ପୁରୀ,୨୫ା୩(ଅଜିତ୍ ମହାନ୍ତି): ଅନ୍ଲାଇନ୍ରେ ମଗାଇଲେ ପତିତପାବନ ବାନା, କିନ୍ତୁ ଆସିଲା ଭାରତୀୟ ଜନତା ଦଳ (ଭାଜପା)ର ପତାକା। ଫଳରେ ଠକେଇର ଶିକାର ହୋଇଥିବା ନେଇ ଅନ୍ଲାଇନ୍ ଆପ୍ ଆମାଜନ୍ ନାଁରେ ପୁରୀ ବାସେଳିସାହିର ଭଗବାନ ମହାପାତ୍ର ଅଭିଯୋଗ ଆଣିଛନ୍ତି। ଏ ସଂକ୍ରାନ୍ତରେ ସେ ରବିବାର ଶ୍ରୀମନ୍ଦିର କାର୍ଯ୍ୟାଳୟରେ ଅଭିଯୋଗ କରିବା ସହ ସମ୍ପୃକ୍ତ ସଂସ୍ଥା ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ ନିମନ୍ତେ ଅନୁରୋଧ କରିଛନ୍ତି।
ମହାପାତ୍ର କହିଛନ୍ତି, କିଛିଦିନ ତଳେ ହ୍ବାଟ୍ସଆପ୍ ଗ୍ରୁପ୍ରେ ସେ ଦେଖିବାକୁ ପାଇଥିଲେ ଦିଲ୍ଲୀର ଏକ ସଂସ୍ଥା ଅନ୍ଲାଇନ୍ ଶପିଙ୍ଗ୍ ଆପ୍ ଆମାଜନରେ ଶ୍ରୀମନ୍ଦିରର ପତିତପାବନ ବାନା ବିକ୍ରି କରୁଛି। ସେ ଏନେଇ ଉକ୍ତ କମ୍ପାନୀ ସହ ମେସେଜ ଜରିଆରେ କଥା ହୋଇଥିଲେ। ମହାପ୍ରଭୁଙ୍କ ବାନା ବିକ୍ରି ପାଇଁ ତାଙ୍କୁ ଶ୍ରୀମନ୍ଦିର ପ୍ରଶାସନ ଅନୁମତି ଦେଇଛି କି ନାହିଁ ବୋଲି ପଚାରିଥିଲେ। ହେଲେ କମ୍ପାନୀ କର୍ତ୍ତୃପକ୍ଷ ଠିକ ଭାବେ କୌଣସି ଉତ୍ତର ଦେଇ ନ ଥିଲେ। ନିଜେ ବାନା ପ୍ରସ୍ତୁତ କରି ବିକ୍ରି କରୁଥିବା ସୂଚନା ଦେଇଥିଲେ। ତେବେ ପ୍ରକୃତରେ ପତିତପାବନ ବାନା ବିକ୍ରି ହେଉଛି କି ନାହିଁ ତାହା ପରୀକ୍ଷା କରିବା ପାଇଁ ମହାପାତ୍ର ଅନ୍ଲାଇନ ଆପ୍ ଆମାଜନ୍ରେ ନାଲିରଙ୍ଗର ପତିତପାବନ ବାନା ଅର୍ଡର କରିଥିଲେ। ଅର୍ଡର ମୁତାବକ ତାଙ୍କ ନିକଟରେ ପ୍ୟାକେଟ ଆସି ପହଞ୍ଚତ୍ଥିଲା। ହେଲେ ସେ ଯେତେବେଳେ ପ୍ୟାକେଟ୍ ଖୋଲି ଦେଖିଥିଲେ ସେଥିରୁ ଭାଜପାର ପତାକା ମିଳିଥିଲା। ଏହା ଦେଖି ତାଙ୍କ ଭାବନାକୁ ଆଘାତ ଲାଗିଥିଲା। ଭକ୍ତଙ୍କ ଭାବନା ସହ କମ୍ପାନୀ ଖେଳୁଥିବା ସେ ଅଭିଯୋଗ କରିଛନ୍ତି। ଏ ନେଇ ସେ ଶ୍ରୀମନ୍ଦିର ପ୍ରଶାସନକୁ ଅବଗତ କରାଇଥିବାବେଳେ ଖାଉଟି ଅଦାଲତର ଦ୍ୱାରସ୍ଥ ହେବେ ବୋଲି କହିଛନ୍ତି। ସେହିପରି ଶ୍ରୀମନ୍ଦିର ଚୂନରା ସେବାୟତ ଡ. ଶରତ କୁମାର ମହାନ୍ତି କହିଛନ୍ତି, ଏହା ଚିନ୍ତାର ବିଷୟ। ପତିତପାବନ ବାନା ନାମରେ ଆମାଜନ ବ୍ୟବସାୟ କରିବା ଶ୍ରୀଜଗନ୍ନାଥ ସଂସ୍କୃତି ପ୍ରତି ଅପମାନ ସଦୃଶ। ମହାପ୍ରଭୁଙ୍କ ଦ୍ରବ୍ୟ ଟିକିଏ ପାଇବା ପାଇଁ ଭକ୍ତ ଆକୁଳତାର ସହ ଆବେଗପୂର୍ଣ୍ଣ ଭାବେ ଚାହିଁବସିଥାଏ। କିନ୍ତୁ ଉକ୍ତ କମ୍ପାନୀ ଭକ୍ତଙ୍କ ଭାବନା ସହ ଖେଳିଛି। ଶ୍ରୀମନ୍ଦିର ପ୍ରଶାସନ କେବେ ମଧ୍ୟ ମହାପ୍ରଭୁଙ୍କ ପତିତପାବନ ବାନା ବିକ୍ରୟ କରିବା ପାଇଁ କୌଣସି କମ୍ପାନୀକୁ ଅନୁମତି ପ୍ରଦାନ କରିନାହିଁ। ଉକ୍ତ କମ୍ପାନୀ ଡୁପ୍ଲିକେଟ୍ ବାନା ବିକ୍ରି କରିବା ଭକ୍ତଙ୍କ ଭାବନା ପ୍ରତି କୁଠାରାଘାତ ସଦୃଶ। ତେଣୁ ଏପରି କାର୍ଯ୍ୟ ପାଇଁ ଆମାଜନ୍ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବା ଆବଶ୍ୟକ ବୋଲି ମହାନ୍ତି ମତ ଦେଇଛନ୍ତି।
