ ପାଇଁ ଜଙ୍ଗଲ ମଧ୍ୟରେ ଛୋଟ ଛୋଟ ଚୁଆ ଆଦି ଖନନ ପାଇଁ ବ୍ୟବସ୍ଥା ଥିଲେ ମଧ୍ୟ ତାହା ଏଯାବତ ଖନନ ହୋଇ ନ ଥିବା ଅଭିଯୋଗ ହେଉଛି। ଫଳରେ ନଦୀରୁ ମାଛ, କୀଟ ପତଙ୍ଗ ଓ ଜଙ୍ଗଲ ଚୁଆରୁ ପାଣି ପିଇ ଜଙ୍ଗଲ ମଧ୍ୟରେ ବସବାସ କରୁଥିଲେ। ଜଙ୍ଗଲ ମଧ୍ୟରେ ପାଣି ପିଇବାକୁ କୌଣସି ବ୍ୟବସ୍ଥା ନ ଥିବାରୁ ପକ୍ଷୀ ଓ ଜୀବଜନ୍ତୁମାନେ ଗଁା ମୁହାଁ ହୋଇ ଖାଲ ଓ ଚୁଆରୁ ଶୋଷ ମେଣ୍ଟାଇବାକୁ ଭିଡ଼ ଜମାଉଛନ୍ତି। ଯେହେତୁ ଗ୍ରାମାଞ୍ଚଳଗୁଡ଼ିକରେ ପକ୍ଷୀମାନଙ୍କ ଭିଡ଼ ଜମୁଛି ସେମାନଙ୍କ ଜୀବନ ପ୍ରତି ବିପଦ ରହିଛି। ଶିକାରୀମାନଙ୍କ ଲୋଲୁପ ଦୃଷ୍ଟି ଏବେ ପକ୍ଷୀମାନଙ୍କ ଉପରେ ପଡିଛି। କେବେ କେବେ ଏହି ନିରୀହ ପକ୍ଷୀମାନଙ୍କ ମଧ୍ୟରେ ଶିକାରୀମାନେ ଫାଶ ଓ ବିଷ ଦେଇ ଶିକାର କରୁଥିବା ଅଭିଯୋଗ ହେଉଛି। ବ୍ଲକର କଣ୍ଟିଲୋ ସଂରକ୍ଷିତ ଜଙ୍ଗଲ ନିକଟ ଭାଟେଣୀ ଗ୍ରାମସ୍ଥିତ ଗହୀରପାଟର ଚୁଆ ନିକଟରେ ପକ୍ଷୀମାନଙ୍କ କୋଳାହଳ ଦେଖିବାକୁ ମିଳିଛି। ସେହିପରି ବତୀଘର, କଂସାରଡିଆ, ଶଙ୍ଖଚିଲ, ଶାସନପେଟା, କଣ୍ଡରାପାଟିଆ ଆଦି ସ୍ଥାନର ଚୁଆଗୁଡ଼ିକରେ ପାଣି ପିଇବାକୁ ପକ୍ଷୀମାନଙ୍କ ଭିଡ଼ ପରିଲକ୍ଷିତ ହେଉଛି। ଏ ସମ୍ପର୍କରେ ମହାକାଳପଡ଼ା ବନାଞ୍ଚଳ ଅଧିକାରୀ ସାହାଜୀ ଚରଣ ବିଶ୍ୱାଳଙ୍କୁ ପଚାରିବାରେ ବିଭାଗ ପକ୍ଷରୁ ପଦକ୍ଷେପ ଗ୍ରହଣ କରାଯିବ ବୋଲି ସେ କହିଛନ୍ତି।