ନୂଆଦିଲ୍ଲୀ,୨୪।୬: ଭାଜପା ଏମ୍ପି ବରୁଣ ଗାନ୍ଧୀ ନିଜ ସରକାର ବିରୋଧରେ କଠୋର ଆଭିମୁଖ୍ୟ ଗ୍ରହଣ କରୁଛନ୍ତି। ସମୟ ସମୟରେ ସେ ସରକାରଙ୍କ ଅନେକ ଯୋଜନାକୁ ମଧ୍ୟ ସମାଲୋଚନା କରିଛନ୍ତି। ନିକଟରେ ସେ ସରକାରଙ୍କ ଅଗ୍ନିପଥ ଯୋଜନା ଉପରେ ମଧ୍ୟ ପ୍ରଶ୍ନ ଉଠାଇଥିଲେ। ଏହି କ୍ରମରେ ଶୁକ୍ରବାର ବରୁଣ ଏକ ବଡ଼ ଘୋଷଣା କରିଛନ୍ତି।
ସେ ଟୁଇଟ୍ ଯୋଗେ କହିଛନ୍ତି ଯେ, ସ୍ବଳ୍ପ ମିଆଦି ସେବା କରିବାକୁ ଥିବା ଅଗ୍ନିବୀର ପେନ୍ସନ ପାଇବାକୁ ହକଦାର ନୁହଁନ୍ତି, ତେବେ ଜନପ୍ରତିନିଧିଙ୍କୁ ପାଇଁ ଏହି ସୁବିଧା କାହିଁକି? ଯଦି ରାଷ୍ଟ୍ରରକ୍ଷକଙ୍କୁ ପେନସନ ଅଧିକାର ନାହିଁ, ତେବେ ମୁଁ ମଧ୍ୟ ମୋର ପେନସନ୍ ଛାଡିବାକୁ ପ୍ରସ୍ତୁତ ଅଛି। ଆମେ ବିଧାୟକ ଏବଂ ଏମ୍ପିମାନେ ପେନସନ ଛାଡିଦେଲେ ଏହା ସୁନିଶ୍ଚିତ କରିପାରିବା କି ଅଗ୍ନିବୀରମାନେ ପେନସନ ପାଇପାରିବେ?
ସୂଚନାଯୋଗ୍ୟ, କେନ୍ଦ୍ର ସରକାରଙ୍କ ପକ୍ଷରୁ ଭାରତୀୟ ସେନା, ବାୟୁସେନା ଏବଂ ନୌସେନାରେ ନିଯୁକ୍ତି ପାଇଁ ଅଗ୍ନିପଥ ଯୋଜନା ଆରମ୍ଭ କରିବାକୁ ଘୋଷଣା କରାଯାଇଛି। ଏହି ଯୋଜନା ଅଧୀନରେ, ଇଚ୍ଛୁକ ଯୁବକମାନଙ୍କୁ ୪ ବର୍ଷ ପାଇଁ ସଶସ୍ତ୍ର ବାହିନୀରେ ନିଯୁକ୍ତି ଦିଆଯିବ। ଏହାକୁ ବିରୋଧ କରି ଅନେକ ଛାତ୍ର ଧାରଣା ଦେଇଥିଲେ।