ନବରଙ୍ଗପୁର,୯।୬(ବି.ପ୍ର.): ସରକାରଙ୍କ ଯୋଜନା ଓ କାର୍ଯ୍ୟକ୍ରମ ଫସର ଫାଟି ଯାଉଛି। ସରକାରୀ ବାବୁଙ୍କ ଅଜାଣତରେ ହୋଇଯାଉଛି ଅନେକ କାର୍ଯ୍ୟ। ଅଭିଯୋଗ ହେଲେ ତଦନ୍ତ ନାଁରେ ଘଟଣା ଚପାଇ ଦିଆଯାଉଛି। ଏହିଭଳି ଏକ ଘଟଣା ଘଟିଛି ପଣ୍ଡିକୋଟ ପଞ୍ଚାୟତରେ। ନବରଙ୍ଗପୁର ଜିଲା ପାପଡାହାଣ୍ଡି ବ୍ଲକ ପଣ୍ଡିକୋଟ ପଞ୍ଚାୟତରେ ୪୨ ଗୋଟି କମ୍ପୋଷ୍ଟ କୁଣ୍ଡ ନିର୍ମାଣ ହୋଇଛି। ଏହି କାର୍ଯ୍ୟ ପାଇଁ ବ୍ଲକସ୍ତରରେ ଫାଇଲ ଖୋଲା ଯାଇନାହିଁ। ଉକ୍ତ କାର୍ଯ୍ୟ ପାଇଁ ବିଡିଓଙ୍କ ଅନୁମତି ମଧ୍ୟ ମିଳିନାହିଁ। କେଉଁ ସ୍ଥାନମାନଙ୍କରେ ନିର୍ମାଣ କରାଯିବ ତାହାର ସ୍ଥାନ ମଧ୍ୟ ନିରୁପଣ ହୋଇନାହିଁ। ପ୍ରତି କୁଣ୍ଡ କେଉଁ ଆକାରର କରାଯିବ ତାହା ମଧ୍ୟ ଏ ଯାଏ କାହା ପାଖରେ ତଥ୍ୟ ନାହିଁ। ନିର୍ମାଣ କରୁଥିବା ବ୍ୟକ୍ତି ଜଣକ ଏଯାଏ କାର୍ଯ୍ୟାଦେଶ ମଧ୍ୟ ପାଇଁ ନାହାନ୍ତି। ତଥାପି ଶାସକ ଦଳର କେତେକ ନେତାଙ୍କ ନିର୍ଦ୍ଦେଶରେ ଜଣେ ବ୍ୟକ୍ତି ୪୨ଟି କମ୍ପୋଷ୍ଟ କୁଣ୍ଡ ନିର୍ମାଣ କରିଛନ୍ତି। ପ୍ରତି କୁଣ୍ଡ ପିଛା ସରକାର ୨୫ ହଜାର ଟଙ୍କା ଖର୍ଚ୍ଚ କରୁଛନ୍ତି। ଚଞ୍ଚକତା କରି ଓ ନିମ୍ନମାନର କାମ କରି ମୁନାଫା ଅର୍ଜନ କରିବାକୁ ଉଦ୍ୟମ ଚଲାଇଛନ୍ତି। ଏନେଇ ପାପଡାହାଣ୍ଡି ବ୍ଲକ କଂଗ୍ରେସ ସାଧାରଣ ସମ୍ପାଦକ ବିଭୁତି ପ୍ରସାଦ ପଣ୍ଡା ବିଡ଼ିଓଙ୍କୁ ଲିଖିତ ଅଭିଯୋଗ କରିବା ପରେ ଏହାର ତଦନ୍ତ ପାଇଁ କନିଷ୍ଠ ଯନ୍ତ୍ରୀ ଓ ସହକାରୀ ଯନ୍ତ୍ରୀଙ୍କୁ ନିର୍ଦ୍ଦେଶ ଦିଆଯାଇଛି। ଏନେଇ ବିଡ଼ିଓ ରଞ୍ଜିତା ମଲ୍ଲିକଙ୍କୁ ପଚାରିବାରୁ ଅଭିଯୋଗ କ୍ରମେ ତଦନ୍ତ ପାଇଁ ଦିଆଯାଇଛି। ତଦନ୍ତ ରିପୋର୍ଟ ଆସିବା ପରେ ପଦକ୍ଷେପ ଗ୍ରହଣ କରାଯିବ ବୋଲି କରିଛନ୍ତି।