ଭଦ୍ରକ ଅଫିସ,୨୭ା୧୦: ଧାମନଗର ଉପନିର୍ବାଚନ ପାଖେଇ ଆସୁଥିବା ବେଳେ ଭାଜପା-ବିଜେଡ଼ି ମଧ୍ୟରେ ଆରୋପ ପ୍ରତ୍ୟାରୋପ ବଢ଼ି ଚାଲିଛି। ଟଙ୍କା ବାଣ୍ଟି ଭୋଟରଙ୍କୁ ପ୍ରଲୋଭିତ କରୁଥିବା ନେଇ ଉଭୟ ଦଳ ପରସ୍ପର ବିରୋଧରେ ମୁଖ୍ୟ ନିର୍ବାଚନ ଅଧିକାରୀଙ୍କ ନିକଟରେ ଫେରାଦ ହୋଇଛନ୍ତି। ମିଶନ ଶକ୍ତି ମହିଳାଙ୍କ ଦ୍ୱାରା ମହିଳା ଭୋଟରଙ୍କୁ ଟଙ୍କା ବଣ୍ଟା ଯାଉଛି ବୋଲି ଭାଜପା କରିଥିବା ଅଭିଯୋଗକୁ ବୁଧବାର ବିଜେଡି ପକ୍ଷରୁ ଏକ ଖବରଦାତା ସମ୍ମିଳନୀରେ ଖଣ୍ଡନ କରାଯାଇଛି। ଭଦ୍ରକର ଏକ ହୋଟେଲରେ ଅନୁଷ୍ଠିତ ସମ୍ମିଳନୀରେ ରାଜ୍ୟସଭା ଏମ୍ପି ମାନସ ମଙ୍ଗରାଜ, ଭଦ୍ରକ ପର୍ଯ୍ୟବେକ୍ଷକ ବିଧାୟକ ପ୍ରଣବ ବଳବନ୍ତରାୟ, ମୁଖପାତ୍ର ଗୌତମବୁଦ୍ଧ ଦାଶ ଓ ଅମିତ ମଲ୍ଲିକ ପ୍ରମୁଖ ଯୋଗଦେଇ ଧାମନଗରରେ ଭାଜପା ମିଶନ ଶକ୍ତି ମହିଳାଙ୍କ ନାମରେ ଯେଉଁ ମିଛ ଅଭିଯୋଗ କରି ବଦନାମ କରୁଛି ଉପନିର୍ବାଚନରେ ମହିଳାମାନେ ଏହାର ଜବାବ ଦେବେ ବୋଲି କହିଥିଲେ। ପିପିଲି,ବାଲେଶ୍ୱର,ବିଜେପୁର ଉପନିର୍ବାଚନ ଭଳି ଧାମନଗରରେ ଏହାର ପୁନରାବୃତ୍ତି ହେବ। ବିଜେଡ଼ି ସରକାରରେ ଧାମନଗରରେ ବହୁ ବିକାଶ ମୂଳକ କାର୍ଯ୍ୟ କରାଯାଇଛି। ଏହି ବିକାଶ ଆଧାରରେ ଧାମନଗରବାସୀ ବିଜେଡି ପ୍ରାର୍ଥିନୀ ଅବନ୍ତୀ ଦାସଙ୍କୁ ବହୁ ଭୋଟରେ ଜିତାଇବେ। ମୁଖ୍ୟମନ୍ତ୍ରୀଙ୍କ ସ୍ବଚ୍ଛ ନିର୍ମଳ ଭାବମୂର୍ତ୍ତି ନିକଟରେ ଭାଜପାର ମିଥ୍ୟା ଅପପ୍ରଚାର କିଛି କାମ କରିବ ନାହିଁ ବୋଲି କହିଥିଲେ। ଜଣେ ମିଶନ ଶକ୍ତିର ମହିଳାଙ୍କୁ ଉପନିର୍ବାଚନରେ ପ୍ରାର୍ଥୀ କରାଇ ମହିଳାମାନଙ୍କୁ ମୁଖ୍ୟମନ୍ତ୍ରୀ ସମ୍ମାନ ଦେଇଛନ୍ତି। ପୂର୍ବତନ ବିଧାୟକ ରାଜେନ୍ଦ୍ର ଦାସ ବିଜେଡ଼ି ଭୋଟକୁ ପ୍ରଭାବିତ କରିପାରିବେ ନାହିଁ ବୋଲି ଖବରଦାତାଙ୍କ ପ୍ରଶ୍ନର ଉତ୍ତରରେ ରାଜ୍ୟସଭା ଏମ୍ପି ମଙ୍ଗରାଜ କହିଥିଲେ। ଏହି ସମ୍ମିଳନୀକୁ ଅତୀଶ ବେହେରା ସଂଯୋଜନା କରିଥିଲେ।